Read lambya IMBOMBO IZYA BATUMIWA 7 Bible Online

IMBOMBO IZYA BATUMIWA 7 - lambya bible

IMBOMBO IZYA BATUMIWA 7

¹Umuputi Usongo nkani akamulaluzya u Sitefani akati, “Nkimba izi zyanaloli?”

²U Sitefani akamula akati, “Mwee bakamu bane na batata, munteghelezye! Bo umunyenya witu u Abulahamu achili atabukite pakwikala mu Halani, u Chala uwa buchindamu akamubonekela muchisu icha Mesopotamiya

³nukumubuzya ukuti, ‘Baleke abakamu bako ni chisu chako nukubuka kuchisu chicho inkwiza pakukulanjizya.’

⁴Po akepamo muchisi chache icha Akalideya nukubuka pakwikala mu Halani. Bo uwise uwa Abulahamu afwa, u Chala akamusamizya kuchisu chicho mukwikalamo losi ulu.

⁵U Chala atakamupako u Abulahamu na kabuyo nakamo-kamo ukuti kabanje kache na kache, napapo katamba koka, loli u Chala akamulayizya pakumupako ichisu ichi, sona ukuti kabanje kache na kache nu luko lwache. Pakabalilo kako u Chala akamulayizyanga, u Abulahamu atakaba na bana.

⁶Izi zyo zizyo u Chala akamubuzya ukuti, ‘Abaluko lwako bakwiza pakwikala muchisu ichiyeni mumo bakwiza pakuba bazya nukubayivya amaka 400.’

⁷U Chala akanena sona akati, ‘Loli inkwiza pakubafunda abantu babo bakwiza pakubabombelagha ngati bo bazya, pisinda pache abaluko lwako bakwiza pakwepamo muchisu chila-chila nukunyiputa pabuyo ubu.’

⁸U Chala akafingana nu Abulahamu, po ukusilimula kukaba chimanyilo icha lufingo. U Abulahamu akamusilimula u Yisaki, bo pachilapo u sabata weka ukwandila pisiku lilyo akapapiwa. U Yisaki akamusilimula umwana wache u Yakobo; wepe u Yakobo akabasilimula abana bache 12, abanyenya abamanyikwe abaluko lwitu.

⁹“Abana aba Yakobo bakaba na kabini nu wamwabo u Jozefu nukumughulizya ngati we muzya mu Ijiputi. Loli u Chala akaba nawe

¹⁰nukumupoka muntamyo zyache zyosi. Bo u Jozefu aboneka pamaso pa Falabo, u mwene uwa mu Ijiputi, u Chala akamupa inkalo inyiza na mahala. Po u mwene akamubika u Jozefu pakuba mulaghili uwa mu Ijiputi, sona usongo uwa kunyumba iya bumwene.

¹¹Po izala yikawa muchisu chosi icha Ijiputi nicha Kenani, yiyo yikapela amayimba amakulu nkani, umwakuti abanyenya bitu bakapotwa pakuchagha ichakulya.

¹²Bo u Yakobo ivwa ukuti mu Ijiputi mukaba ichakulya, akabatuma abana bache, abanyenya bitu. Ubu bukaba bulendo bwabo ubwakwanda.

¹³Pabulendo bwabo ubwabubili u Jozefu akilanjizya mwene ku bawamwabo, po u Falabo akamanya nizya mbumba iya Jozefu.

¹⁴Po u Jozefu akatuma intumi kwa wise u Yakobo, pakumubuzya ni mbumba yache yosi, babo bosi poka bakaba abantu 75 ukuti bize mu Ijiputi.

¹⁵Po u Yakobo akabuka mu Ijiputi mumo yuyo na bana bache bakafwila.

¹⁶Imivimba yabo bakayinyamulila mu Shekemu, mumo bakayisyila mwipumpa, lilyo u Abulahamu akaghula ku bana aba Hamoli ni ndalama.

¹⁷“Bo akabalilo kakwana akakuti u Chala abombe zizyo akamulayizya u Abulahamu, abantu bitu mu Ijiputi bakabala nkani.

¹⁸Pabumalilo u mwene yuyo atakazimanya nizya Jozefu akanda pakulaghila mu Ijiputi.

¹⁹Akabenda pasi abanyenya bitu nukubayivya pakubafyenga ukuti babaleke ababonda babo kuzi kutwaya twabo, ukuti tufwile kula-kula.

