Read lambya EFESO 4 Bible Online

EFESO 4 - lambya bible

EFESO 4

¹Ane indi mujele pachifukwa icha mbombo iya Mwene, inkubalaba ukuti mwikalaye nu bumi bubo u Chala akalondagha ukuti mubanje nabo, bo akubitizya.

²Akabalilo kosi mubanje mwe bakwiyisya, sona bololo. Mubanje mwe bafisalyoyo nukwivwana mulughano.

³Muyezyanje nkani pakusunga ubupoka bwinyu bubo bukufuma kwa Muzimu Umuzelu ukwendela mu mutende, ghugho ghukubapinyannya poka.

⁴Ghuliko umubili ghoka, sona aliko u Muzimu Umuzelu weka, ukuyana na mumo lubeleye ulusubilo loka, lulo u Chala abitizizye nalo.

⁵Aliko u Mwene weka, luliko ulwitiko loka, sona luliko ulozyo loka.

⁶Aliko u Chala weka, yuyo we Tata uwa twebosi. Ali pamwanya pa bosi, yuyo akubomba imbombo ukwendela mu bantu bosi, sona yuyo akwikala mu bantu bosi.

⁷Loli pope bulo umuntu wesi uwa aswe akapokela ichabupi ichache ni chache ukuyana na mumo u Kilisitu akupela ivyabupi vyache.

⁸Amasimbo ghakuti, “Bo akukwela kumwanya, akasenda akabukatila aka bakayidi abinji nukukwela nabo, sona akabapa abantu ivyabupi.”

⁹Amazyu ghagho ghakuti, “akakwela kumwanya” nkimba ghakung'anamula choni? Ghakung'anamula ukuti akanda tasi pakwika kusi ukwenecho ukwa chisu ichapasi.

¹⁰Po yuyo akika we yuyo akakwela ukuchila kumwanya, ukuti ivintu vyosi vibanje vyizule na yuyo umwenecho.

¹¹Akaba we yuyo akabapa abantu ivyabupi ivyakuti bamo babanje batumiwa, abanji babanje balaghuzi, abanji babanje balumbilili, abanji babanje baputi, sona abanji babanje bamanyisi.

¹²Imbombo iya bantu banaba yakuti babayanizye zila abantu aba Chala ukuti babombaye imbombo iyakuchizenga ichipanga, chicho mubili uwa Kilisitu

¹³mupaka ukuti pabumalilo twebosi tukafike kubupoka mulwitiko, sona nukumumanya u Mwana uwa Chala. Po tukwiza pakukula naloli mubuzimu nukufika pa bukuzi ubwa Kilisitu.

¹⁴Po tutakwiza pakuba sona ngati bo babonda, babo bakuyingana-yingana na mayigha, sona nu kupupuka ni mpepo iya chimanyisyo icha bantu abamyasi, babo bakubapuvya abantu nu buchevu bwabo.

¹⁵Loli pakunena ubwanaloli mulughano, tubaghiye pakukulila mwa Kilisitu muvintu vyosi, yuyo mutu.

¹⁶Akulaghila umubili ghosi nukughumamatizya poka ni nkole zyache. Bunubu ichigaba chosi chikubomba imbombo yache, po umubili ghosi ghukukula nukwizenga mulughano.

¹⁷Po inkubabuzya zinizi, sona inkubasimikizya mwitabwa ilya Mwene ukuti mutakikalaye ngati mwe bantu abakuzi, babo inyinong'ono zyabo zyabulo.

¹⁸Inyinong'ono zyabo zili muchisi, sona bisabuyeko ku bumi ubwa Chala, pachifukwa ichakusita kumanya kwabo, kuko kwizuye mumoyo ghabo amakafu.

¹⁹Bate ni soni, sona bibikite bene muvintu ivibibi ukuti babombaye ivinyonywa vyosi ivyakulekana-lekana umwakusita ukunyila.

²⁰Loli mute momumo mukamanyilila nizya Kilisitu!

²¹Naloli mukivwa nizya yuyo, sona mukamanyiziwa nizya yuyo ukuyana nu bwanaloli bubo buli mwa Yesu.

²²Polelo mubuvule ubuntu bwinyu ubukali bubo bukayana nu bumi bwinyu ubukali bula, sona bubo bwananganika pachifukwa icha vinyonywa vyache ivyabumyasi.

²³Amoyo ghinyu ni nyinong'ono zyinyu vyipelaye pakuba vipya,

²⁴sona muvwale ubuntu ubupya bubo u Chala akabupela muchifwani chache pakuba bugholosu, sona buzelu.

²⁵Polelo muleke pakutamanta. Umuntu wesi anenaye ubwanaloli nu mupalamani wache, pakuti twebosi twe vigaba ivya mubili ghoka.

²⁶Nanti wakalala, utakawilaye mumbibi, sona utakakalalaye mupaka izuba lyinjile.

²⁷Utakamupe u Satana ulusako.

²⁸Umuntu yuyo akibagha, atakibaye sona, loli abombaye ni nyobe zyache ichintu chicho chiza, umwakuti angaba navyo vimo ukuti angagabana na babo bakusobelwa.

²⁹Mumalomo ghinyu mutakafumaye ineno imbibi, loli mufumaye amazyu amiza ghene aghakubazenga abanji ukuyana ni vyakusobelwa vyabo, ukuti ghabanje ghakubavwa babo bakughateghelezya.

³⁰Mutakamupelelaye ichitima u Muzimu Umuzelu uwa Chala, pakuti we yuyo chikole chache mumwinyu ichakuti mwe bantu bache, sona ni chakuti Isiku likwiza, lilyo u Chala akwiza pakubasatula.

³¹Mwefezye zila ulubengo mumwinyu, nu bukali, sona nu kukalala. Kutakabeko sona ivyongo pamo iyebo, sona nu kwinong'onelana ivibibi.

³²Loli mubanje mwe bachisa, sona na bololo na bantu abanji. Muhobokelanaye ukuyana na mumo u Chala akabahobokela ukwendela mwa Kilisitu.