Read lambya HEBELI 13 Bible Online

HEBELI 13 - lambya bible

HEBELI 13

¹Endelela pakughanana pakuti mwe bakamu.

²Mupokelaye akiza abayeni munyumba zyinyu. Pakuti pakubomba bunubu abantu bamo bakapokela abantumi aba Chala umwakusita ukuzimanya.

³Mubakumbukaye abantu babo bali mujele, ngati po namwe bulo muli mo mujele poka nabo. Mubakumbukaye abantu babo bali muntamyo ngati po namwe bulo mukutamiwa poka nabo.

⁴Isendwa yichindikiwanje na bantu bosi, umuchi nu mulume basubilanaye. Pakuti u Chala akwiza pakubalonga abamalaya na balowe.

⁵Amoyo ghinyu ghatakabanje ghakughana ndalama, mwikutaye na vivyo muli navyo. U Chala akati, “Intakwiza pakubaleka. Intakwiza pakubataghapo nalumo.”

⁶Po zagha tunene nu bujivu ukuti, “U Mwene we mwavwilizi wane, intakwiza pakunyila. Nkimba po umuntu angabomba choni kukwane?”

⁷Mubakumbukaye abalongozi binyu babo bakababuzyanga amazyu agha Chala. Mukumbukaye namumo bakikalilagha, sona na mumo bakafwila, po mweghelelaye ulwitiko lwabo.

⁸U Yesu Kilisitu ali mumo abeleye, mumabwila, nilelo, sona bwila na bwila.

⁹Mutakitikizyanje ivimanyisyo iviyeni ivyakulekana-lekana ukuti vibapuvye. Chizapo ukuti umoyo witu ghukaziwanje ni chisa icha Chala, pate pakukonka indaghilo izya vyakulya zizyo zitabavwizye abantu babo bakazikonkagha.

¹⁰Tuli ni chighemo papo na baputi aba Chiyuda bulo babo bakubomba mubuyo ubwakwiputilamo, batakwitikiziwa pakulyela pachighemo pala.

¹¹Umuputi Usongo nkani akwinjila ni banda ilya chinyamana mu Chipinda Ichizelu nkani ukuti abike ichakwiyipa ichakuhobokela imbibi. Loli inyama yila yikocheliwa kuzi ukwa visakasa.

¹²Ichi cho chifukwa u Yesu wepe akafwila kuzi ukwa kaya akakulu nkani, umwakuti aswefye imbibi izya bantu ni banda ilyache ni lyache.

¹³Po twende, tubukaye kukwache kuzi ukwa visakasa ukuti tusamuliwe poka nawe.

¹⁴Pakuti muchisu ichapasi ichi tute na kaya akakulu nkani aka bwila na bwila, awe. Loli tukulonda akaya akakulu nkani kako kakwiza.

¹⁵Polelo zagha tubikaye amapalo kwa Chala akabalilo kosi ukwendela mwa Yesu. Ichi cho chakwiyipa chitu, chicho uluseke ulwa milomo yiyo yikwitika ukuti we Mwene.

¹⁶Mutakaluvyanje pakubombelana ubwiza nukugabana vivyo muli navyo, pakuti ivi vyo vyakwiyipa vyitu vivyo vikumuhobosya u Chala.

¹⁷Mubivwilaye abalongozi binyu nu kukonka zizyo bakubabuzya. Abene bakwenelezya ubumi bwinyu pakuti bakulingannya nizya mbombo yabo kwa Chala. Nanti mukubivwila, bakwiza pakubomba imbombo yabo nu buhobosu. Loli nanti mutakubivwila bakwiza pakuyibomba imbombo yabo ni chitima, chicho chitangabavwa amwe.

¹⁸Mutwiputilaye pakuti tuli nu bwanaloli ubwakuti umabyebye witu mwiza, ichifukwa tukulonda pakubomba chicho chigholosu akabalilo kosi.

¹⁹Nkani-nkani inkubalaba ukuti mwiputaye ukuti u Chala anyosezye sona kukwinyu lubilo-lubilo.

²⁰U Chala we mwenecho uwa mutende yuyo akamuzyusya kubufwe u Mwene witu u Yesu ukwendela mwibanda ilya lufingo ilya bwila na bwila, sona yuyo we Mudimi usongo nkani uwa ng'ozi.

²¹U Chala abape amwe ivyiza vyosi ukuti mubombaye ubwighane bwache nu kubomba mumwitu ukwendela mwa Yesu Kilisitu zizyo zikumuhobosya. Po u Kilisitu achindikiwanje bwila na bwila! Ameni!

²²Mwee bakamu bane, inkubalaba ukuti mughateghelezye akiza amazyu aghalukazyo ghagho nabasimbila mwakalata umupimpa uyu.

²³Inkulonda mumanye ukuti umukamu witu u Timoti afuma mujele. Nanti angiza lubilo-lubilo, inkwiza nawe poka pakubennya.

²⁴Mubalamuke abalongozi binyu bosi na bantu bosi aba Chala. Abakamu aba mu Itale bakubalamuka.

²⁵Ichisa icha Chala chibanje namwe mwebosi.