Read lambya IMBOMBO IZYA BATUMIWA 11 Bible Online

IMBOMBO IZYA BATUMIWA 11 - lambya bible

IMBOMBO IZYA BATUMIWA 11

¹Abatumiwa poka na bitiki abanji aba mu Yudeya bakivwa ukuti abantu babo bate ba Yuda bope bakapokela amazyu agha Chala.

²Bo u Pitala abuka ku Yelusalemu, akabukatila kako kakitikizyanga ukuti abantu babo bate ba Yuda basilimuliwe, bakamususya bakati,

³“Ukaba muyeni munyumba iya bantu babo bate ba Yuda babo batasilimuliwe nukulya poka nabo!”

⁴Po u Pitala akabalingannya vyosi vivyo vikabombiwa ukwandila ko kubwandilo akati,

⁵“Bo inkwiputa mukaya akakulu nkani aka Yopa, inkennya ichisetuka. Inkennya ichintu chimo chicho chikaboneka ngati cho chimwenda ichikulu, chicho chikalemiwa munkuto zyache zyosi folo chikwika kumwanya nukwima papipi nane.

⁶Inkenelezya mukasi papipi nukwennya ivinyamana ivitekiwa, ni vyamuzi, ni vyakwavula, sona ni viyuni.

⁷Po inkivwa izyu likunena nane likuti, ‘Pitala nyamuka! Ghogha ulye.’

⁸Loli inkamula inkati, ‘Mwene, awe! Intaliye nalumo-lumo ichintu chicho chamwiko sona chinyazu.’

⁹Izyu likivwika sona kumwanya likati, ‘Chicho u Chala achipaghula ukuti chizelu, utakinong'onaye ukuti chinyazu.’

¹⁰Zinizi zikabombiwa katatu, pabumalilo ichimwenda chila chikasendiwa pakunyokela kumwanya.

¹¹Pakabalilo kala-kala abantu batatu babo bakatumiwa kukwane ukufuma mu Kesaliya bakafika panyumba papo[8] inkikalagha.

¹²U Muzimu Umuzelu akambuzya ukuti imbuke nabo umwakusita ukuzyela-zyela. Abitiki abamwitu sikisi aba mu Yopa bakaba poka nane mu Kesaliya, po twebosi tukabuka nukwinjila munyumba iya Kolineliya.

¹³Akatubuzya mumo akamwenezezya uwantumi uwa kumwanya imiliye munyumba yache, yuyo akamubuzya akati, ‘Tuma umuntu ku Yopa ukuti amwitizye umuntu yumo, yuyo itabwa lyache we Simoni Pitala.

¹⁴Akwiza pakubabuzya amazyu ghagho ghakwiza pakukupoka awe ni mbumba yako yosi.’

¹⁵Bo nanda pakunena, u Muzimu Umuzelu akikila papabo ukuyana na mumo zikabela naswe pabwandilo.

¹⁶Panapo inkakumbuka zizyo u Mwene akanena ukuti, ‘U Yohani akozya na mizi, loli awe ukwiza pakozya nu Muzimu Umuzelu.’

¹⁷Po nanti u Chala akabapa abantu babo bate ba Yuda ichabupi ichakuyana bulo na chicho akatupa aswe bo tusubiye mwa Mwene u Yesu Kilisitu, polelo ane ne wenu ukuti ningamususya u Chala!”

¹⁸Bo bivwa zinizi, bakaleka pakumususya. Bakamupala u Chala ukuti, “Po u Chala abapiye bope abantu babo bate ba Yuda ulusako ulwakupinduka nukuzileka mbibi zyabo nukupokela ubumi.”

¹⁹Abitiki bamo babo bakanyampana pachifukwa icha kuvwimiwa kuko kukabako pakabalilo kako u Sitefani akaghoghiwa, bakabuka mupaka mutwaya utwa Fonike, mu Sayipulasi, na mu Antiyokiya, pakulumbilila amazyu agha Chala pakasi pa ba Yuda bene.

²⁰Loli abitiki abanji, babo bakafuma ku Sayipulasi na ku Kileni, bakabuka ku Antiyokiya nukunena na bantu babo bate ba Yuda pakulumbilila kukwabo Amazyu Amiza agha Mwene u Yesu.

²¹Amaka agha Mwene ghakaba nabo, po bantu abinji bakasubila nukupindukila kwa Mwene.

²²Ichipanga icha mu Yelusalemu chikivwa zinizi, po bakamutuma u Balanabasi ku Antiyokiya.

²³Bo afika nukwennya mumo u Chala abasayila abantu, akahoboka nkani nukubalaba bosi ukuti bendelele pakusubila mwa Mwene na moyo ghabo ghosi.

²⁴U Balanabasi akaba muntu mugholosu, yuyo akizula nu Muzimu Umuzelu nu lwitiko, sona abantu abinji nkani bakapindukila kwa Mwene.

²⁵Po u Balanabasi akabuka ku Talisa pakumulonda u Sabuli.

²⁶Bo amwagha akabuka nawe ku Antiyokiya, po umwaka umupuma abantu babili bala bakakomana na bantu muchipanga nukumanyizya ichilundilo ichikulu icha bantu. Mukaba mo mu Antiyokiya mumo abitiki bakanda pakwitiziwa ukuti bo bakilisitu.

²⁷Akabalilo kala-kala abalaghuzi bamo bakafuma ku Yelusalemu nukubuka ku Antiyokiya.

²⁸Yumo uwa balaghuzi bala, yuyo akaba we Agabasi, akimilila na maka agha Muzimu Umuzelu akalaghula ukuti izala inkali yikaba papipi pakuwa muchisu chosi ichapasi. (Naloli yikawa pakabalilo aka Mwene u Kalabudiyasi)

²⁹Abamanyili bakivwana ukuti umuntu wesi abatumile abitiki abamwabo ubwavwilizi bosi bubo angaba nabo, babo bakikalagha muchigaba icha Yudeya.

³⁰Bakabomba zinizi, po bakabatumila ubwavwilizi bula abasongo aba chipanga ukwendela mwa Balanabasi nu Sabuli.