Read lambya 2 TESALONIKA 1 Bible Online

2 TESALONIKA 1 - lambya bible

2 TESALONIKA 1

¹Ane ne Pabuli, poka nu Silivana, sona nu Timoti. Tukuchisimbila ichipanga icha mu Tesalonika, chicho cha Chala u Tata, sona nu Mwene u Yesu Kilisitu.

²Ichisa nu mutende ivyakufuma kwa Tata u Chala nu Mwene u Yesu Kilisitu vibanje namwe.

³Bakamu bitu, tubaghiye pakumupalizya u Chala akabalilo kosi pachifukwa icha mwemwe. Chitubaghiliye sona pakubomba bunubu, pachifukwa ichakuti ulwitiko lwinyu lukukula nkani, sona nukuti mughananite nkani mwebosi.

⁴Ichi cho chifukwa aswe tukwituvya nizya amwe mu vipanga ivya Chala. Tukwituvya nizya bufisalyoyo bwinyu, sona nu lwitiko lwinyu mukuvwimiwa na mumayimba ghinyu ghosi ghagho mukukomana nagho.

⁵Vyosi vinivi vikusimikizya ukuti ubulongi ubwa Chala bugholosu. Chicho u Chala akulonda chakuti mubanje bantu bakubaghila ukwinjila mu Bumwene bwache, bubo mukuyimbilapo.

⁶U Chala mugholosu, po akwiza pakutanizya amayimba abantu babo bakubapelela amayimba,

⁷sona akwiza pakubapa ubutuzyo amwe mwe mukuyimba, poka naswe bulo. Akwiza pakubomba zinizi bo u Mwene u Yesu avumbuliwa kumwanya nu moto uwakwaka, poka na bantumi bache abamaka.

⁸Akwiza pakubafunda abantu babo bakumukana u Chala, sona na babo batakwivwila Amazyu Amiza aghakunena nizya Mwene witu u Yesu.

⁹Bakwiza pakuyimba nu lufundo ulwa bwila na bwila, batakwiza pakwennyapo nalumo-lumo icheni icha Mwene, pamo ubuchindamu ubwa maka ghache.

¹⁰Pisiku lila-lila akwiza pakupeghiwa umuchizi na bantu bache bosi abazelu, sona akwiza pakuchindikiwa na bantu bache bosi babo bakusubila. Namwe bulo mukwiza pakuba nabo, ichifukwa mwasubila amazyu ghagho tukababuzya.

¹¹Ichi cho chifukwa tukubiputila amwe akabalilo kosi ukuti u Chala witu abapele pakuba bantu bakubaghila mubumi bubo umwene akabitizizya. Na maka ghache, u Chala abavwe amwe pakubomba zizyo mukulonda pakuzibomba, sona nukuti mukwanilisye zyosi zizyo mukubomba ukwendela mu lwitiko lwinyu,

¹²umwakuti itabwa ilya Mwene witu u Yesu lichindikiwanje mumwinyu, sona namwe muchindikiwanje mumwache ukuyana ni chisa icha Chala witu nu Mwene u Yesu Kilisitu.