Read lambya LUKA 24 Bible Online

LUKA 24 - lambya bible

LUKA 24

¹Pandabi-ndabi nkani pisiku ilyakwanda mwa sabata, abakolo bakabuka kwipumpa, bo banyamuye ivyakununkila vivyo bakayannya.

²Bakagha ukuti babunguluzizyepo kale ibwe pamulyango wipumpa.

³Bakinjila mukasi, loli batakawaghamo umuvimba uwa Mwene u Yesu.

⁴Bo bakuswigha na zinizi, umwakuchenusya bulo bakennya abantu babili bavwalite amenda aghakumetuka bimiliye papipi nabo.

⁵Abakolo bala bakanyila nkani nukwinamila ivyeni vyabo pasi. Po abantu bala bakalaluzya bakati, “Nkimba choni chicho mukulonda umuntu umupuma mu bantu abafwe?

⁶Atalimo muno, azyukite kubufwe! Kumbuka zizyo akababuzya bo ali mu Galileya ukuti,

⁷‘Umwana uwa Muntu abaghiye pakubikiwa munyobe izya bantu abambibi nukukomeliwa pachipinjika. Po isiku ilyabutatu akwiza pakuzyuka kubufwe.’ ”

⁸Panapo na panapo abakolo bala bakakumbuka amazyu ghache.

⁹Bo babwelako kwipumpa bakababuzya vyosi vinivi abamanyili 11 bala na banji bosi.

¹⁰Mu bakolo bala-bala mukaba u Maliya Magadalena, nu Yohana, sona nu Maliya unyina uwa Yakobo, abene na bakolo abanji babo bakaba nabo bakababuzya zinizi abatumiwa.

¹¹Loli abatumiwa bakinong'onagha vivyo abakolo bala bakanena ukuti vikaba vyabupunganu, sona batakabasubila.

¹²Loli u Pitala akavundumuka nukuchimbilila kwipumpa, akinamila pasi nukwennya bulo amenda amazelu ghagho bakaghunnyembetelela umuvimba uwa Yesu. Po akabwela kunyumba bo akuswigha na zizyo zikabombiwa.[27]

¹³Pisiku linilyo abamanyili aba Yesu bakabukagha kukaya aka Emabusi, ubutali bwache bukaba amatamba 11,000 ukufuma mu Yelusalemu,

¹⁴sona bakanenezannyanga nizya vintu vyosi vivyo vikabombiwa.

¹⁵Bo bakunenezannya nukulaluzannya bene-bene, u Yesu akapalamila nukwenda poka nabo.

¹⁶Loli batakamwaghannya pakuti amaso ghabo ghakaba ngati ghighaliliwe.

¹⁷U Yesu akabalaluzya akati, “Nkimba mukunenezannya choni, bo mukwenda.” Abene bakimilila ni vyeni vyabo vya chitima.

¹⁸Umuntu weka uwa babo, yuyo akaba we Kiliyopa akalaluzya akati, “Nkimba awe we muyeni mu Yelusalemu umu, yuyo atavimenye vivyo vyabombiwanga mula-mula amasiku amanandi bulo ghagho ghachila?”

¹⁹U Yesu akalaluzya akati, “Vintu vyoni?” Abene bakamula bakati, “Ivintu vivyo vikabombiwa kwa Yesu uwa mu Nazaleti. Umuntu uyu akaba mulaghuzi, yuyo imbombo zyache, sona na mazyu ghache vikamuhobosya u Chala, sona na bantu bosi.

²⁰Abaputi abasongo na balaghili bitu bakamubika munyobe izya balongi, umwakuti abalongi badumule ukuti aghoghiwe, po akakomeliwa pachipinjika.

²¹Loli tukasubilagha ukuti we yuyo akwiza pakubasatula aba Izilayeli. Ukonjelezya pavyosi vinivi, ili lisiku lyabutatu ukwandila pisiku lilyo vikabombiwa.

²²Abakolo bamo aba mukabukatila kitu bakatuswighizya nkani. Abene bakabuka kwipumpa pandabi-ndabi,

²³loli batakawaghamo umuvimba. Bo babwelako bakatubuzya ukuti bakennya ichisetuka icha bantumi aba Chala, babo bakababuzya ukuti u Yesu mupuma.

²⁴Bamo aba mukabukatila kitu bakabuka kwipumpa nukuvyagha vyosi ukuyana na mumo abakolo bala bakanenela, loli batakamwennya.”

