Read lambya LOMA 11 Bible Online

LOMA 11 - lambya bible

LOMA 11

¹Po imbalaluzye, nkimba u Chala akabakana abantu bache? Awe, napo panandi. Ane nemwene ne mu Izilayeli, uwaluko ulwa Abulahamu, uwa mbumba iya Benjamini.

²U Chala atabakanite abantu bache, babo bakabasalila zila ukwandila ko kubwandilo. Nkimba muzimenye zizyo Amasimbo ghakunena pabuyo bubo bukunena nizya Eliya, papo akamulambilizya u Chala ukuti abafunde aba Izilayeli? Akati,

³“Mwene, abene baghogha abalaghuzi bako nukumongolannya ivighemo vyako. Nasyala bulo nemwene, sona bakuyezya ukuti bangoghe.”

⁴Nkimba u Chala akamwamula buli-buli? Akamwamula akati, “Nisungiye nemwene abanavuli 7,000, babo batamuchindikitepo u Bala, u chala umumyasi yula.”

⁵Umu mo mumo vibeleye nilelo: Basyala abantu banandi bulo pakasi pa ba Izilayeli, babo u Chala akabasala pachifukwa icha chisa chache.

⁶Loli ukusala ukwa Chala kukima pachisa chache, kute po pavintu vivyo bakabomba. Nanti zikabanga bunubu, kokuti ichisa chache, ngali chitakaba chisa ichenecho.

⁷Po nkimba tungati choni? Chicho aba Izilayeli bakalondagha, batakachagha. Loli abantu abanandi bulo babo u Chala akasala, bakachagha. Abantu bosi babo bakasyalako bakaba na mapuli.

⁸Pakuti Amasimbo ghakuti, “U Chala akaghapela amoyo ghabo pakuba makafu nkani mupaka nilelo bulo amaso ghabo ghatangennya. Amakutu ghabo ghatangivwa.”

⁹Sona u Devedi akuti, “Ulusekelo lwabo lubateghe ngati cho chipingo ni nkoka baleke bawilemo nu kufundiwa.

¹⁰Amaso ghabo ghighaliliwe, umwakuti batakennyanje; sona akabalilo kosi imisana yabo yiname.”

¹¹Po imbalaluzye ukuti, “Nkimba bo aba Yuda bipunula bakawila zila?” Awe, napo panandi! Loli pachifukwa icha mbibi zyabo, ubupoki bwiza pa bantu babo bate ba Yuda, ukuti aba Yuda babanje bantu abakabini.

¹²Imbibi izya ba Yuda zikiza nu lusayo ulukulu nkani kuchisu ichapasi, sona izala yabo iya buzimu yikiza nu lusayo ulukulu nkani pa bantu babo bate ba Yuda. Po nkimba lusayo lukulu loni lulo lukwiza pakubako, bo ubwinji ubwa ba Yuda bonjelelako!

¹³Losi ulu inkunena namwe bantu mwe mute mwe ba Yuda. Ane pakuba ne mutumiwa pakasi pa bantu babo bate ba Yuda, inkwituvikizya pachifukwa icha butumiwa bwane bunubu.

¹⁴Pamo ningabapela abantu abaluko lwane pakuba bantu abakabini, umwakuti ningapoka bamo mumwabo.

¹⁵Nanti abantu aba muchisu ichapasi bakasayana nu Chala ichifukwa akabakana aba Yuda, nkimba kukwiza pakuba buli-buli bo bakupokeliwa sona? Kukwiza pakuba ngati bo bantu abafwe, babo bazyuka kubufwe.

¹⁶Nanti akamenyu akakwanda aka chibama kapaghuliliwa kwa Chala, kokuti chope ni chibama chosi chipaghuliliwe. Sona nanti igululuzi lizelu, kokuti zyope ni samba zelu.

¹⁷Nanti isamba zimo izya musyunguti zyapalantiwa, sona ulusamba ulwa musyunguti ulwa muzi lwamamatiziwa kwikwi lila-lila. Amwe mwe bantu babo bate ba Yuda muli ngati lyo likwi ilya musyunguti ilya mwisote, sona mukugabana ubumi ubwa buzimu ubwa ba Yuda.

