Read lambya YOHANI 9 Bible Online

YOHANI 9 - lambya bible

YOHANI 9

¹Bo u Yesu akwenda, akamwennya umuntu yuyo akapapiwa mufwamaso.

²Abamanyili bache bakamulaluzya bakati, “Wee Mumanyisi, nkimba we wenu akananga ukuti umuntu yunuyu apapiwe mufwamaso? Nkimba we yuyo akananga, pamo abapapi bache?”

³U Yesu akabamula akati, “Atakaba we yuyo yunuyu, pamo abapapi bache babo bakananga. Loli akapapiwa mufwamaso ukuti amaka agha Chala ghabonekelemo mumwache.

⁴Bo kuchili musanya, tubaghiye pakubomba imbombo iya yuyo akantuma. Ubusiku bukwiza bubo nayumo umuntu atangabomba imbombo.

⁵Bo inchili indi muchisu ichapasi, ane ne lukozyo ulwa chisu ichapasi.”

⁶Bo amala pakunena zinizi, u Yesu akafwina amati pasi, akakantannya itope na mati ghala, po akaghapaka ni tope amaso agha umuntu yula,

⁷nukumubuzya ukuti, “Bukagha usukusule kumaso pachiziba icha Silowamu.” (Silowamu chikung'anamula ukuti Umutumiwa). Po umuntu yula akabuka nukusukusula kumaso, po akanyokela bo akwennya.

⁸Abapalamani bache na bantu babo bakamwennyanga bwila bo akulaba-laba bakalaluzya bakati, “Nkimba uyu ate we yuyo akikalagha pasi nukulaba-laba?”

⁹Bamo bakati, “We yunuyu.” Abanji bakati, “Awe, ayanite bulo nawe.” Po umwene akababuzya akati, “Nene.”

¹⁰Abene bakamulaluzya bakati, “Nkimba amaso ghako ghighukite buli-buli?”

¹¹Umwene akabamula akati, “Umuntu yuyo bakuti Yesu, akakanta itope nukumpaka kumaso; akambuzya akati, ‘Bukagha usukusule kumaso pachiziba icha Silowamu. Inkabuka nukusukusula kumaso, po inkagha nanda pakwennya.’ ”

¹²Abene bakamulaluzya bakati, “Nkimba ali ko kwiyi umwene?” Akabamula akati, “Intamenyeko.”

¹³Po bakabuka nawe mu ba Falisayi umuntu yuyo kale akaba mufwamaso.

¹⁴Likaba Lisiku Ilyakutuzya lilyo u Yesu akakanta itope nukumupozya umuntu yula.

¹⁵Aba Falisayi bope bakamulaluzya umuntu yula namumo amaso ghache ghakighukila. Po umwene akababuzya akati, “Akampaka itope mumaso ghane, inkasukusula kumaso, po ilelo inkwennya.”

¹⁶Aba Falisayi bamo bakati, “Umuntu uyu atafumite kwa Chala pakuti akunangannya ululaghilo ulwa Lisiku Ilyakutuzya.” Abanji bakati, “Nkimba umuntu uwa mbibi angabomba buli-buli ivimanyilo vinivi?” Po bakagabinkana bene-bene.

¹⁷Po aba Falisayi bakamulaluzya sona umuntu yula bakati, “Ukuti akakwighula amaso, mute momumo, po nkimba ukuti choni nizya muntu yunuyu?” Umuntu yula akabamula akati, “We mulaghuzi.”

¹⁸Loli abalaghili aba Chiyuda batakalondagha pakusubila ukuti akaba mufwamaso, sona ilelo akwennya, mupaka bakabitizya abapapi bache

¹⁹nukubalaluzya ukuti, “Nkimba uyu mwana winyu, yuyo mukuti akapapiwa mufwamaso? Po ilelo akwennya buli-buli?”

²⁰Abapapi bache bakamula bakati, “Tuzimenye ukuti uyu mwana witu, sona tuzimenye ukuti akapapiwa mufwamaso.

