Read lambya HEBELI 8 Bible Online

HEBELI 8 - lambya bible

HEBELI 8

¹Ifundo iyenecho yiyo tukunena yo iyi: Tuli nawe Umuputi Usongo nkani yuyo ikaye kunyobe indilo iya chitengo icha buchindamu icha Chala kumwanya.

²Umuputi Usongo nkani yunuyu akubomba imbombo mu Chipinda Ichizelu nkani, ichisakasa ichenecho chicho chizengiwe nu Mwene, te ni nyobe izya bantu, awe.

³Umuputi wesi Usongo nkani akusaliwa ukuti abike ivyabupi ni vyakwiyipa kwa Chala. Polelo chikulondiwa ukuti Umuputi witu Usongo nkani wepe abanje nacho chimo ichakwiyipa.

⁴Nanti akabanga muchisu ichapasi, ngali ate muputi napo panandi bulo pakuti balipo kale abaputi, babo bakubika ivyabupi ukuyana ni Ndaghilo izya Chiyuda.

⁵Imbombo yiyo bakubomba chifwanikizyo bulo nu muzyezye uwa vivyo vili kumwanya. Ichi cho chifukwa u Chala akamusoka u Mozesi, bo ali papipi pakuzenga ichisakasa akati, “Wenelezye ukuti wabomba vyosi ukuyana na kapangile kako ukalanjiziwa pighamba.”

⁶Loli u Yesu apeghiwa imbombo iya buputi yiyo yapamwanya nkani ukuchila iyabo, ukuyana na mumo ulufingo lulo akabatika pakasi pa Chala na bantu bache lwiza nkani, ichifukwa lughonite pilayizyo ilya vintu ivyizapo.

⁷Nanti ulufingo ulwakwanda lukabanga ulusita chilema nachimo-chimo, po ngali ulufingo ulwabubili lutakalondiwa sona.

⁸Loli u Chala akabagha abantu bache ni chilema nukuti, “Amasiku ghakwiza ghagho inkwiza pakufingana ulufingo ulupya na ba Izilayeli, sona na baluko ulwa Yuda.

⁹Lutakwiza pakuyana nu lufingo, lulo inkafingana na banyenya babo, awe pisiku lilyo inkabalema panyobe pakubefyamo mu Ijiputi. Abene batakasunga ulufingo lwane, po nane inkabasulannya bulo.

¹⁰Ulufingo lulo inkwiza pakufingana na ba Izilayeli lo ulu: u Mwene akuti: Mumasiku ghagho ghakwiza Inkwiza pakubika indaghilo zyane munyinong'ono zyabo, nukuzisimba mumoyo ghabo. Inkwiza pakuba ne Chala wabo, po abene bakwiza pakuba bantu bane.

¹¹Nayumo-yumo umuntu yuyo akwiza pakumumanyizya umupalamani wache, pamo ukumubuzya umukamu wache ukuti, ‘Umumanye u Mwene.’ Pakuti bosi bakwiza pakummanya ane, abana abanandi na bantu abasongo bulo.

¹²Inkwiza pakubahobokela imbibi zyabo, sona intakwiza pakubukumbukapo nalumo-lumo ububibi bwabo.”

¹³Pakunena nizya lufingo ulupya, u Chala akung'anamula ukuti ulufingo ulwakwanda lwamala imbombo; pakuti chicho chamala imbombo chili papipi nukuzimila.