Read lambya YOHANI 4 Bible Online

YOHANI 4 - lambya bible

YOHANI 4

¹Aba Falisayi bakivwa ukuti u Yesu akakabagha nu kubozya abamanyili abinji ukuchila u Yohani.

²(U Yesu mwene atakamozyapo nayumo umuntu, loli abamanyili bache bakozyanga.)

³Bo u Yesu ivwa zizyo zikaneniwanga, akepamo muchigaba icha Yudeya nukunyokela kuchigaba icha Galileya,

⁵Po akafika mukaya aka Sikali muchigaba icha Samaliya papipi nu mughunda, ghugho u Yakobo akamupa umwana wache u Jozefu.

⁶Mula-mula mukabamo ichiziba icha Yakobo. Bo u Yesu alita nkani nu bulendo bwache, akikala pachiziba pala. Kakaba kabalilo bo izuba lili pamutu.

⁷Umukolo umu Samaliya akiza pakusemba amizi. Po u Yesu akamubuzya akati, “Umpeko amizi aghakung'wela.”

⁸(Pakuti abamanyili bache bakabuka mukaya akakulu pakughula ivyakulya.)

⁹Umukolo yula akamwamula akati, “Awe we mu Yuda, ane ne mu Samaliya. Po ungandaba buli-buli amizi aghakung'wela?” (Pakuti aba Yuda na ba Samaliya batakwangalilana.) [5]

¹⁰U Yesu akamwamula akati, “Nanti wavimenye ivyabupi ivya Chala nu muntu yuyo akukulaba amizi aghakung'wela, ngali wamulabite amizi aghakung'wela, po ngali umwene akupiye amizi amapela bumi.”

¹¹Umukolo akati, “Wee Mwene, ichakusembela ute nacho, sona ichiziba chibilite. Nkimba ungaghagha kwiyi amizi amapela bumi?

¹²Umunyenya witu u Yakobo we yuyo akatupa ichiziba chinichi, sona wepe na bana bache poka ni vitekiwa vyache akang'welaghapo panapa? Po nkimba awe we songo ukumuchila u Yakobo?”

¹³U Yesu akamwamula akati, “Umuntu wesi yuyo akung'wela amizi agha akwiza pakuba sona ni nyota.

¹⁴Loli umuntu wesi yuyo akung'wela amizi ghagho inkwiza pakumupa atakwiza pakubapo nalumo-lumo ni nyota. Amizi ghagho inkwiza pakumupa ghakwiza pakuba mumwache ngati yo mbwibwi iya mizi amapela bumi nukumupa ubumi ubwa bwila na bwila.”

¹⁵Umukolo akati, “Wee Mwene, umpeko amizi ghanagha kokuti intakize numilwepo nalumo-lumo pamo pakusemba amizi panapa.”

¹⁶U Yesu akamubuzya umukolo yula ukuti, “Bukagha umwitizye umulume wako nukwiza nawe kuno.”

¹⁷Umukolo yula akamula akati, “Inte nawe.” U Yesu akamula akati, “Wanena ubwanaloli bo ukunena ukuti ute nawe.

¹⁸Wasendiwa na banavuli fayivi, sona umwanavuli yuyo uli nawe pakabalilo aka ate mulume wako. Wambuzya ubwanaloli.”

¹⁹Umukolo akanena kwa Yesu akati, “Wee Mwene, losi ulu nazimanya ukuti we mulaghuzi.

²⁰Abanyenya bitu bakamuchindikilagha u Chala pighamba linili, loli mwe ba Yuda mukuti mu Yelusalemu bo buyo bubo abantu babaghiye pakumuchindikilaghamo.”

²¹U Yesu akamubuzya umukolo yula akati, “Wee mukolo unyitikaye, akabalilo kakwiza kako mutakwiza pakumuchindikagha Utata pighamba linili, pamo mu Yelusalemu.

²²Amwe mwe ba Samaliya mutamumenye yuyo mukumuchindika, loli aswe twe ba Yuda tumenye yuyo tukumuchindika pakuti ubupoki bukufumila mu ba Yuda.

²³Loli akabalilo kakwiza, sona kizite kale pakuti babo bakumuchindika mubwanaloli bakwiza pakumuchindikagha Utata na maka agha Muzimu Umuzelu na mubwanaloli. Pakuti u Chala akubalonda abantu banaba pakumuchindika.

²⁴U Chala we muzimu, po bosi babo bakumuchindika, bamuchindikaye na maka agha Muzimu Umuzelu na mubwanaloli.”

²⁵Umukolo akanena nawe akati, “Inzimenye ukuti u Mesiya akwiza, po bo iza, akwiza pakutubuzya vyosi.”

²⁶U Yesu akamwamula akati, “Yuyo ukunena nawe, we yuyo.”

