Read lambya 2 KOLINTI 4 Bible Online

2 KOLINTI 4 - lambya bible

2 KOLINTI 4

¹U Chala muchisa chache atupiye imbombo iyi, po tutakunyokela mwisinda.

²Loli tumalanite kale nazyo imbombo zyosi izyakubusyefu, sona ni zyakukozya isoni. Aswe tutakubombezya ubuzimbuli pamo ukunyongannya amazyu agha Chala. Loli pakunena ubwanaloli bosi pabuzelu pamaso pa Chala, ukuti twipale twebene kwa mabyebye uwa muntu wesi.

³Nanti Amazyu Amiza ghagho tukulumbilila ghavwinkiwe, ghavwinkiwe ku bantu bene babo bakusobela.

⁴Abene batakusubila pakuti u Satana, u chala uwa muchisu ichapasi ichi azikite amoyo ghabo ukuti batakalwennyanje ulukozyo ulwa buchindamu ubwa Mazyu Amiza agha Kilisitu, yuyo nkozya bulo iya Chala.

⁵Pakuti tutakwilumbilila twebene, loli tukulumbilila u Yesu Kilisitu ukuti we Mwene. Aswe twe babombi binyu bulo pachifukwa icha Yesu.

⁶Pakuti we Chala yuyo akati, “Ulukozyo lulamaye muchisi!” sona we Chala yunuyu yuyo akalamisya ulukozyo lwache mumoyo ghitu, ukuti abantu babumanye ubuchindamu ubwa Chala, bubo bukulama pacheni icha Kilisitu.

⁷Loli aswe tuyanite bulo ni sonta izya kusungilamo ubukabi ubu, ukuti tulanjizye ukuti amaka amakulu agha ghakufuma kwa Chala, kute ko kukwitu, awe.

⁸Aswe tukukomana na mayimba aghakulekana-lekana, loli tutakufyenyiwa. Utubalilo tumo amahala ghakutumalila, loli tutakulekapo nalumo.

⁹Aswe tukuvwimiwa, loli tuli na bamanyani abinji. Tukuwisiwa pasi, loli tutakuvulala.

¹⁰Akabalilo kosi tukwenda nu bufwe ubwa Yesu mu mabili ghitu, umwakuti ubumi bwache bope bungaboneka mu mabili ghitu.

¹¹Pakuti akabalilo kosi, napapo tuli nu bumi, tukukomana ni vyakoghofya ivya bufwe pachifukwa icha Yesu, umwakuti ubumi bwache bungaboneka mubumi bwitu ubwa muchisu ichapasi ichi.

¹²Polelo ubufwe buli pambombo mumwitu, loli ubumi buli pambombo mumwinyu.

¹³Amasimbo ghakuti, “Inkanena pachifukwa ichakuti inkasubila.” Pakuti tuli nu moyo uwa lwitiko ghula-ghula, cho chifukwa naswe bulo tukunena.

¹⁴Aswe tuzimenye ukuti u Chala yuyo akamuzyusya u Mwene u Yesu kubufwe, akwiza pakutuzyusya naswe bulo kubufwe poka nu Yesu, sona nukutufisya poka namwe pantazi papache.

¹⁵Zyosi zinizi zili bunubu pachifukwa icha mwemwe, umwakuti abantu na bantu bakwiza pakumanya namumo ichisa icha Chala chibeleye, po bakwiza pakumupalizya u Chala, sona nukumuchindika.

¹⁶Pachifukwa chinichi tutakunyokelapo nalumo-lumo mwisinda. Napapo amabili ghitu ghakudedebala panandi-panandi, loli amoyo ghitu ghakupokela amaka amapya isiku ni siku.

¹⁷Pakuti amayimba ghitu manandi, sona ghakabalilo akanandi, ghali pakutuyanizizya aswe ubuchindamu ubukulu ubwakuchilapo, sona nu bwa bwila na bwila.

¹⁸Polelo tutakulolotela pavintu vivyo vikuboneka na maso, loli tukulolotela pavintu vivyo vitakuboneka na maso. Pakuti ivintu vivyo vikuboneka na maso vitakwikalizannya, loli ivintu vivyo vitakuboneka na maso vya bwila na bwila.