²¹Loli namumo ghighukiye amaso ghache zyo tutazimenye, sona na wepe yuyo akamwighula amaso tutamumenye. Mumulaluzye yuyo pakuti we umuntu usongo, angiyamulila mwene.”

²²Abapapi bache bakanena izi pachifukwa ichakuti bakabanyilagha abalaghili aba Chiyuda, babo bakivwana kale ukuti umuntu wesi yuyo akasubila ukuti u Yesu we Kilisitu, akwiza pakwepusiwa munyumba iyakwiputilamo.

²³Ichi cho chifukwa abapapi bache bakanena bakati, “We umuntu usongo, mumulaluzye mwene.”

²⁴Po bakamwitizya sona ulwabubili umuntu yuyo akapapiwa mufwamaso nukumubuzya ukuti, “Lapa pamaso pa Chala ukuti ukwiza pakunena ubwanaloli. Aswe tuzimenye ukuti umuntu yuyo akakwighula amaso ghako wambibi.”

²⁵Umuntu yula akamula akati, “Ane izyakuti wambibi pamo ate wambibi intazimenye. Ichintu choka chicho inchimenye ichakuti inkaba mufwamaso, loli ilelo inkwennya.”

²⁶Bakamulaluzya bakati, “Nkimba abombite izya choni kukwako? Akwighuye buli-buli amaso ghako?”

²⁷Akabamula akati, “Imbabuzizye kale, loli mutalondagha ukwivwa. Nkimba choni chicho mukulonda ukwivwa sona? Pamo namwe bulo mukulonda pakuba bamanyili bache?”

²⁸Abene bakamutuka bakati, “Awe we mumanyili uwa muntu uyu, loli aswe twe bamanyili aba Mozesi.

²⁹Aswe tuzimenye ukuti u Chala akanena nu Mozesi, loli izya muntu uyu tutazimenye, sona na kuko afuma tutamenyeko.”

³⁰Umuntu yula akamula akati, “Izi zyakuswighizya nkani ukuti amwe mutamenyeko kuko umuntu uyu afuma, loli akanyighula amaso.

³¹Aswe tuzimenye ukuti u Chala atakwamula inyiputo izya bambibi, loli akwamula inyiputo izya bantu babo bakumuchindika nukubomba zizyo akulonda.

³²Ukwandila ko kubwandilo ubwa chisu ichapasi, tutivuyepo nalumo-lumo ukuti kukabako umuntu weka yuyo akighula amaso agha umuntu yuyo akapapiwa mufwamaso.

³³Nanti umuntu uyu atakafumagha kwa Chala, atangabomba nachimo-chimo.”

³⁴Abene bakamula bakati, “Awe ukapapiwa nukukulila mumbibi, nkimba ilelo ukulonda ukutumanyizya aswe?” Po bakamwepuzyamo munyumba iyakwiputilamo.

³⁵U Yesu akivwa ukuti umuntu yula bamwepuzyamo munyumba iyakwiputilamo, sona bo amwagha akamulaluzya akati, “Nkimba ukumusubila u Mwana uwa Muntu?”

³⁶Umuntu yula akamula akati, “Mwene, mbuzya we wenu umuntu yunuyu, umwakuti nane imusubile.”

³⁷U Yesu akamubuzya akati, “Umwenizye kale, po yuyo akunena nawe we yuyo.”

³⁸Po akati, “Mwene, inkusubila.” Akamufughamila u Yesu nukumuchindika.

³⁹U Yesu akati, “Inkiza muchisu ichapasi pano pakulonga, umwakuti abafwamaso bennye, sona babo bakwennya babanje bafwamaso.”

⁴⁰Aba Falisayi bamo babo bakaba nawe pala-pala bakivwa amazyu ghache nukumulaluzya ukuti, “Nkimba ukung'anamula ukuti naswe bulo twe bafwamaso?”

⁴¹U Yesu akabamula akati, “Nanti mukabanga bafwamaso, ngali mute mwe bambibi. Loli pakuti mukwinena mwebene ukuti, ‘Tukwennya,’ chikung'anamula ukuti muchili mwe bambibi.”