²⁷Pakabalilo kala-kala abamanyili aba Yesu bakanyokako, bakaswigha nkani bo bamwagha akunena nu mukolo. Loli nayumo umuntu yuyo akanena nawe ukuti, “Nkimba ukulonda ichoni?” Pamo ukumulaluzya ukuti, “Nkimba choni chicho ukunena nawe?”

²⁸Umukolo yula akayileka isonta yache, akanyokela mukaya nukunena na bantu ukuti,

²⁹“Twende mwennye umuntu yuyo akambuzya vyosi vivyo nabombagha. Nkimba yunuyu atangaba we Kilisitu?”

³⁰Po bakepamo mukaya mula nukubuka kwa Yesu.

³¹Pakabalilo kanako abamanyili bache bakamulaba u Yesu bakati, “Wee Mumanyisi, lyangapo.”

³²Loli u Yesu akamula akati, “Indi nacho ichakulya chicho mutachimenye.”

³³Po abamanyili bakanda pakulaluzannya bene-bene ukuti, “Nkimba alipo yumo yuyo amwiziye ni chakulya?”

³⁴U Yesu akababuzya akati, “Ichakulya chane ko kubomba ubwighane ubwa yuyo antumite nu kumalizya imbombo yiyo akampa.

³⁵Amwe mukunena ukuti, ‘Kwasyalako bulo amezi folo ukuti akabalilo akakwinulila kakwane.’ Loli inkubabuzya ukuti ennya mumaghunda; ivibyalwa vyela, sona akabalilo akakwinulila kafikiye.

³⁶Yuyo akwinula akupokela amalipilo ghache, sona akubungannya iseke nukubuka nazyo ku bumi ubwa bwila na bwila, kokuti yuyo akubyala na yuyo akwinula basekelele poka.

³⁷Zizyo abantu bakunena zyanaloli ukuti, ‘Yumo akubyala, uyunji akwinula.’

³⁸Inkabatuma pakwinula mumaghunda mumo mutakalimamo. Abantu abanji bo babo bakalimamo, loli amwe mwakabilapo bulo pambombo yabo.”

³⁹Aba Samaliya abinji mukaya kala bakamusubila u Yesu pachifukwa icha mazyu ghagho umukolo yula akanena ukuti, “Ambuzya vyosi vivyo nabombagha.”

⁴⁰Bo aba Samaliya biza kukwache bakamulaba ukuti ikale nabo, po u Yesu akikala kula-kula amasiku mabili.

⁴¹Abinji bakamusubila pachifukwa icha mazyu ghache,

⁴²po bakamubuzya umukolo yula bakati, “Tutakusubila pachifukwa icha vivyo utubuzizye, loli pachifukwa ichakuti twiyivwila twebene kukwache, sona tumenye ukuti uyu Mupoki uwa chisu ichapasi.”

⁴³Bo ghachilapo amasiku mabili, u Yesu akabuka kuchigaba icha Galileya.

⁴⁴Pakuti u Yesu umwenecho akati, “Umulaghuzi atakuchindikiwa mukaya kache.”

⁴⁵Bo afika mu Galileya, abantu mula-mula bakamupokela pakuti bakavyennya vyosi vivyo akabomba mu Yelusalemu pa Ulusekelo ulwa Pasa pakuti bope bakabapo pa Ulusekelo lula.

⁴⁶Po u Yesu akanyokela mu Kana muchigaba icha Galileya, kuko akandula amizi pakuba we vinyo. Ikambala limo ilya mwene, lilyo umwana wache akabinagha mukaya aka Kapelinahumu likaba pala-pala.

⁴⁷Bo lyivwa ukuti u Yesu izite mu Galileya ukufuma mu Yudeya, akabuka kukwache nukumulaba ukuti abuke nawe mu Kapelinahumu nukumupozya umwana wache yuyo akaba papipi pakufwa.

⁴⁸U Yesu akanena nawe akati, “Nayumo umuntu mumwinyu yuyo akwiza pakusubila pene papo mwennya ivimanyilo ni viswigho.”

⁴⁹Ikambala likamula likati, “Wee Mwene, twende twebosi bo nu mwana wane atafuye.”

⁵⁰U Yesu akanena nawe akati, “Bukagha, umwana wako akwiza pakupola.” Umuntu yula akasubila zizyo u Yesu akanena nukubuka.

⁵¹Bo ali muzila akubwela akakomana na bambombo bache nukumubuzya ukuti, “Umwana wako apolite.”

⁵²Akabalaluzya akabalilo kako umwana wache akapolela. Bakamwamula bakati, “Izegema yikamuleka mumabwila na kabalilo aka wanu koloko pamusanya.”

⁵³Po uwise akakumbuka ukuti kakaba kabalilo kako u Yesu akamubuzya ukuti, “Umwana wako akwiza pakupola.” Po yuyo na bosi aba munyumba yache bakasubila.

⁵⁴Ichi chikaba ichika ichabubili chicho u Yesu akabomba bo iza mu Galileya ukufuma mu Yudeya.