Read lambya 2 KOLINTI 12 Bible Online

2 KOLINTI 12 - lambya bible

2 KOLINTI 12

¹Imbaghiye nendelele pakwituvya, napapo chitalipo nachimo-chimo chicho ningakabapo. Loli losi ulu inkwiza pakunena nizya visetuka nu buvumbuli ubwa Mwene.

²Imumenye umukilisitu yumo, yuyo amaka 14 ghagho ghamalagha akazompoliwa bulo pakubuka kumwanya nkani. Intazimenye nanti zinizi zikabombiwa naloli, pamo nanti chikaba chisetuka bulo, u Chala mwene we yuyo azimenye.

³Inzimenye sona ukuti umuntu uyu akazompoliwa bulo pakubuka ku Paladizo. Intazimenye nanti zinizi zikabombiwa naloli, pamo nanti chikaba chisetuka bulo, u Chala mwene we yuyo azimenye.

⁴Kula-kula umuntu yula akivwa ivintu ivyakusita ukuneniwa, ivintu vivyo umuntu atangavinena nu mulomo.

⁵Po inkwiza pakwituvya nizya muntu uyu, loli intakwiza pakwituvya nizya ane nemwene. Intakwiza pakwituvya ni chintu chimo, loli vyene ivintu vivyo vikulanjizya ubudedebazu bwane.

⁶Napapo nanti nalondagha ukwituvya, intakwiza pakuba ne mupunganu, pakuti inkwiza pakunena ubwanaloli. Loli inkwikanizya nemwene ukwituvya, umwakuti umuntu yumo atakampimaye pakuba ne wapamwanya ukulekana na zizyo inkuzibomba pamo inkuzinena.

⁷Loli pakunyila ukuti ningitutumula pachifukwa icha buvumbuli ubukulu ubu, u Chala akabika umwivwa mu mubili wane pakuba wantumi uwa Satana ukuti ghunjivye nkani ukuti intakitutumulaye.

⁸Inkiputa kwa Mwene katatu nizya chinichi pakumulaba ukuti efye ichintu chinichi papane.

⁹Loli u Mwene akambuzya akati, “Ichisa chane chakuyana pakuti amaka ghane ghakuba ghakufikapo mu muntu umudedebazu.” Polelo muvintu vyosi inkwiza pakwituvya umwakuhoboka nizya budedebazu bwane, umwakuti amaka agha Kilisitu ghabanje papane.

¹⁰Pachifukwa icha Kilisitu, inhobokite nkani nu budedebazu bwane, nu musamu wane, ni ntamyo zyane, na mayimba ghane, sona nu bupala-pala bwane. Pakuti bo indi mudedebazu, popapo indi na maka.

¹¹Nipela nemwene pakuba ne mupunganu, loli amwe mwemwe mumpelite pakuba bunubu. Amwe mwemwe mubaghiye pakunsimikizya ane pakuti ane intakaba ne munandi uwabumalilo pa batumiwa abapamwanya nkani aba, napapo ne wabulo.

¹²Ivyika poka ni viswigho, sona ni mbombo izyamaka, vivyo vikusimikizya ukuti ne mutumiwa naloli, vikabombiwa mumwinyu mubufisalyoyo.

¹³Nkimba chintu choni chicho inkachibomba mu vipanga ivinji, ukwefyako chene ichakuti ane nemwene intabatamizyepo nalumo? Nalamba, munhobokele imbibi yane iyi!

¹⁴Ennya, aka kabutatu ukuti niyanizye pakubendela. Po intakwiza pakubatamya pakuti chicho inkulonda, vite vintu vivyo muli navyo, awe, loli inkulonda amwe. Pakuti yite mbombo iya bana iyakubasungila abapapi babo ivyuma, awe, loli yo mbombo iya bapapi pakubasungila abana babo ivyuma.

¹⁵Inkwiza pakuhoboka nkani ukutagha ivyane vyosi poka nu bumi bwane bulo, umwakuti imbavwe. Nanti imbaghanite nkani, nkimba amwe mukwiza pakungana panandi?

¹⁶Amwe mukwiza pakwitinkana nane ukuti intabatamizyepo nalumo-lumo pakubalaba indalama. Loli abantu bamo banganena ukuti ne muchevu, sona nukuti inkabachevya mubuchevu bwane.

¹⁷Buli? Nkimba inkabachevya ukwendela mu muntu yumo uwa bantu babo inkabatuma kukwinyu?

¹⁸Inkamulaba u Titi ukuti abendele, sona inkamutuma umukamu witu yumo poka nawe. U Titi atakabachevya, nkimba mute momumo? Nkimba tutakabombela poka mumoyo ghoka. Nkimba tutakakonka izila yoka?

¹⁹Lumo mukwinong'ona ukuti mosi mumo twandiye pakwiyimila twebene pantazi papinyu. Awe, loli twanenagha pamaso pa Chala ukuti aswe twanenagha zinizi mwitabwa ilya Kilisitu, sona nukuti muvyosi vivyo tukubomba ukuti tubavwe mwemwe bakamu bitu abaghaniwa.

²⁰Pakuti inkunyila ukuti lumo ningiza nukubagha bulo ukulekana namumo nalondelagha, sona nukuti namwe munganyagha bulo ukulekana namumo mwalondelagha. Inkunyila sona nukuti lumo ningagha ukudalinkana, na kabini, nu kukalala, nu kwiyighana, ni ntuko, ni yebo, nu kwitutumula, sona nu buvulunganu.

²¹Inkunyila ukuti bo niza sona kukwinyu u Chala wane akwiza pakunkozya isoni pantazi papinyu, po inkwiza pakubalilila abantu abinji babo bakananga kale, loli batakapinduka nukuzileka imbibi zyabo, ni vinyonywa vyabo, sona nu bwamalaya bwabo bubo babombagha.