²⁰Kakaba kabalilo kanaka kako u Mozesi akapapiwa, umwana umwiza nkani pamaso pa Chala. Akaleliwa munyumba iya wise amezi matatu,

²¹bo bamwefyamo munyumba iya wise, umwana umulindu uwa Falabo akamuseba nukumulela ngati we mwana wache.

²²Bakamumanyizya u Mozesi amahala ghosi agha mu Ijiputi, sona akaba muntu uwamaka mumazyu na mumbombo bulo.

²³“Bo u Mozesi afika amaka 40, akinong'ona pakubendela abakamu bache aba Izilayeli.

²⁴Akamwennya umuntu uwa muchisu icha Ijiputi akumuyivya yumo uwa babo, akabuka pakumupoka nukutanizya pakumughogha umuntu uwa mu Ijiputi.

²⁵U Mozesi akinong'ona ukuti abantu bache bangazyaghannya ukuti u Chala akamutuma pakubapoka muntamyo zyabo, loli batakazyaghannya.

²⁶Indabi yache akabennya aba Izilayeli babili bakulwa bene-bene, akayezya pakubamanyannya. Akanena ukuti, ‘Mwe bantu, mwe bana muntu, po nkimba choni chicho mukulwa bunubu?’

²⁷Loli yuyo akamuyivya uwamwabo akamusunkila u Mozesi kulubazu nukumulaluzya ukuti, ‘Nkimba we wenu akubika pakuba we songo nu mulongi pakasi papitu?

²⁸Nkimba ukulonda pakungogha ukuyana na mumo ukamughoghela umuntu uwa mu Ijiputi yula mumabwila?’

²⁹Bo u Mozesi ivwa zinizi, akachimbilamo mu Ijiputi nukubuka pakwikala muchisu icha Midiyani. Kula-kula akapapako abana babili.

³⁰“Bo ghachilapo amaka 40, uwantumi uwa kumwanya akamubonekela u Mozesi muchivwati ichakwaka nu moto munkolongo papipi ni ghamba ilya Sinayi.

³¹U Mozesi akaswigha na vivyo akavyennya, po akapalamila papipi ukuti enelezye. Loli akivwa izyu ilya Mwene likuti,

³²‘Ane ne Chala uwa banyenya binyu, u Chala uwa Abulahamu, u Chala uwa Yisaki nu Chala uwa Yakobo.’ U Mozesi akatetema nu bogha, sona atakajimba ukwennyako.

³³U Mwene akamubuzya akati, ‘Vula inkwato zyako pakuti ubuyo bubo ukanyitepo buzelu.

³⁴Naghennya amayimba agha bantu bane mu Ijiputi. Nivwa ukukoloma kwabo, po niza pakubapoka. Zagha losi ulu ukuti inkutume kuchisu icha Ijiputi.’

³⁵“U Mozesi we yuyo aba Izilayeli bakamukana. Bakamulaluzya bakati, ‘Nkimba we wenu akubika pakuba we songo nu mulongi pakasi papitu?’ Sona we yuyo u Chala akamutuma ukuti abanje we songo nu mupoki ukwendela mu wantumi uwa kumwanya yuyo akamubonekela muchivwati ichakwaka nu moto.

³⁶U Mozesi akabalongolela abantu ukwepamo mu Ijiputi, akabombagha ivyika ni viswigho mu Ijiputi na pa Nyanja Inchesamu, sona na munkolongo amaka 40.

³⁷U Mozesi we yuyo akababuzya aba Izilayeli ukuti, ‘U Chala akwiza pakubatumila umulaghuzi ukuyana na mumo akantumila, sona akwiza pakuba yumo uwa bantu binyu.’

³⁸We yuyo akabungana poka na ba Izilayeli munkolongo. Akaba mula-mula na banyenya bitu poka nu wantumi uwa kumwanya, yuyo akamubuzya pighamba ilya Sinayi nukutupokelela amazyu agha bumi agha Chala.

³⁹“Loli abanyenya bitu bakakana pakumwivwila, bakamusunkila kulubazu nukulonda ukuti ngali banganyokela kuchisu icha Ijiputi.

⁴⁰Po bakanena kwa Aloni bakati, ‘Utupangile abachala babo bakwiza pakutulongolela. Aswe tutakuzimanya zizyo zyamuwila umuntu yula u Mozesi, yuyo akatulongolela pakwepamo mu Ijiputi.’

⁴¹Pala-pala bakapanga ichifwani chicho chikaboneka ngati yo ngwata, bakabika ivyabupi ku chifwani chila nukuba nu lusekelo ulwakuchindikila zizyo abene bakapanga ni nyobe zyabo.

