Read lambya FILIPI 3 Bible Online

FILIPI 3 - lambya bible

FILIPI 3

¹Pabumalilo, bakamu bane, inkunena ukuti, “Muhobokaye mwa Mwene.” Chitakunditisya napo panandi pakupyanizya sona amazyu ghagho nasimba kale, pakuti chintu chimo chicho chingabavwa ukuti mutakilamwe.

²Muchebaye nimbwa zinizi, abantu babo bakubomba ivinyazu. Muchebaye na bantu babo bakwibolannya-bolannya amabili.

³Pakuti aswe twe basilimuliwa abanaloli, twe tukumuchindika u Chala umwakulongoziwa nu Muzimu Umuzelu, sona tukuhoboka mubumi bwitu ubwakumamatilana poka nu Kilisitu u Yesu. Aswe tutakusubila inyiho izya mubili,

⁴napapo nane bulo indi ni chifukwa ichakusubila inyiho izya mubili. Nanti weka akwinong'ona ukuti ali ni chifukwa ichakuti angasubila inyiho izya mubili, nane indi ni chifukwa ichakuchilapo.

⁵Pakuti inkasilimuliwa pisiku ilya eyiti. Ane ne mu Izilayeli mukapapiliwe, uwaluko ulwa Benjamini, sona umu Hebeli umwenecho. Pakunena nizya ndaghilo izya Chiyuda, ane inkaba ne uwa kabukatila aka ba Falisayi.

⁶Inkaba nu lweke nkani umwakuti inkachivwima ichipanga. Pakunena nizya muno umuntu akuneniwa pakuba mugholosu pakukonka Indaghilo, ane intakaba ni chilema nachimo-chimo.

⁷Ivintu vivyo kale inkavyennyanga ukuti vili ni mbombo, ilelo inkuvyennya ukuti vite sona ni mbombo pachifukwa icha zizyo u Kilisitu akabomba.

⁸Momumo, vyosi bulo inkuvyennya pakuba visita imbombo, pakuti imumenye u Yesu Kilisitu u Mwene wane. Pachifukwa ichi, inkutagha ivintu vyosi, sona inkusenda ivintu vyosi pakuba mintu bulo umwakuti ubukabi bwane bubanje we Kilisitu,

⁹sona chicho inkulonda chakuti imamatilane poka nawe. Intanginena pakuba mugholosu pa nemwene pakuzikonka Indaghilo, loli pakusubila mwa Yesu Kilisitu. Ubugholosu ubwakufuma kwa Chala bwimite palwitiko.

¹⁰Chicho inkulonda chakuti imumanye u Kilisitu, sona nukuti imanye amaka ghagho ghakamuzyusya kubufwe. Inkulonda sona ukuti ingabane nawe amayimba ghache nu kuba ngati we yuyo mu bufwe bwache.

¹¹Nane bulo indi nu lusubilo ulwakuti inkwiza pakuzyuka kubufwe.

¹²Intakunena ukuti napota kale, pamo ne wakufikapo kale, awe. Loli indi nu lweke ukuti indeme umuvwalo, ghugho u Kilisitu u Yesu akandemela ukuti imbanje wache.

¹³Mwee bakamu bane, intakwinong'ona ukuti napota kale, awe. Loli pali ichintu choka chicho inkubomba: Inkuluvya ivya mwisinda, sona indi nu lweke nkani pakunyululukila ivya muntazi.

¹⁴Inkuchimbilila ku bufiko ubwa nyangalo ukuti impokele umuvwalo kumwanya, ghugho u Chala anyitizizyako ukwendela mwa Kilisitu u Yesu.

¹⁵Aswe twebosi twe tukulite mubuzimu tubaghiye pakuba ni nyinong'ono zinizi. Sona nanti balipo abantu bamo babo bali ni nyinong'ono izinji, u Chala akwiza pakubavumbulila pabuzelu.

¹⁶Loli ukuyana na mumo vingabela, zagha twendelele pakubuka muntazi ukuyana ni ndaghilo zizyo twakonka mupaka ilelo.

¹⁷Mwee bakamu bane, mwendelele pakweghelela ubumi bwane, sona mubenelezyanje abantu babo bakukonka ichifwanikizyo chicho tukabapa.

¹⁸Pakuti nabanga inkubabuzya kabili-kabili, po ilelo inkupyanizya sona pakulila na masozi, ukuti balipo abantu abinji, babo inkalo yabo yikulanjizya ukuti balwani ba chipinjika icha Kilisitu.

¹⁹Ubumalilo ubwa bantu banaba, ko kuzimila, pakuti u chala wabo zyo nyanda zyabo. Bakwituvikizya ni vintu vivyo babaghiye pakukoziwa navyo isoni. Amoyo ghabo ghali pavintu ivya muchisu ichapasi.

²⁰Loli aswe akaya kitu kali kumwanya, sona ko kuko tukulindilila Umupoki witu u Yesu Kilisitu.

²¹Umwene akwiza pakwandula amabili ghitu ghagho ghakufwa nukughapela ukuti ghabanje ngati gho mubili wache uwabuchindamu ukwendela mu maka ghache aghakupotela nagho ivintu vyosi.