²⁵U Yesu akababuzya akati, “Mwe bapunganu mwee! Choni chicho mwe bapala-pala nkani pakusubila ivintu vyosi vivyo abalaghuzi bakaghula!

²⁶Nkimba zitamubaghiye pakuti u Kilisitu ayimbe ni vintu vyosi vinivi bo atinjiye mubuchindamu bwache?”

²⁷Sona u Yesu akalingannya kukwabo zizyo zikaneniwa nizya yuyo mu Masimbo ghosi, ukwandila mu mabuku agha Mozesi mupaka na mumasimbo ghosi agha balaghuzi.

²⁸Bo bapalamila kukaya kako bakabukaghako, u Yesu akaba ngati po akubachila.

²⁹Loli bakamulambilizya bakati, “Ikala naswe pakuti kwanda kale pakwila, sona ichisi chandako.” Po akinjila nukwikala nabo.

³⁰Akikala pasi nukulya nabo, sona akasenda ichibama nukupalizya kwa Chala. Po akachimenyannya nukubapa.

³¹Po amaso ghabo ghakighuka nukumumanya, loli akazyebeluka bulo.

³²Bakanenezannyanga bene-bene bakati, “Nkimba chitakayana bulo nu moto uwakwaka mumoyo ghitu, bo akunena naswe muzila mula-mula nukutulingannya Amasimbo?”

³³Panapo na panapo bakanyamuka nukunyokela ku Yelusalemu, kuko bakabagha abamanyili 11 babunganite poka na banji,

³⁴nukuti, “Naloli u Mwene azyukite kubufwe! Amubonekela u Simoni!”

³⁵Po abanavuli babili bala bakalingannya vivyo vikababonekela muzila mula-mula, sona na mumo bakamumanyila u Mwene, bo amenyannya ichibama.

³⁶Bo babili bala bachili bakunena zinizi, u Mwene akimilila pakasi papabo nukuti, “Umutende ghubanje namwe.”[28]

³⁷Loli abene bakachenuka nukunyila nkani, ukwinong'ona ukuti bakwennya chizyuka.

³⁸Po u Yesu akababuzya akati, “Choni chicho mukunyila nukwilamwa mumoyo ghinyu?

³⁹Ennya inyobe zyane, sona ni vinama vyane, ukuti naloli Nene! Mumpalamasye nukwennya pakuti ichizyuka chite ni nyama na mafupa ukuyana na mumo mukunyenezya ane indi navyo.”

⁴⁰Bo anena zinizi, akabalanjizya inyobe ni nyayo zyache.[29]

⁴¹Pope bulo batakasubila pakuti bakahoboka nkani nukuswigha. Po akabalaluzya akati, “Nkimba muli nacho chimo ichakulya?”

⁴²Bakamupa akamenyu akaswi impiye,

⁴³kako akasenda nukulya pamaso papabo.

⁴⁴Po akababuzya akati, “Ivi vyo vivyo inkababuzya, bo indi poka namwe. Vyosi vivyo vikasimbiwa nizya ane mu Ndaghilo izya Mozesi, ubusimbe ubwa balaghuzi na mu Masalimo bukwanilisiwe.”

⁴⁵Po akabighula inyinong'ono zyabo ukuti bivwisye Amasimbo,

⁴⁶nukubabuzya ukuti, “Ivi vyo vivyo visimbiwe: U Kilisitu abaghiye pakuyimba nukuzyuka kubufwe, bo ghachilapo amasiku matatu,

⁴⁷sona nukuti mwitabwa lyache amazyu ghalumbililiwe pakasi pa bantu aba inko zyosi ukwandila mu Yelusalemu ukuti abantu bapinduke nukuzileka imbibi zyabo, sona nukuti u Chala abahobokele imbibi zyabo.

⁴⁸Amwe mwe bakaboni aba vintu vyosi vinivi.

⁴⁹Inkwiza pakubatumila chicho u Tata wane akalayizya. Loli mulindililaye mukaya akakulu nkani mupaka papo mwapokela amaka aghakufuma kumwanya.”

⁵⁰Po akabalongolela pakufuma nabo mukaya akakulu nkani kala mupaka mukaya aka Betaniya. Kula-kula akimika inyobe zyache nukubasaya.

⁵¹Bo akubasaya, akatantama panandi nukusendiwa ukubuka kumwanya.[30]

⁵²Bakamuchindika nukunyokela mu Yelusalemu, bo bizuye nu buhobosu ubukulu nkani.

⁵³Akabalilo kosi bakikalagha mu Nyumba iya Chala pakumupalizya u Chala.