⁴²Po u Chala akabapa inkonto nukubavwituka ukuti biputaye bulo ni ntondwa izya kumwanya ukuyana na mumo zisimbiliwe mwibuku ilya balaghuzi ukuti, ‘Mwee ba Izilayeli! Mutakangoghelagha nene ivinyamana vyinyu nukubika ivyabupi amaka 40 munkolongo?

⁴³Chikaba chisakasa icha chala u Moleki, chicho mukanyamula ni chifwani icha Lefani, u chala winyu uwa ntondwa; vikaba vifwani vivyo mukamata ukuti muvyiputaye. Po inkwiza pakubasamizizya kubutali ni chisu icha Babeloni.’

⁴⁴“Abanyenya bitu bakaba ni Chisakasa munkolongo ichakusimikizya ukuti u Chala akaba nabo. Chikapangiwa bulo mumo u Chala akamubuzizya u Mozesi ukuti apangile, ukuyana na mumo u Mozesi akamulanjizizya.

⁴⁵Pisinda pache abanyenya bitu bakachipokela Ichisakasa chila-chila ku batata babo. Bakachinyamula, bo bakubuka nu Yoshwa pakufyula ichisu munyobe izya inko izya bantu, babo u Chala akabachimbizya pamaso papabo. Ichisakasa chila chikikala kula-kula mupaka pakabalilo aka Devedi.

⁴⁶U Chala akahoboka nkani nu Devedi, po u Devedi akamulaba ukuti amwitikizye ukuti amuzengele inyumba iyakwikalamo u Chala uwa Yakobo.[4]

⁴⁷Loli akaba we Solomoni yuyo akamuzengela inyumba.

⁴⁸Loli u Chala uwa Kumwanya nkani atakwikala munyumba zizyo zizengiwe na bantu, ukuyana na mumo umulaghuzi akulaghulila ukuti,

⁴⁹U Mwene akunena ukuti, ‘Kumwanya cho chitengo chane icha bumwene, sona ichisu ichapasi cho chakutuzizyapo inyayo zyane Nkimba nyumba yoni yiyo munganzengela? Nkimba ubuyo bubo imbaghiye pakwikalamo buli ko kwiyi?

⁵⁰Nkimba inte nene inkapanga ivintu vyosi vinivi?’ ”

⁵¹U Sitefani akendelela pakunena ukuti, “Mwe bantu aba moyo amakafu mwee. Amoyo ghinyu ghayanite bulo na bantu abakuzi, sona muli na mapuli! Ukuyana na mumo bakabombelagha abanyenya binyu, akabalilo kosi amwe mukumukana u Muzimu Umuzelu!

⁵²Nkimba kukabako umulaghuzi yumo yuyo abanyenya binyu batakamuvwimapo? Bakaghogha abantumi aba Chala, babo kale bakafumuzya izya kwiza ukwa Mubombi wache Umugholosu. Po losi ulu mwamubika munyobe izya balwani nukumughogha.

⁵³Amwe mwemwe mukapokela Indaghilo izya Chala, zizyo zikapeghiwa kukwinyu ukwendela mu bantumi, loli mutakazyivwila!”

⁵⁴Bo abalongi bakuteghelezya kwa Sitefani, bakakalala nukumumemenela amino.

⁵⁵Loli nu bwizule ubwa Muzimu Umuzelu, u Sitefani akennya kumwanya nukwennya ubuchindamu ubwa Chala, sona u Yesu imiliye kunyobe indilo iya Chala.

⁵⁶Akati, “Ennya, inkwennya kumwanya kwighukite, sona u Mwana uwa Muntu imiliye kunyobe indilo iya Chala.”

⁵⁷Loli abene bakakolomoka nkani, bakighalila amakutu ghabo ni nyobe zyabo. Panapo na panapo bosi poka bakamunyelela,

⁵⁸bakamuwesela kuzi ukwa kaya kala nukumusumba na mabwe. Abakaboni bakasungisya amenda ghabo ukwa mulumendo yuyo bakatinji Sabuli.

⁵⁹Bo bakwendelela pakumusumba na mabwe, u Sitefani akanda pakwiputa ukuti, “Wee Mwene Yesu, pokela umuzimu wane!”

⁶⁰Akafughama nukulila na mazyu agha pamwanya ukuti, “Wee Mwene! Utakakumbuke imbibi yabo iyi.” Bo anena zinizi akafwa.