Read lambya KOLOSI 3 Bible Online

KOLOSI 3 - lambya bible

KOLOSI 3

¹Pakuti amwe mwazyuka kubufwe poka nu Kilisitu, po bika amoyo ghinyu pavintu ivya kumwanya, kuko u Kilisitu akwikala pachitengo chache kunyobe indilo iya Chala.

²Bika inyinong'ono zyinyu pavintu ivya kumwanya, mutakabikaye inyinong'ono zyinyu pavintu ivya muchisu ichapasi ichi.

³Pakuti kale mukafwa, sona ubumi bwinyu bufisiwe poka nu Kilisitu mwa Chala.

⁴Ubumi bwinyu ubwenecho we Kilisitu, po bo akuboneka, namwe bulo mukwiza pakuboneka poka nawe nukugabana poka nawe ubuchindamu bwache!

⁵Polelo ghogha ivinyonywa vyosi ivya moyo ghinyu vivyo vikakatiye ivintu ivya muchisu ichapasi ichi: Ubwamalaya, nu bunyazu, nu bubibi, sona nu bupavu. Pakuti ubupavu ko kwiputa ivifwani.

⁶Pachifukwa icha vintu ivi, ubukali ubwa Chala bukwiza pakubawila abantu babo batakumwivwila.

⁷Namwe bulo kale inkalo yinyu yikayanagha bulo ni yabo, akabalilo kako mukakonkagha ivinyonywa vinivi.

⁸Loli ilelo mutakabombe sona ivintu ivi: Ubukali, nu ukukalala, nu kwinong'onelana ivibibi, sona ni yebo. Ineno iya mwiko yitakabemo mumalomo ghinyu.

⁹Mutakatamantilanaye pakuti mwavula ubuntu bwinyu ubukali, poka ni mbombo zyache zyosi,

¹⁰sona mwavwala ubuntu ubupya. Ubu buntu ubupya bubo Umupeli winyu akubupela sona pakuba bupya isiku ni siku muchifwani chache, umwakuti naloli mumumanye yuyo umwakufikapo.

¹¹Mubumi ubupya ubu, patalipo sona ukulekana pakasi pa mu Yuda nu muntu yuyo ate mu Yuda, pakasi pa musilimuliwa pamo umusita ukusilimuliwa, umuntu muyeni pamo umuntu yuyo ate mumanyi, umuzya pamo umuntu umusatuke, loli u Kilisitu we vyosi, sona akwikala mu bosi.

¹²Pakuti mukasaliwa nu Chala ukuti mubanje mwe bantu abache na bache, sona nukuti umwene abaghanite. Mubanje mwe balupasikizyo, na bachisa, na bakwiyisya, na bololo, sona na bafisalyoyo.

¹³Mwivwanaye mwebene-bene nu kuhobokelana nanti yumo mumwinyu ali na milumbuzyo nu wamwabo. Mubaghiye muhobokelanaye ukuyana na mumo u Mwene akabahobokelela.

¹⁴Ukonjelezyapo pavyosi vinivi, mubanje nu lughano, pakuti ulughano lo lulo lukumamatizya poka vyosi umwakufikapo.

¹⁵Umutende uwakufuma kwa Kilisitu ghubalongozye mumoyo ghinyu, ghugho u Chala akabitizizya ukuti mubanje nu mutende ghunughu, pakuti mwe vigaba ivya mubili ghoka. Mubanje mwe bantu bakupalizya.

¹⁶Amazyu agha Kilisitu ghikalaye mumoyo ghinyu umwakufikapo. Mumanyizannyanje nu kusokana na mahala ghosi. Mumwimbilaye u Chala na mapalo mumoyo ghinyu, bo mukwimba nyimbo izya masalimo, ni nyimbo izya kumupala, sona ni nyimbo izya buzimu.

¹⁷Chosi chicho mukubomba, manyi mukanenele, manyi mumbombo, mubombelaye mwitabwa ilya Mwene u Yesu, bo mukumupalizya u Chala u Tata ukwendela mumwache.

¹⁸Mwe bachi, mubivwilaye abalume binyu, pakuti zyo zizyo mubaghiye pakubomba pakuti mwe bantu aba Mwene.

¹⁹Namwe bulo mwe balume, mubaghanaye abachi binyu, sona mutakabanje bakali kukwabo.

²⁰Mwe bana, mubivwilaye abapapi binyu muvintu vyosi, pakuti ichi chikumuhobosya nkani u Mwene.

²¹Namwe bulo mwe bapapi, mutakabakalalizyanje abana binyu, ukuti batakawe amaka.

²²Mwe bazya, mwivwilaye abamwene binyu aba muchisu ichapasi ichi muvintu vyosi. Mutakabivwilaye bulo pene papo bali pakubenelezya pambombo ukuti babapale, loli mubivwilaye na moyo ghinyu ghosi, ichifukwa mukumunyila u Mwene.

²³Chosi chicho mukubomba, mubombaye nu moyo winyu ghosi, ngati po mukumubombela u Mwene, abantu awe,

²⁴pakuti muzimenye ukuti mukwiza pakupyana ichilingo pakuba gho muvwalo winyu. U Kilisitu we Mwene umwenecho yuyo mukumubombela.

²⁵Umuntu wesi yuyo akubomba imbibi akwiza pakupokela ukuyana ni mbombo zyache, pakuti u Chala atakulonga umuntu pakwennya icheni, awe.