Read lambya YOHANI 16 Bible Online

YOHANI 16 - lambya bible

YOHANI 16

¹“Nababuzya zinizi, umwakuti muleke ukutagha ulwitiko.

²Bakwiza pakubepusya munyumba izyakwiputilamo, sona akabalilo kakwiza kako umuntu wesi yuyo akubaghogha akwiza pakwinong'ona ukuti pakubomba bunubu, akumubombela u Chala.

³Abantu bakwiza pakubabombela zinizi pakuti batamumenye Utata, sona nane bulo batamenye.

⁴Nababuzya zinizi, umwakuti bo akabalilo kala kakwana akakuti abene babombe ivintu vinivi, mukakumbukaye ukuti ane inkabasoka. “Loli ukwandila ko kubwandilo intakababuzya zinizi pakuti inkaba poka namwe.

⁵Ilelo inkubuka kwa yuyo akantuma, loli nayumo umuntu uwakundalusya ukuti, ‘Ukubuka kwiyi?’

⁶Po amoyo ghinyu ghizuye ni chitima pakuti nababuzya zinizi.

⁷Naloli inkubabuzya ukuti chizapo kukwinyu ukuti ane imbuke pakuti nanti intakubuka, Umwavwilizi atakwiza kukwinyu. Loli nanti nabuka, po inkwiza pakumutuma kukwinyu.

⁸Sona bo iza, akwiza pakubasimikizya abantu aba muchisu ichapasi ukuti akinong'onele kabo pambibi, ubugholosu, sona na mumo u Chala akwiza pakulongela abantu kate kiza.

⁹Akinong'onele kabo pambibi kate kiza pakuti batakunsubila;

¹⁰akinong'onele kabo pa bugholosu kate kiza pakuti inkubuka kwa Tata, po mutakwiza pakunyennya sona;

¹¹akinong'onele kabo namumo u Chala akwiza pakulongela abantu kate kiza pakuti u Satana, umulaghili uwa chisu ichapasi ichi alongiwe kale.

¹²“Inchili indi nazyo inyinji izyakubabuzya, loli pakabalilo aka mutangazyivwisya.

¹³Loli bo u Muzimu Umuzelu, yuyo akuvumbula ubwanaloli ubwa Chala iza, akwiza pakubamanyizya ubwanaloli bosi. Atakwiza pakunena nu bulaghili ubwache nu bwache awe, loli akwiza pakunena zizyo akwivwa, sona akwiza pakubabuzya nizya vintu vivyo vikwiza pakuboneka muntazi.

¹⁴Akwiza pakumpa ane ubuchindamu pakuti akwiza pakusenda zizyo inkunena nukubabuzya amwe.

¹⁵Vyosi vivyo Utata ali navyo vyane. Ichi cho chifukwa inkanena ukuti u Muzimu Umuzelu akwiza pakusenda zizyo inkunena nukubabuzya amwe.

¹⁶“Pasyala akabalilo akanandi bulo po mutakwiza pakunyennya, loli bo pachilapo akabalilo akanandi bulo mukwiza pakunyennya.”

¹⁷Abamanyili bache bamo bakanda pakulaluzannya bene-bene ukuti, “Nkimba akung'anamula ichoni bo akunena ukuti, ‘Pasyala akabalilo akanandi bulo po mutakwiza pakunyennya, sona bo pachilapo akabalilo akanandi bulo mukwiza pakunyennya sona,’ akunena sona akuti, ‘Pakuti inkubuka kwa Tata.’

¹⁸Nkimba akung'anamula ichoni bo akunena ukuti, ‘Pasyala akabalilo akanandi bulo?’ Aswe tutakuzyivwisya zizyo akunena.”

¹⁹U Yesu akazyaghannya ukuti abamanyili bache bakalondagha pakumulaluzya, po akanena nabo akati, “Inkanena ukuti, ‘Pasyala akabalilo akanandi bulo po mutakwiza pakunyennya, loli bo pachilapo akabalilo akanandi bulo mukwiza pakunyennya.’ Nkimba ivi vyo vivyo mukulaluzannya mwebene?

²⁰Naloli inkubabuzya ukuti mukwiza pakulila nu kufwifwitila, loli abantu aba muchisu ichapasi ichi bakwiza pakuhoboka nkani. Amwe mukwiza pakuba ni chitima, loli ichitima chinyu chikwiza pakuba buhobosu.

²¹Nanti umukolo ali papipi pakusayiwa, akulwika pakuti akabalilo kache aka ntamyo kakwana, loli nanti umwana apapiwa, akuluvya intamyo zyache zila pakuti akuhoboka nkani ukuti umwana apapiwa muchisu.

²²Momumo zibeleye namwe, ilelo muli ni chitima, loli inkwiza pakubennya sona. Amoyo ghinyu ghakwiza pakwizula nu buhobosu, ubuhobosu bubo nayumo umuntu atangabafyula.

²³“Bo isiku lila lyakwana, mutakwiza pakundalusya nachimo. Naloli inkubabuzya ukuti Utata akwiza pakubapa chosi chicho mukulabila mwitabwa lyane.[24]

²⁴Ukufika pakabalilo aka, mutalabitepo nachimo mwitabwa lyane. Laba, po mukwiza pakupokela, umwakuti ubuhobosu bwinyu bubanje bwakufikapo.

²⁵“Nababuzizye muvyili ivintu ivi. Akabalilo kakwiza bo intakwiza pakunenela muvyili, loli inkwiza pakubabuzya nizya Tata pabuzelu.

²⁶Bo isiku lila lyakwana, mukwiza pakumulaba mwitabwa lyane. Sona intakunena ukuti inkwiza pakubalabila kwa Tata,

²⁷pakuti Utata umwenecho abaghanite amwe. Abaghanite amwe pakuti amwe munganite, sona musubiye ukuti inkafuma kwa Chala.

²⁸Ane inkafuma kwa Tata nukwiza muchisu ichapasi, po ilelo inkwepamo muchisu ichapasi nukunyokela kwa Tata.”

²⁹Abamanyili bache bakanena nawe bakati, “Losi ulu ukunena pabuzelu, utakunenela sona muvyili.

³⁰Losi ulu tuzimenye ukuti uvimenye vyosi; kutakulondiwa sona ukuti umuntu akulaluzye, awe. Ichi cho chifukwa tukusubila ukuti ukafuma kwa Chala.”

³¹U Yesu akabamula akati, “Nkimba losi ulu mukusubila?

³²Akabalilo kakwiza, sona kakwana kale, bo mukwiza pakusata, umuntu wesi kukaya kache nukundeka nemwene. Loli inte nemwene pakuti Utata ali poka nane.

³³Nababuzya zinizi ukuti mubanje nu mutende pakuba poka nane. Ichisu ichapasi ichi chikwiza pakubavwima, loli mujimbe nkani umoyo pakuti nachipota kale ichisu ichapasi!”