Read lambya IMBOMBO IZYA BATUMIWA 28 Bible Online

IMBOMBO IZYA BATUMIWA 28 - lambya bible

IMBOMBO IZYA BATUMIWA 28

¹Bo twapona nukufika pisila, tukamanya ukuti itabwa ilya kasungo kala kakaba ko ka Melita.

²Abantu aba pa kasungo kala bakaba bachisa nkani kukwitu nukutupokela akiza. Bakatupembela umoto ukuti tote pakuti ivula yikatima, sona kukakatala nkani.

³U Pabuli akatenya umuzigho uwa nkwi nukuzisonkezya pamoto, po injoka yikafuma mumuzigho mula pachifukwa icha butukizu. Yikamuluma nukumukakatila inyobe.

⁴Abantu bala bakayennya injoka yikwelela kunyobe iya Pabuli nukwanda pakunenezannya ukuti, “Naloli umuntu uyu livyondongo. Napapo akapona panyanja, loli u Chala wanaloli atakitikizya ukuti abanje nu bumi.”

⁵Loli u Pabuli akayikung'untila injoka yila pamoto ukusita ukuvulaziwa.

⁶Abantu bala bakalindililagha ukuti akwiza pakwizula pamo akwiza pakuwa pasi nukufwa lubilo-lubilo. Loli bo balindilila akabalilo akatali ukusita ukumubonekela chimo ichiyeni bakanyosyako inyinong'ono zyabo nukuti, “Umuntu uyu ko ka chala!”

⁷Papipi nu buyo bula-bula pakaba amaghunda agha Pubuliya, umulaghili uwa pa kasungo pala. Akatupokela akiza nukwikala naswe amasiku matatu pakuba bayeni bache.

⁸Uwise uwa Pubuliya akalambalala pachitala ichifukwa akabinagha izegema, sona akapelagha ibanda. U Pabuli akinjila mula-mula nukumwiputila, po akabika inyobe papache nukumupozya.

⁹Bo zinizi zyabombiwa, abantu bosi pa kasungo pala bakiza nukupoziwa.

¹⁰Bakatupa ivyabupi ivyinji, sona bo twiyanizye pakunyamuka, bakakwezya ivintu vivyo tukasobelwanga pa bulendo bwitu.

¹¹Bo ghachilapo amezi matatu tukenda pa bwato ubukulu nkani ukufuma mu Alekizandiliya, bubo bakatinji, “Abachala abamapasa,” bubo bukikala pa kasungo pala pachisiku.

¹²Tukafika mukaya akakulu nkani aka Silakusi nukwikalamo amasiku matatu mula-mula.

¹³Ukufuma mula tukenda pa bwato ubukulu nukufika mukaya akakulu nkani aka Legiyamu. Indabi yache impepo iya kuntende yikanda pakukuka, po pisiku ilya butatu tukafika mukaya aka Puteyoli.

¹⁴Tukabagha abitiki bamo mula-mula, babo bakatulaba ukuti twikale nabo usabata. Po tukafika mu Loma.

¹⁵Bo abitiki mu Loma bivwa ukuti tukwiza, bakiza mupaka pa Munalo uwa Apiya, sona ni Nyumba zitatu izya bayeni ukuti bakomane naswe. Bo u Pabuli abennya bulo, akamupalizya u Chala sona ichi chikamukazya nkani.

¹⁶Bo twafika mu Loma, u Pabuli akitikiziwa ukuti ikalaye mwene, loli nu musikali uwakumulindilila.

¹⁷Bo ghachilapo amasiku matatu u Pabuli akabitizya abalongozi aba Chiyuda. Bo babungana, akababuzya akati, “Mwee bakamu bane, napapo intabanangiyepo nachimo-chimo abantu pamo inyiho izya banyenya bitu, loli inkalemiwa mukaya aka Yelusalemu nukubikiwa munyobe izya ba Loma.

¹⁸Bo babuzikizya inongwa yane, abene bakalondagha pakunsatula pakuti batakanyagha ni nongwa iyakuti ingoghiwe nayo.

¹⁹Loli bo aba Yuda basusya ichi, inkafyengiwa bulo pakulaba ukuti inongwa yane yilongiwe nu Kesale, napapo intakaba ni nongwa nayimo-yimo na bantu bane.

²⁰Ichi cho chifukwa inkalaba ukuti inkomane nawe ukuti tunenezannye. Naloli, impinyiwe ni mpingu pachifukwa icha kusubila zizyo aba Izilayeli bakulindilila.”

²¹Bakamula bakati, “Tutapokelitepo abakalata abakufuma muchigaba icha Yudeya abakunena nizya awe. Sona nayumo umuntu mu bakamu bitu yuyo akizapo kuno ukutulingannya pamo ukunena nizya bubibi bwako.

²²Loli tukulonda twiyivwile twebene inyinong'ono zyako pakuti tuzimenye ukuti kosi na kosi abantu bakukanenela ivibibi akabukatila kako.”

²³Po bakivwana nawe isiku ilyakuti bakomane, po ichilundilo icha bantu chikiza pisiku lila-lila kunyumba kuko u Pabuli akikalagha. Akabalingannya nu kunena nabo nizya Bumwene ubwa Chala ukwandila pandabi-ndabi mupaka pabusiku nukuyezya pakubadeba nizya Yesu ukufuma mu mabuku agha Ndaghilo izya Mozesi na mu mabuku agha balaghuzi.

²⁴Zizyo u Pabuli akanenagha, abantu bamo zikabapalamasyanga amoyo, loli abanji batakazisubila.

²⁵Pakuti bakasusannya bene-bene, bakasata bulo. Loli bo batasatanite, u Pabuli akonjelezyapo pakunena ichintu choka ichi ukuti, “U Muzimu Umuzelu akanena ubwanaloli na banyenya binyu bo akunena ukwendela mu mulaghuzi u Yesaya ukuti:

²⁶‘Bukagha nukubabuzya abantu banaba ukuti: Mukwiza pakwivwa nu kwivwa, loli mute mukivwisye, mukwiza pakwennya nu kwennya, loli mute mukenelezye.

²⁷Pakuti amoyo agha bantu banaba makafu nkani. Basindiye amakutu ghabo, sona basizilite amaso ghabo. Papo ngali amaso ghabo ghakwennya, amakutu ghabo ngali ghakwivwa ni nyinong'ono zyabo ngali zikwivwisya po ngali bapindukila kukwane, ngali imbapozizye. Akunena zinizi we Chala.’ ”

²⁸U Pabuli akababuzya akati, “Mubaghiye mumanyaye ukuti u Chala abatumila amazyu aghabupoki abantu babo bate ba Yuda. Abene bakwiza pakughateghelezya!”[23]

³⁰U Pabuli akikala kula-kula amaka mabili munyumba yiyo akilipililagha mwene, sona akabapokela bosi babo bakiza pakumwennya.

³¹Akalumbililagha nizya Bumwene ubwa Chala nukumanyizya izya Mwene u Yesu Kilisitu nu bujivu bosi, sona nu bwabuke.