Read lambya KOLOSI 1 Bible Online

KOLOSI 1 - lambya bible

KOLOSI 1

¹Ane ne Pabuli, umutumiwa uwa Kilisitu u Yesu mubwighane ubwa Chala, sona indi poka nu mukamu witu u Timoti.

²Tukubasimbila amwe mwe bakamu bitu abazelu, sona mwe basubiliwa mwa Kilisitu, amwe mwe mukwikala mu Kolosi. Ichisa nu mutende ivyakufuma kwa Chala u Tata witu vibanje namwe.

³Akabalilo kosi tukumupalizya u Chala, u Tata uwa Mwene witu u Yesu Kilisitu, bo tukubiputila amwe.

⁴Pakuti twivuye mumo mukusubilila mwa Kilisitu u Yesu, sona na mumo mukubaghanila abantu bosi abazelu aba Chala.

⁵Bo Amazyu Amiza, ghagho mazyu ghanaloli, ghalumbililiwa tasi kukwinyu, mukivwa nizya lusubilo lulo lukupa. Po ulwitiko lwinyu, sona nu lughano lwinyu vyimite pavivyo mukulindilila, vivyo visungiwe akiza nkani kumwanya.

⁶Amazyu Amiza ghakwendelela pakwela iseke nukusata muchisu chosi ichapasi ukuyana na mumo zikabela mumwinyu, ukwandila pisiku lilyo mukaghivwa, sona nu kwivwisya nizya chisa icha Chala.

⁷Mukamanyila nizya chisa icha Chala kwa Epafula, umubombi uwamwitu umughaniwa, yuyo mubombi umusubiliwa uwa Kilisitu mubuyo bwitu.

⁸Umwene akatupangila aswe nizya lughano, lulo u Muzimu Umuzelu akabika mumwinyu.

⁹Pachifukwa ichi, ukwandila mumo tukivwila, tutakalekapo nalumo-lumo pakubiputila. Tukumulaba u Chala ukuti abizuzye amwe na mahala, sona na kivwisizye aka ivintu vivyo u Muzimu Umuzelu akupa, umwakuti mwivwisye vivyo akulonda.

¹⁰Pene po mukwiza pakwikalagha ukuyana na mumo u Mwene akulondela, sona akabalilo kosi mukwiza pakubombagha chicho chikumuhobosya nkani. Ubumi bwinyu bukwiza pakupa iseke inyiza, sona amahala ghinyu aghakumumanyila u Chala ghakwiza pakonjelela-konjelela.

¹¹Tukwiputa sona ukuti u Chala abakazye na maka ghache ghosi agha buchindamu, umwakuti mubanje bajivu nkani, na bafisalyoyo, sona na bahobosu.

¹²Tukwiputa ukuti mumupalizyanje u Tata, yuyo akabapela amwe ukuti mugabane nabo ichilingo, chicho abasungilagha abantu bache abazelu mu bumwene ubwa lukozyo.

¹³Pakuti akatupoka kumaka agha chisi, nukutwinjizya mu bumwene ubwa Mwana wache umughaniwa.

¹⁴Ukwendela mwibanda lyache, akatusatula ku mbibi, kokuti akatuhobokela imbibi zyitu.

¹⁵U Kilisitu we chifwani icha Chala yuyo atakuboneka na maso, sona we katote yuyo ali pamwanya pavipeliwa vyosi.

¹⁶Pakuti ukwendela mumwache, u Chala akapela ivintu vyosi ivya kumwanya nivya muchisu ichapasi ichi, ivyakuboneka na maso, sona ni visita ukuboneka na maso, manyi bamwene, manyi basongo-songo, manyi balaghili, manyi bamaka. U Chala akapela ivintu vyosi ukwendela mumwache.

¹⁷U Kilisitu akabako kale, bo ni vintu vyosi vinivi vitaliko, sona ukwendela mumwache ivintu vyosi vinivi vikumamatilana poka.

¹⁸Umwene we mutu uwa mubili wache, chicho chipanga. Umwene we mbwibwi iyabumi ubwa mubili wache, sona we Mwana ukatote, yuyo akazyuka kubufwe, umwakuti abanje wakwanda pavintu vyosi.

¹⁹Pakuti chikamuhobosya u Chala ukuti ubwachala bwache bosi bubanje mu Mwana wache.

²⁰Ukwendela mu Mwana wache u Chala akalondagha ukuti ivintu vyosi visayane nawe, manyi vya muchisu ichapasi ichi, manyi vintu ivya kumwanya pakupanga umutende ukwendela mwibanda ilya Mwana wache pachipinjika.

²¹Akabalilo kamo amwe mukaba kubutali nu Chala, sona mukaba balwani bache, pachifukwa icha nyinong'ono zyinyu, sona ni mbombo zyinyu imbibi.

²²Loli ilelo, ukwendela mu bufwe ubwa Mwana wache, u Chala abasayannya nawe, umwakuti mubanje bantu abazelu, sona mubanje basita chilema nachimo-chimo, pamo abasita nayimo-yimo inongwa pantazi papache.

²³Loli mubaghiye mwendelele pakwikalana nkani palwalo ulwa lwitiko lwinyu, ukusita ukuyingana mulusubilo lwinyu, lulo lukufuma ku Mazyu Amiza, ghagho mukivwa. Amazyu Amiza agha ghakalumbililiwa pakasi pa bantu bosi aba muchisu ichapasi. Po u Chala we yuyo akampa ane ne Pabuli, imbombo iyakuti ingalumbilile.

²⁴Ilelo ane nemwene nahoboka nkani nu kuyimba kwane pachifukwa icha mwemwe. Pakuti ukuvwimiwa kuchili kukwendelela pakuyana na mumo u Kilisitu akavwimiliwa. Nane bulo inkusendapo ichigaba mukuvwimiwa kuko u Kilisitu akakomana nako pachifukwa icha mubili wache, chicho chipanga.

²⁵Po ane ne mubombi uwa chipanga, pakuti we Chala yuyo akampa imbombo yiniyi iyakuti imbalumbilile amazyu ghache umwakufikapo.

²⁶Amazyu ghanagha ghafisiwe akabalilo akatali, sona na ku nkulilo zyosi, loli ilelo ghavumbuliwa ku bantu bache.

²⁷Chicho u Chala akulonda chakuti abavumbulile abantu bache izya kubusyefu, chicho bukabi nu buchindamu pakasi pa bantu aba inko zyosi. Izya kubusyefu zinizi zyakuti u Kilisitu akwikala mumwinyu, chicho chikusimikizya ukuti mukwiza pakugabana ubuchindamu ubwa Chala.

²⁸U Kilisitu we yuyo tukulumbilila pakasi bantu bosi. Na mahala ghosi tukubasoka nu kubamanyizya, umwakuti abantu bosi bize kwa Chala pakuba bantu abakufikapo mwa Kilisitu.

²⁹Ichi cho chifukwa inkwiyula nkani, ukuyana na maka ghagho u Kilisitu akumpa, ghagho ghakubomba imbombo mumwane.