Read lambya 2 KOLINTI 5 Bible Online

2 KOLINTI 5 - lambya bible

2 KOLINTI 5

¹Pakuti tuzimenye ukuti nanti ichisakasa chicho tukwikalamo pachisu ichapasi ichi, chapankuliwa, tukwiza pakuba ni nyumba kumwanya yiyo u Chala atuyanizizye. Inyumba iyi yitakazengiwa ni nyobe izya bantu, sona yikwiza pakubangako bwila na bwila.

²Ichi cho chifukwa mu Chisakasa ichi tukukoloma, nukulonda nkani ukuti twinjile munyumba yitu iyakumwanya,

³umwakuti bo twayivwala, tutakaghiwe ukuti tuli nkule.

⁴Bo tukwikala mu Chisakasa icha muchisu ichapasi ichi, tukukoloma, sona tukung'wamilwa, kute kokuti tukulonda pakwinjila mu Chisakasa chitu icha muchisu ichapasi ichi, awe, loli nkani-nkani tukulonda pakuvwala inyumba yitu iyakumwanya yila, umwakuti chicho chifwe chimiliwe nu bumi.

⁵U Chala we yuyo atuyanizizya ivintu vinivi, sona atupa u Muzimu Umuzelu pakuba chikole icha vintu vyosi vivyo atisungiye.

⁶Polelo akabalilo kosi twizuye nu bujivu. Tuzimenye ukuti akabalilo kosi kako tukwikala mu mubili ngati ko kaya kitu, kokuti tuchili tute mukaya aka Mwene.

⁷Pakuti ubumi bwitu bughonite palwitiko, butaghonite pavintu vivyo tukuvyennya na maso, awe.

⁸Aswe twizuye nu bujivu nkani, sona tungighana nkani ukuti ngali twepamo mumubili witu ughu nukwikala nu Mwene kukaya kache.

⁹Manyi tuli mukaya kitu muchisu ichapasi ichi, manyi kuko ali, ifundo yitu yakuti tumuhobosye u Mwene.

¹⁰Pakuti twebosi tubaghiye twime pamaso pa Mulongi u Kilisitu. Umuntu wesi akwiza pakupokela chicho chimubaghiye, ichiza pamo ichibibi, ukuyana na mumo akabombezyanga umubili wache pachisu ichapasi pano.

¹¹Aswe tumenye pakumunyila u Mwene, tukuyezya pakudeba abanji. U Chala atumenye mumo tubeleye, sona inkusubila ukuti namwe bulo mumoyo ghinyu mutumenye aswe.

¹²Tutakuyezya sona ukwipala twebene kukwinyu, loli tukuyezya pakubapa pachifukwa ichakuti mwituvikizyanje naswe, umwakuti mungabamula abantu babo bakwituvya pachifukwa icha vintu vivyo vikuboneka na maso nukuchila ivintu vivyo vili mumoyo.

¹³Nanti abantu bakwinong'ona ukuti tupunganite, momumo tupunganite pachifukwa icha Chala. Loli nanti tutapunganitepo, zili bunubu pachifukwa icha mwemwe.

¹⁴Ulughano ulwa Kilisitu lukutulaghila. Pakuti ilelo twamanya ukuti umuntu weka akabafwila abantu bosi, kokuti abantu bosi bakafwa.

¹⁵Umwene akatufwila twebosi ukuti abantu bosi babo bali nu bumi, batakabe nu bumi ubwakwihobosya bene, loli babanje nu bumi ubwakumuhobosya mwene yuyo akatufwila nukuzyuka kubufwe pachifukwa icha babo.

¹⁶Polelo ukwandila akabalilo aka, tutakumulonga nayumo umuntu ukuyana ni nyinong'ono izya buntu. Napapo pakabalilo kamo tukamulonga u Kilisitu ukuyana ni nyinong'ono izya buntu, tutakubombapo nalumo-lumo bunubu.

¹⁷Polelo nanti umuntu amamatilana poka nu Kilisitu, aba chipeliwa ichipya, ubukali bwamala, ubupya bwafika.

¹⁸Zyosi zinizi zikabombiwa nu Chala, yuyo akatusayannya nawe ukwendela mwa Yesu Kilisitu nukutupa imbombo iyakulumbilila nizya kusayana,

¹⁹ukuti u Chala akasayannyanga abantu bosi pachisu ichapasi ichi nu Chala umwenecho ukwendela mwa Kilisitu ukusita ukwennya imbibi zyabo. Po umwene akatupa amazyu aghakunena nizya kusayana.

²⁰Aswe twe bimilili ba Kilisitu, ngati po u Chala akubalambilizya ukwendela mumwitu. Tukubalaba mwitabwa ilya Yesu Kilisitu ukuti musayane sona nu Chala.

²¹U Yesu atakanangapo nachimo, loli u Chala akamupela ngati po wambibi pachifukwa icha sweswe ukuti ukwendela mumwache tunganeniwa pakuba bantu abagholosu pamaso pa Chala.