Read lambya 1 KOLINTI 1 Bible Online

1 KOLINTI 1 - lambya bible

1 KOLINTI 1

¹Ane ne Pabuli, nene inkitiziwa pakuba mutumiwa uwa Yesu Kilisitu, ukuyana nu bwighane ubwa Chala, sona na ku mukamu witu u Sositeni.

²Tukuchisimbila ichipanga icha Chala icha mu Kolinti, abantu babo bakapaghuliwa mwa Yesu Kilisitu, sona babo bitiziwe pakuba bantu bazelu, poka na bantu bosi kosi na kosi, babo bakulichindika itabwa ilya Mwene witu u Yesu Kilisitu, u Mwene wabo nu Mwene witu.

³Ichisa nu mutende ivyakufuma kwa Chala Utata witu, sona na kwa Mwene u Yesu Kilisitu vibanje namwe.

⁴Akabalilo kosi inkumupalizya u Chala wane pachifukwa icha mwemwe, pachifukwa icha chisa chicho akabalanjizya mwa Yesu Kilisitu.

⁵Pakuti pakumamatilana poka nu Kilisitu, mwaba bantu bakabi muvintu vyosi bulo, nkani-nkani mukanenele kinyu kosi, sona na mubumanyi bwinyu bosi.

⁶Pakuti ulusimikizyo nizya Kilisitu lwikaziwe nkani mumwinyu,

⁷umwakuti mutakusobelwapo ichabupi icha buzimu, bo mukulindilila ukuti u Mwene witu u Yesu Kilisitu avumbuliwe.

⁸Umwene akwiza pakubakazya ukufika mupaka pabumalilo, ukuti mubanje bantu abasita chilema nachimo-chimo pisiku ilya Mwene witu Yesu Kilisitu.

⁹U Chala musubiliwa, sona we yuyo akabitizya ukuti mubanje bakumamatilana poka nu Mwana wache u Yesu Kilisitu, u Mwene witu.

¹⁰Mwee bakamu bane, inkubalaba mwitabwa ilya Mwene witu u Yesu Kilisitu ukuti mwivwanaye pa zizyo mukunena. Patakabepo ukugabinkana pakasi papinyu. Mubanje poka munyinong'ono, sona na mufundo zyinyu.

¹¹Pakuti abantu bamo aba munyumba iya Kolobe bambuzya pabuzelu ukuti pali ukudalinkana pakasi papinyu, mwe bakamu bane.

¹²Chicho inkulonda pakunena chakuti, umuntu wesi mumwinyu akunena izyache, wepe uyunji akunena izyache akuti, “Ane indi kulubazu ulwa Pabuli.” Uyunji akuti, “Ane indi kulubazu ulwa Apolo.” Uyunji akuti, “Ane indi kulubazu ulwa Pitala.” Uyunji akuti, “Ane indi kulubazu ulwa Kilisitu.”

¹³Nkimba u Kilisitu agabinkanite?[1] Nkimba we Pabuli yuyo akakomeliwa pachipinjika? Fwandi, mukoziwa mwitabwa ilya Pabuli?

¹⁴Inkumupalizya u Chala ukuti pakasi papinyu intakamozyapo umuntu nayumo, loli mwene u Kilisipa nu Gayi.

¹⁵Polelo nayumo umuntu yuyo anganena ukuti mukoziwa mwitabwa lyane.

¹⁶Ee, inkabozya sona aba munyumba iya Sitefanasi, loli intakukumbuka nanti inkamozyapo yumo.

¹⁷Pakuti u Kilisitu atakantuma ane pakozya, loli pakulumbilila Amazyu Amiza. Atakantuma ukuti indumbilile ukuyana na mahala agha buntu, awe, umwakuti ichipinjika icha Kilisitu chitakaboneke ukuti chite na maka.

¹⁸Pakuti ukulumbilila nizya bufwe ubwa Kilisitu pachipinjika, bo bupunganu ku bantu babo basobelite, loli kukwitu aswe twe twapokiwa, gho maka agha Chala.

¹⁹Pakuti Amasimbo ghakuti, “Inkwiza pakughanangannya amahala agha bantu abamahala, sona inkwiza pakubuvulungannya ubuchevu ubwa bantu abachevu.”

²⁰Polelo ali ko kwiyi umuntu uwamahala? Ali ko kwiyi umuntu umumanyi? Nkimba ali ko kwiyi umuntu uwakwinong'ona umwakufikapo muchisu ichapasi ichi? U Chala alanjizya ukuti amahala agha muchisu ichapasi ichi ghabupunganu.

²¹Pakuti u Chala mumahala ghache, akabatikila zila ukuti abantu batakamumanye na mahala ghabo. Loli chikamuhobosya u Chala ukuti abapoke abantu babo bakughasubila amazyu ghagho tukulumbilila, napapo abene bakuti ghabupunganu.

²²Aba Yuda bakulonda ivyika, loli aba Giliki bakulonda amahala.

²³Loli aswe tukumulumbilila u Kilisitu yuyo akakomeliwa pachipinjika. Aba Yuda bakunena ukuti ichipinjika cho chipunulo, sona abantu babo bate ba Yuda bakuti bo bupunganu.

²⁴Loli abantu babo bitiziwe nu Chala, aba Yuda pamo abantu babo bate ba Yuda, bosi bazimenye ukuti u Kilisitu we maka agha Chala, sona we mahala agha Chala.

²⁵Pakuti ubupunganu ubwa Chala bwamahala ukuchila amahala agha bantu, sona ubudedebazu ubwa Chala bwamaka ukuchila amaka agha bantu.

²⁶Mwee bakamu bane, mukumbukaye namumo mukabela, pakabalilo kako u Chala akabitizizya. Abantu aba muchisu ichapasi ichi bakinong'ona ukuti banandi mumwinyu bakaba bamahala, pamo bamaka, pamo baluko ulumanyikwe.

²⁷Loli u Chala akavisala ivintu vivyo vipunganu ivya muchisu ichapasi ichi, umwakuti abakozyanje isoni abamahala. Sona akavisala ivintu vivyo videdebazu ivya muchisu ichapasi ichi, umwakuti abakozyanje isoni abamaka.

²⁸Po akavisala ivintu vivyo vite ni mbombo, sona vivyo abantu aba muchisu ichapasi ichi bavisulite, umwakuti anangannye ivintu vivyo abantu aba muchisu ichapasi ichi bakwinong'ona ukuti vyapamwanya.

²⁹U Chala akabomba zinizi, umwakuti patakabepo nayumo umuntu uwakwituvya pantazi papache.

³⁰U Chala we yuyo abamamatizya poka nu Kilisitu u Yesu, sona akamupima pakuba mahala ghitu. Ukwendela mumwache, twaneniwa pakuba bantu bagholosu pamaso pa Chala. Aswe twaba bantu abazelu aba Chala, sona twapokiwa.

³¹Ichi cho chicho Amasimbo ghakunena: “Wesi yuyo akulonda ukwituvya, ituvikizyanje mwa Mwene.”