¹⁸Po mutakabayivyanje babo bapalantiwa ngati zyo samba. Loli nanti mukwituvya mukumbukaye ukuti mute mwemwe mukulema amagululuzi, loli amagululuzi gho ghagho ghakubalema amwe.

¹⁹Po mukwiza pakunena ukuti, “Isamba zikapalantiwa, umwakuti bamamatizyepo ane.”

²⁰Momumo, abene bakapalantiwa ichifukwa batakasubila, bo amwe mukwikala mubuyo bwinyu ichifukwa mukusubila. Mutakituvyanje, loli munyilaye.

²¹Nanti u Chala atakazileka isamba mubuyo bwache, nkimba mwikwinong'ona ukuti akwiza pakubaleka amwe?

²²Panapa mungennya ichisa icha Chala, sona nu bukali bwache. Abakalaliye abantu babo bawiye, loli ali ni chisa namwe, nanti mukwendelela pakubomba vivyo vikumuhobosya. Loli nanti mutakubomba bunubu, namwe bulo mukwiza pakupalantiwako.

²³Sona nanti aba Yuda baleka ukusita ukusubila kwabo, bakwiza pakunyosiwa mubuyo bwabo bubo bakabamo pakuti u Chala ali na maka pakumamatizya sona.

²⁴Amwe mwe bantu babo bate ba Yuda muli ngati zyo samba izya ikwi ilya musyunguti uwa muzi lilyo lipalantiwe nukumamatiziwa kwikwi ilya musyunguti lilyo likabyaliwa. Aba Yuda bali ngati lyo likwi lilyo libyaliwe, po chikwiza pakuba chipepe nkani kwa Chala pakumamatizya sona isamba kwikwi lilyo lyapalantiwa.

²⁵Mwee bakamu bane, pano pali ubwanaloli bubo bufisiwe, bubo inkulonda ukuti amwe mubumanye pakuti chikwiza pakubapela ukuti mutakizimbulaye ukuti mwe bamahala. Ubukafu ubwa moyo agha ba Izilayeli bute ubwa bwila na bwila, loli bukwiza pakubako mupaka abantu bosi babo bate ba Yuda bize kwa Chala.

²⁶Umu mo mumo aba Izilayeli bosi bakwiza pakupokeliwa. Pakuti Amasimbo ghakuti, “Umupoki akwiza pakufuma mu Ziyoni nu kwefya imbibi zyosi izya baluko ulwa Yakobo.

²⁷Ulu lo lufingo lulo inkwiza pakufingana nabo bo inkwefya imbibi zyabo.”

²⁸Pachifukwa icha kughakana Amazyu Amiza, aba Yuda bakaba balwani ba Chala ichifukwa icha bantu babo bate ba Yuda. Loli pachifukwa ichakuti akabasala, ilelo baba bamanyani bache pachifukwa icha banyenya babo.

²⁹Pakuti u Chala atakwandula inyinong'ono zyache pa muntu yuyo amusala nukumusaya.

³⁰Ngati mumo amwe mwe bantu babo bate ba Yuda kale mutakamwivwila u Chala, loli ilelo mwapokela ichisa icha Chala pachifukwa ichakusita kwivwila ukwa ba Yuda.

³¹Umwakuyana bulo, pachifukwa icha chisa chicho mukapokela, ilelo aba Yuda batakumwivwila u Chala, umwakuti ilelo bapokele ichisa icha Chala.

³²Pakuti u Chala abapela abantu bosi pakuba bapinyiwa abasita ukwivwila, umwakuti alanjizye ichisa chache pa bosi.

³³Mwee, bo bukabi boni ubwa Chala! Amahala ghache nu bumanyi bwache vyibizu nkani! We wenu yuyo angalingannya ubulongi bwache? Nkimba we wenu angivwisya izila zyache?

³⁴Pakuti Amasimbo ghakuti, “Nkimba we wenu azimenye inyinong'ono izya Mwene? We wenu yuyo angamubuzya izyakubomba?

³⁵Nkimba we wenu amupiyepo lumo chimo umwakuti u Chala amulipile papo?”

³⁶Pakuti ivintu vyosi vikapeliwa nawe, sona vili nu bumi ukwendela mumwache, sona ni chifukwa icha yuyo. Kwa Chala kubanje ubuchindamu ubwa bwila na bwila! Ameni.