Read lambya IMBOMBO IZYA BATUMIWA 1 Bible Online

IMBOMBO IZYA BATUMIWA 1 - lambya bible

IMBOMBO IZYA BATUMIWA 1

¹Muchindikiwa Tiyofilasi: Mwibuku lyane ilyakwanda inkakusimbila nizya vintu vyosi vivyo u Yesu akabomba nukumanyizya ukwandila pakabalilo kako akandagha imbombo yache

²mupaka pisiku lilyo akasendiwanga pakubuka kumwanya. Loli bo atasendiwe, akababuzya na maka agha Muzimu Umuzelu abatumiwa babo akabasala izyakubomba.

³Bo amayimba ghache ghamala, u Yesu akababonekela mumasiku 40 mutubalilo utwinji, pakubasimikizya ukuti naloli akaba mumi. Abene bakamwennya, po akanena nabo nizya Bumwene ubwa Chala.

⁴Bo babungana poka,[1] u Yesu akababuzya akati, “Mutakepemo mu Yelusalemu, loli mulindililaye ichabupi chicho inkababuzya, chicho Utata wane akabalayizya.

⁵U Yohani akozyanga na mizi, loli mumasiku amanandi mukwiza pakoziwanga nu Muzimu Umuzelu.”

⁶Bo abatumiwa babungana poka nu Yesu, bakamulaluzya bakati, “Mwene, nkimba pakabalilo aka utangabanyosezya sona Ubumwene aba Izilayeli?”

⁷U Yesu akababuzya akati, “Utubalilo na masiku tukuyaniziwa nu bulaghili ubwa Tata, sona yite mbombo yinyu pakumanya ukuti zinizi zikwiza pakubombiwa liyi.

⁸Loli bo u Muzimu Umuzelu iza papinyu, mukwiza pakupokela amaka, po mukwiza pakuba mwe bakaboni bane mu Yelusalemu, na mu Yudeya mosi, sona na mu Samaliya, mupaka na kumpaka iya chisu ichapasi.”

⁹Bo anena zinizi, akasendiwa pakubuka kumwanya bo bakumwenelezya, po akafisiwa ni bingu.

¹⁰Bakaba bachili bakwennya kumwanya bo akubuka, po umwakuchenusya bulo abanavuli babili, babo bakavwala amenda amaswepu bakimilila papipi nabo,

¹¹nukubalaluzya ukuti, “Mwee bantu aba mu Galileya, choni chicho mwimiliye panapo mukwennya kumwanya? U Yesu yunuyu yuyo akasendiwa kukwinyu ukubuka kumwanya akwiza pakunyokela bunubu, ukuyana na mumo mukamwenezezya akubuka kumwanya.”

¹²Po abatumiwa bakanyokela ku Yelusalemu ukufuma kwighamba ilya Misyunguti. Ubutali bwache bukaba amatamba 1,000 ukufuma mu Yelusalemu.

¹³Bo binjila mukaya akakulu nkani kala bakakwela muchipinda icha pamwanya mumo bakikalagha. Mula-mula mukaba u Pitala, nu Yohani, nu Yakobo, nu Andeleya, nu Filipu, nu Tomasi, nu Batolomeyo, nu Matayi, nu Yakobo umwana uwa Alufeyo, nu Simoni (yuyo akaba uwa kabukatila, kako kakalondagha ukuti mu Izilayeli mubanje ubwabuke), sona nu Yudasi umwana uwa Yakobo.

¹⁴Bakabunganagha pipi-pipi pakwiputa ngati ko kabukatila, poka na bakolo nu Maliya unyina uwa Yesu, sona na bawamwabo.

¹⁵Bo ghachilapo amasiku manandi kukaba ulukomano ulwa bitiki. Pala-pala pakabapo abantu ngati we 120 bosi poka, po u Pitala akimilila nukuti,

¹⁶“Mwee bakamu bane, Amasimbo ghakwanilisiwe, ghagho u Muzimu Umuzelu akanena ukwendela mwa Devedi nizya Yudasi, yuyo akalongozya abantu babo bakamulema u Yesu.

¹⁷U Yudasi akaba yumo uwa kabukatila kitu, yuyo akasaliwa pakubomba poka naswe.

¹⁸Akaghula umughunda ni ndalama zizyo akapokela pachifukwa icha mbibi zizyo akabomba. Panapo akawila umutu, ulwanda lwache lukapunta, sona amala ghache ghakafumila kuzi.

¹⁹Abantu bosi babo bakikalagha mu Yelusalemu bakivwa zinizi, po muneno yabo bakawita umughunda ghula-ghula ukuti ‘Akelidama,’ chicho chikung'anamula ukuti, ‘Umughunda uwa ibanda.’

²⁰Pakuti zisimbiwe mwa Masalimo ukuti, ‘Yileke inyumba yache yibanje chisami; nayumo umuntu atakikalayemo.’ Zisimbiwe sona ukuti, ‘Umuntu yumo apyane imbombo yache.’

²¹“Po chikulondiwa pakusala umuntu weka uwa banavuli, babo babanga poka naswe akabalilo kosi kako u Mwene u Yesu akendagha naswe

²²ukwanda pakabalilo kako akoziwa nu Yohani mupaka pisiku lilyo akasendiwanga pakubuka kumwanya. Pakuti weka uwa banaba abanje we kaboni nizya kuzyuka kubufwe ukwa Yesu.”

²³Po bakasala abanavuli babili: U Jozefu yuyo bakamwitizyanga ukuti Balasabasi (yuyo sona bakamwitizyanga ukuti Yusito) nu Matiyasi.

²⁴Po bakiputa ukuti, “Wee Mwene, uzimenye inyinong'ono izya muntu wesi, po tulanjizye weka pa babili aba yuyo umusalite,

²⁵umwakuti apyane pambombo iya butumiwa mubuyo ubwa Yudasi, yuyo akayileka nukubuka kubuyo bubo bukamuyana.”

²⁶Po bakapanga amayele pakasi pa bantu babili bala nukusalapo u Matiyasi, yuyo akonjeleziwa ku kabukatila aka batumiwa 11 bala.