Read lambya 1 KOLINTI 2 Bible Online

1 KOLINTI 2 - lambya bible

1 KOLINTI 2

¹Mwee bakamu bane, bo niza kukwinyu, intakabombezyapo amazyu amakafu pamo aghabumanyi pakulumbilila nizya bwanaloli ubwa Chala bubo bufisiwe.

²Ichifukwa bo indi namwe, inkadumula pakuluvya ivintu vyosi, loli mwene u Yesu Kilisitu, sona nkani-nkani ubufwe bwache ubwa pachipinjika.

³Po inkiza kukwinyu nu budedebazu, nu bogha, sona nu kutetema nkani.

⁴Amazyu ghane sona nu bulumbilili bwane intakavinena na mazyu aghamahala na ghakudeba, loli nu lusimikizyo ulwa maka agha Muzimu uwa Chala,

⁵umwakuti ulwitiko lwinyu lutakime mumahala agha buntu, awe, loli mumaka agha Chala.

⁶Loli tukunena amazyu aghamahala na bantu babo bamaka mubuzimu, napapo amahala agha ghate mahala agha masiku agha, pamo agha balaghili aba muchisu ichapasi ichi, babo amaka ghabo ghakumala.

⁷Loli amahala ghagho tukughanena gho mahala agha Chala, ghagho abantu batangaghennya. U Chala akaghasala kale, bo achili nukupela ichisu ichapasi ukuti ghatupe ubuchindamu.

⁸Abalaghili aba muchisu ichapasi ichi batakazimanya zinizi. Nanti bakazimanyagha ngali batakamukomela u Mwene uwa buchindamu pachipinjika.

⁹Loli ukuyana na Masimbo aghakuti, “Chicho ilyiso litachenizyepo, pamo chicho ni kutu litachivuyepo pamo chicho umoyo uwa muntu ghutakachinong'onagha, ichintu chila-chila, cho chicho u Chala akabayanizizya abantu babo bamughanite.”

¹⁰Loli u Chala akatuvumbulila ivintu vinivi ukwendela mu Muzimu Umuzelu. Pakuti u Muzimu akwenelezya ivintu vyosi, napapo zingaba inyinong'ono inyibizu izya Chala.

¹¹Pakuti we muzimu yuyo ali mukasi mu muntu, we yuyo azimenye inyinong'ono izya muntu. Umwakuyana bulo, wepe u Muzimu uwa Chala mwene, we yuyo azimenye zyosi izya Chala.

¹²Aswe tutakapokela umuzimu uwa muchisu ichapasi ichi, awe, loli tukapokela u Muzimu Umuzelu yuyo akufuma kwa Chala, umwakuti tungavimanya vivyo u Chala atupiye.

¹³Polelo tutakunena na mazyu ghagho ghakumanyiziwa na mahala agha bantu, awe, loli na mazyu ghagho u Muzimu Umuzelu akumanyizya. Tukubamanyizya abantu babo bali nu Muzimu Umuzelu ivintu ivyanaloli ivya buzimu.

¹⁴Umuntu yuyo ate nu Muzimu, atangavipokela ivyabupi vivyo u Muzimu uwa Chala akupa pakuti kukwache vya bupunganu. Pope atangavyaghannya, ichifukwa mwene yuyo ali nu Muzimu, we yuyo angavyaghannya ivya buzimu.

¹⁵Loli umuntu yuyo ali nu Muzimu, akuvyaghannya vyosi, loli nayumo umuntu yuyo angamwaghannya umuntu yula-yula.

¹⁶Ukuyana na Masimbo aghakuti, “Nkimba we wenu akuzimanya inyinong'ono izya Mwene umwakuti angamulingannya?” Loli, aswe, tuli ni nyinong'ono izya Kilisitu.