Read lambya IMBOMBO IZYA BATUMIWA 12 Bible Online

IMBOMBO IZYA BATUMIWA 12 - lambya bible

IMBOMBO IZYA BATUMIWA 12

¹Akabalilo ngati ko kanaka u Mwene u Helodi[9] akanda pakuchivwima ichipanga.

²Akalamula ukuti u Yakobo uwamwabo uwa Yohani aghoghiwe nu panga.

³Bo ennya ukuti ichi chabahobosya nkani aba Yuda, akamupinya u Pitala (Ichi chikabombiwa pa Lusekelo ulwa Chibama ichisita chilungo.)

⁴Bo amupinya u Pitala, akamwighalila mujele, mumo akabikiwa munyobe izya tubukatila folo utwa basikali ukuti bamwenelezyanje. U Helodi akalondagha ukuti inongwa yache yilongiwe bo Ulusekelo ulwa Pasa lwachila.

⁵Po u Pitala akasungiwa mujele, loli ichipanga chikamwiputilagha nkani kwa Chala.

⁶Bukaba ubusiku ubwakuti u Helodi alonge inongwa yache, u Pitala akaghona utulo pakasi pa basikali babili bala. Akapinyiwa ni mpingu zibili, sona pamulyango uwa jele pakaba abasikali.

⁷Umwakuchenusya uwantumi uwa kumwanya uwa Mwene akimilila pala-pala, ulukozyo lukalama mujele mula. Uwantumi yula akamuyingannya u Pitala pachipungo, akamunyamusya nukuti, “Lubilo-lubilo! Nyamuka!” Panapo na panapo impingu zikawa munyobe izya Pitala.

⁸Po uwantumi yula akati, “Pinya ulamba wako nukuvwala inkwato zyako. U Pitala akabomba zizyo akamubuzya.” Po uwantumi akati, “Vwala inkazo yako nukunkonka.”

⁹U Pitala akamukonka ukufuma mo mujele mula. Loli atakazyaghannya zizyo uwantumi akabombagha nanti zikaba zyanaloli. Akinong'onagha ukuti akwennya ichisetuka.

¹⁰Bakakachila akabukatila akakwanda aka basikali, nukupululila sona akabukatila akabubili mupaka pamulyango uwa chela uwakwinjilila mukaya kala. Umulyango ghula ghukighuka wene, po abene bakafuma kuzi nukwenda mupaka mumusebo ghumo uwa kaya kala-kala. Umwakuchenusya uwantumi yula akamuleka u Pitala.

¹¹Po u Pitala akazyaghannya zizyo zikabombiwa kukwache nukuti, “Ilelo nazimanya ukuti zyanaloli! U Mwene akatuma uwantumi wache ukuti ize ampoke kwa Helodi na vyosi vivyo aba Yuda bakinong'onagha ukuti vikwiza pakubombiwa kukwane.”

¹²Bo azyaghannya zinizi, akabuka kunyumba iya Maliya, unyina uwa Yohani Maliko, kuko abantu abinji bakabungana, sona bakiputagha.

¹³U Pitala akakong'osya pamulyango uwakuzi, po uwambombo umulindu yuyo akaba we Loda akiza pakumwighulila.

¹⁴Bo aghamanya amazyu agha Pitala akahoboka nkani, umwakuti atakighula nu lwiyi, loli akachimbilila mukasi nukubabuzya abamwabo ukuti u Pitala imiliye kuzi.

¹⁵Bakamubuzya u Loda bakati, “Upenite bati!” Loli akendelela pakunena ukuti zikaba zyanaloli. Po bakamula bakati, “Wantumi wache!”

¹⁶Loli u Pitala akendelela pakukong'osya. Pabumalilo bakighula ulwiyi, po bo bamwennya chikabaswighizya nkani.

¹⁷Akapumizya ichongo ni nyobe nukwanda pakubalingannya mumo u Mwene amwefezizye mujele. Akanena sona akati, “Mumubuzye zinizi u Yakobo, sona na bitiki bosi.” Po akanyamuka nukubuka kubuyo ubunji.

¹⁸Bo kwacha, kukaba ukuvulungana ukukulu nkani mu basikali nukulaluzannya bene-bene ukuti, “Nkimba cho choni chicho chabombiwa kwa Pitala?”

¹⁹U Helodi akalamula ukuti bamulondelezye, loli batakamwagha. Po abalindilili bakalalusiwa na malaluzyo nukulamuliwa ukuti abene bo babo baghoghiwe. Pisinda pazinizi, u Helodi akepamo muchigaba icha Yudeya nukubuka mu Kesaliya pakwikala.

²⁰U Helodi akakalala nkani na bantu aba mu Tili nu Sidoni. Po abantu bakabuka pakabukatila pakumulamuka. Ichakwanda bakamudeba u Bulasita, usongo uwa kunyumba iya bumwene, ukuti abavwe. Po bakabuka kwa Helodi pakulaba umutende pakuti ichakulya chabo chikafumagha kuchisu icha mwene yula-yula.

²¹Pisiku lilyo bakasala, u Helodi akavwala inkazo yache iya bumwene, akikala pachitengo chache icha bumwene nukunena na bantu.

²²Abantu bakakolomoka nkani bakati, “Yuyo akunena, ate muntu, loli we chala!”

²³Panapo na panapo uwantumi uwa Mwene akamukoma u Helodi pakuti atakachindika u Chala. Isomi zikamulya nukufwa.

²⁴Loli amazyu agha Chala ghakendelela pakufumusiwa.

²⁵Bo u Balanabasi nu Sabuli bamala imbombo yabo yiyo bakabatumila mu Yelusalemu bakanyokela mu Antiyokiya, sona bakamusenda u Yohani Maliko.