Read lambya LOMA 10 Bible Online

LOMA 10 - lambya bible

LOMA 10

¹Mwee bakamu bane, chicho inkulonda nkani nu moyo wane ghosi, sona inkwiputa nkani kwa Chala ichakuti aba Izilayeli bangapokiwa!

²Inkubasimikizizya ukuti bipiye nkani pavintu ivya Chala, loli ukwiyipa kwabo kute kwa mahala.

³Batazimenye mumo u Chala akubanenela abantu pakuba bagholosu pantazi papache, loli bakuyezya pakubika izila izinji, po batakwibikila bene izila yiyo u Chala akubanenela abantu pakuba bagholosu pantazi papache.

⁴Pakuti u Kilisitu amalizya Indaghilo, umwakuti umuntu wesi yuyo akusubila aneniwanje pakuba mugholosu pamaso pa Chala.

⁵Pakunena nizya mumo abantu bakuneneliwa pakuba bagholosu pamaso pa Chala ukwendela mu Ndaghilo, u Mozesi akasimba akati, “Umuntu wesi yuyo akukonka Indaghilo, akuba nu bumi ukwendela mu Ndaghilo zila-zila.”

⁶Loli pakunena nizya mumo u Chala akubanenela pakuba bagholosu pantazi papache ukwendela mu lwitiko, Amasimbo ghakuti, “Utakilaluzye wemwene ukuti, ‘Nkimba we wenu akwiza pakwinjila kumwanya?’ ” (Kokuti ukumwisya pasi u Kilisitu ukufuma kumwanya.)

⁷“Pamo ukwilaluzya wemwene ukuti, ‘Nkimba we wenu angikila mu chibanka ichikulu ichibizu nkani?’ ” (Kokuti ukumuzyusya u Kilisitu kubuyo ubwa bantu abafwe.)

⁸Loli chicho inkunena cho ichi: “Amazyu agha Chala ghali papipi namwe, pamalomo ghinyu, sona na mumoyo ghinyu.” Kokuti amazyu agha lwitiko ghagho tukulumbilila.

⁹Nanti ukwitika nu mulomo wako ukuti u Yesu we Mwene, sona nukuti ukusubila ukuti u Chala akamuzyusya kubufwe, ukwiza pakupokiwa.

¹⁰Pakuti u Chala akumunena umuntu pakuba mugholosu pantazi papache, yuyo akusubila mumoyo wache, sona umuntu akupokiwa nanti akwitika nu mulomo wache.

¹¹Amasimbo ghakuti, “Umuntu wesi yuyo akusubila mumwache, atakwiza pakukoziwa isoni.”

¹²Pakuti butalipo ukulekana pakasi pa ba Yuda na bantu babo bate ba Yuda. U Chala we Mwene uwa bosi, sona akubasaya nkani abantu bosi babo bakwitizya kukwache.

¹³Pakuti Amasimbo ghakuti, “Umuntu wesi yuyo akwitizizya mwitabwa ilya Mwene, akwiza pakupokiwa.”

¹⁴Po nkimba abantu bangamwitizya buli-buli yuyo batamusubiye? Sona bangasubila buli-buli, nanti bativuyepo amazyu? Sona bangivwa buli-buli amazyu, nanti amazyu ghatakulumbililiwa?

¹⁵Po amazyu ghangalumbililiwa buli-buli nanti abalumbilili batakutumiwa? Pakuti Amasimbo ghakuti, “Bwiza boni bope ubwa muntu yuyo akwiza na mazyu amiza.”

¹⁶Loli bate bantu bosi babo bakapokela Amazyu Amiza. Umulaghuzi u Yesaya akati, “Mwene, we wenu akasubila amazyu ghagho tukalumbilila?”

¹⁷Po ulwitiko lukwiza bo umuntu ivwa amazyu, sona umuntu akwivwa amazyu pakulumbilila nizya Kilisitu.

¹⁸Loli imbalaluzye: Nkimba kokuti aba Izilayeli batakivwa Amazyu Amiza? Naloli bakaghivwa pakuti Amasimbo ghakuti, “Izyu lyabo likivwika pachisu chosi ichapasi, amazyu ghabo ghakafika kumpaka iya chisu ichapasi.”

¹⁹Imbalaluzye sona: Nkimba kokuti aba Izilayeli batakivwisya? U Mozesi akaba wakwanda pakwamulapo ukuti, “Inkwiza pakubapela pakuba bantu abakabini pakubombela uluko lulo lute luko lwenecho. Inkwiza pakubakalalizya pakubombela uluko lulo lupunganu.”

²⁰Sona u Yesaya akanena nu bujivu nkani akati, “Inkaghiwa na babo batakandondagha. Inkababonekela babo batakandabagha.”

²¹Loli nizya ba Izilayeli akati, “Umusanya ghosi inkagholosya inyobe zyane pakubapokela abantu babo batakanyivwilagha, sona na babo bakansambukila.”