Read lambya LOMA 16 Bible Online

LOMA 16 - lambya bible

LOMA 16

¹Inkumubika u Febe, umuyemba witu munyobe zyinyu, sona yuyo mubombi uwa chipanga icha mu Kenkeleya.

²Mumupokele akiza mwitabwa ilya Mwene, ukuyana na mumo abantu abazelu aba Chala babaghiye pakubombelana, sona mumwavwe ni vintu vivyo akusobelwa navyo pakuti umwene akabavwa abantu abinji poka nane bulo.

³Mundamukileko u Pulisika nu Akwila, ababombi abamwitu mumbombo iya Kilisitu u Yesu,

⁴babo bakabika ubumi bwabo pachulu ukuti bampoke ane. Inte nene nemwene inkubapalizya, awe, loli ni vipanga vyosi ivya bantu babo bate ba Yuda.

⁵Mundamukileko sona na bantu babo bakukomana munyumba zyabo pakwiputa. Mundamukileko umughaniwa wane u Epaneta, yuyo akaba muntu wakwanda muchigaba icha Asiya pakumusubila u Kilisitu.

⁶Mundamukileko u Maliya, yuyo akiyula nkani pakubabombela amwe.

⁷Mundamukileko sona nu Andoloniko nu Yuniya,[4] babo bakaba poka nane mujele. Abene bantu bamanyikwe nkani pakasi pa batumiwa, sona bakaba bakwanda pakuba bakilisitu, bo nane inchili.

⁸Mundamukileko u Ampiliyati, umughaniwa wane mwa Mwene.

⁹Mundamukileko sona nu Ulubana, umubombi uwamwitu mumbombo iya Kilisitu, sona nu Sitaki, yuyo mughaniwa wane.

¹⁰Mundamukileko u Apele, yuyo muntu umusubiliwa nkani pambombo iya Kilisitu; mundamukileko aba munyumba iya Alisitobula.

¹¹Mundamukileko u Helodiyoni, umukamu wane. Mundamukileko abakilisitu bosi aba munyumba iya Nalikisi, babo bantu ba Mwene.

¹²Mundamukileko u Tilifena nu Tilifosa, abakolo babo bakwiyula nkani pambombo iya Mwene. Mundamukileko umughaniwa wane u Pelesi, umukolo yuyo iyula nkani pambombo iya Mwene.

¹³Mundamukileko u Lufu, umusaliwa uwa Mwene, sona nu nyina, yuyo ali ngati we mayi wane.

¹⁴Mundamukileko u Asinkilita, u Filegoni, u Helemesi, u Patiloba, u Helima, poka na bakamu bosi babo bali poka nabo.

¹⁵Mundamukileko u Filologa nu Juliya, sona mundamukileko u Neliya nu muyemba wache, sona nu Olimpa, poka na bantu abazelu aba Chala bosi babo bali poka nabo.

¹⁶Mulamunkanaye mwebene pakulanjizya ulughano ulwenecho. Ivipanga vyosi ivya Kilisitu vikubalamuka.

¹⁷Mwee bakamu bane, inkubalaba ukuti muchebaye na bantu babo bakubagabannya abantu, sona na babo bakubika ivipunulo muzila zyinyu pakumanyizya ivimanyisyo vivyo vilekanite na vivyo mukamanyiziwa. Epako kukwabo!

¹⁸Pakuti abantu banaba batakumubombela u Mwene witu u Kilisitu, loli bakuvibombela ivinyonywa vyabo. Sona na mazyu ghabo manoni, sona mazimbuli bakubazimbula abantu babo batamenye nachimo-chimo.

¹⁹Abantu bosi bivuye nizya kwivwila kwinyu, po ane nahoboka nkani pachifukwa icha mwemwe. Loli inkulonda ukuti mubanje bamahala pachintu chicho chiza, sona nukuti mutakinong'onelayeko ni mbibi.

²⁰Po u Chala umwenecho uwa mutende akwiza pakumusya u Satana ni nyayo zyinyu. Ichisa icha Mwene witu u Yesu Kilisitu chibanje namwe.

²¹U Timoti, umubombi uwamwitu, akubalamuka. U Lusiyasi, nu Yasoni, sona nu Sosipateli, aba Yuda abamwitu bope bakubalamuka.

²²Ane ne Telitiyo, umusimbi bulo uwa kalata uyu, inkubalamukila mwa Mwene.

²³Wepe nu Gayi bulo, yuyo ampokelite ane poka ni chipanga chosi munyumba yache, akubalamulaka. U Elasita, umusungi uwa ndalama izya kaya akakulu nkani, sona nu mukamu witu u Kwaliti bakubalamuka.[5]

²⁵U Chala achindikiwanje. Ali na maka pakubakazya mulwitiko lwinyu, ukuyana na Mazyu Amiza agha Yesu Kilisitu ghagho nalumbilila, sona ukuyana nu buvumbuli ubwa vintu izyakubusyefu vivyo vikafisiwa ukwanda kale.

²⁶Loli, ilelo vyavumbuliwa pabuzelu ukwendela mu masimbo agha balaghuzi; sona ukwendela mu malamulo agha Chala uwa bwila na bwila vyavumbuliwa ku bantu abaluko losi, umwakuti basubile nukwivwila.

²⁷Kwa Chala mwene, yuyo we Chala uwamahala ghosi, kubanje ubuchindamu bwila na bwila ukwendela mwa Yesu Kilisitu! Ameni.