Read lambya IMBOMBO IZYA BATUMIWA 14 Bible Online

IMBOMBO IZYA BATUMIWA 14 - lambya bible

IMBOMBO IZYA BATUMIWA 14

¹Ichintu chinichi chikabombiwa sona mu Ikoniya. U Pabuli nu Balanabasi bakabuka munyumba iyakwiputilamo iya ba Yuda nukunena na maka, umwakuti aba Yuda, sona na bantu babo bate ba Yuda abinji bakasubila.

²Loli aba Yuda babo batakasubila, bakabasonjelezya abantu babo bate ba Yuda ukuti bababenge abitiki.

³U Pabuli nu Balanabasi bakikala kula-kula akabalilo akatali, pakunena nu bujivu nkani izya Mwene, yuyo akasimikizya nizya chisa chache pakubapa amaka aghakubombela ivimanyilo ni viswigho.

⁴Abantu aba mukaya akakulu nkani kala bakagabinkana; bamo bakaba kulubazu ulwa ba Yuda, sona abanji kulubazu ulwa batumiwa.

⁵Po abantu bamo babo bate ba Yuda na ba Yuda, poka na balongozi babo bakabatika ukuti babayivye abatumiwa nukubasumba na mabwe.

⁶Bo abatumiwa bamanya zinizi bakachimbilila mukaya akakulu nkani aka Lisitila na ka Delibe muchigaba icha Likaboniya, sona na muvigaba vivyo vizyunguliye.

⁷Kula-kula bakalumbilila Amazyu Amiza.

⁸Mu Lisitila mukabamo umuntu yuyo afuye ivinama, sona atenditepo nalumo-lumo ukwandila ko kubwana wache.

⁹Akikala mula-mula nukuteghelezya amazyu agha Pabuli. U Pabuli akamwenelezya umuntu yula nukwennya ukuti akaba nu lwitiko ulwakuti angapola nalo.

¹⁰Po akati, “Imilila, gholosya ivinama vyako!” Umuntu yula akanyela nukwanda pakwenda-kwenda.

¹¹Bo ichilundilo chennya zizyo u Pabuli akabomba, chikanda pakukolomoka muneno yabo iya Chilikaboniya ukuti, “Abachala batwikila ngati po bantu!”

¹²Bakamwita u Balanabasi ukuti we Zebusi, sona u Pabuli bakamwita ukuti we Helemesi pakuti akaba we yuyo akalongolelagha pakunena.

¹³Inyumba iyakwiputilamo u chala u Zebusi yikaba kuzi kukaya akakulu nkani, po umuputi uwa kunyumba yila akiza ni nkambaku na maluba pamulyango uwa lupaso pakuti yuyo ni chilundilo bakalondagha pakubika ivyabupi ku batumiwa.

¹⁴Bo u Balanabasi nu Pabuli bivwa zizyo bakalondagha ukuti babombe, bakazepula amenda ghabo nukuchimbilila pakasi pachilundilo, bakakolomoka nkani bakati,

¹⁵“Mwebaya mwee, choni chicho mukubomba zinizi? Aswe twe bantu bulo ngati mwemwe! Tuli pano pakulumbilila kukwinyu Amazyu Amiza, ukuti muvileke ivintu ivibibi nukumukonka u Chala umumi, yuyo akapela kumwanya, ni chisu ichapasi, ni nyanja, sona na vyosi vivyo vili mumo.

¹⁶Kale u Chala akabitikizya abantu bosi pakubomba imbombo zyabo zizyo bakinong'ona ukuti ngolosu.

¹⁷Loli akusimikizya ukuti akabako kale pavintu ivyiza vivyo akubomba. U Chala akubapa ivula ukufuma kumwanya ni nyinulo pakabalilo kache akiza; akubapa ichakulya nukwizuzya amoyo ghinyu nu buhobosu.”

¹⁸Napapo abatumiwa bakanena amazyu ghanagha, bakapotwa pakuchikanizya ichilundilo pakubapa ivyabupi.

¹⁹Aba Yuda bamo abakufuma mu Antiyokiya, mu Pisidiya, sona na mu Ikoniya bakiza nukuchisonjelezya ichilundilo icha bantu chila. Po abantu bakamusumba u Pabuli na mabwe nukumuwesela kuzi ukwa kaya kala, ichifukwa bakinong'onagha ukuti afwa.

²⁰Loli bo abamanyili bamubunganila, akanyamuka nukunyokela mukaya mula. Indabi yache, yuyo nu Balanabasi bakabuka ku Delibe.

²¹Bo u Pabuli nu Balanabasi balumbilila Amazyu Amiza mu Delibe nukukaba abitiki abinji, bakanyokela mu Lisitila, na mu Ikoniya, sona na mu Antiyokiya muchigaba icha Pisidiya.

²²Bakabakazya abamanyili bala, sona bakababuzya ukuti bendelele pakuba nu lwitiko mwa Kilisitu. Bakamanyizya bakati, “Tubaghiye twende muntamyo inyinji ukuti twinjile mu Bumwene ubwa Chala.”

²³Muchipanga chosi bakasala abasongo aba chipanga. Ni nyiputo, sona nukutuzya pakulya bakababika munyobe izya Mwene, yuyo bakasubila.

²⁴Bo badumusannya muchigaba icha Pisidiya, bakafika muchigaba icha Pamfiliya.

²⁵Kula-kula bakalumbilila Amazyu Amiza pakasi pa bantu mukaya akakulu nkani aka Peliga, po akabuka kukaya akakulu nkani aka Ataliya.

²⁶Pabumalilo bakanyokela mu Antiyokiya mubwato, ubuyo bubo bakapeghiwa munyobe izya Chala ukuti abasaye pambombo yabo, yiyo bafuma bulo pakuyimalizya.

²⁷Bo bafika mu Antiyokiya, bakachibungannya poka ichipanga nukuchibuzya zyosi zizyo u Chala ababombela, sona na mumo ighuliye izila pakasi pa bantu babo bate ba Yuda ukuti basubile.

²⁸Po kula-kula bakikala poka na bamanyili akabalilo akatali.