Read lambya YAKOBO 1 Bible Online

YAKOBO 1 - lambya bible

YAKOBO 1

¹Ane ne Yakobo umubombi uwa Chala, sona nu mubombi uwa Mwene u Yesu Kilisitu. Inkubalamuka abantu bosi aba Chala babo banyampanite muchisu chosi ichapasi ichi.

²Mwee bakamu bane, musekelaye bo mukukomana ni njelo izyakulekana-lekana,

³pakuti muzimenye ukuti nanti mukuyeliwa mulwitiko lwinyu, po mukuba bafisalyoyo.

⁴Loli ubufisalyoyo bwinyu bubombaye imbombo yache umwakuti mubanje bantu abakuzi mubuzimu, na bakufikapo, sona na basita ukusobelwapo nakamo-kamo.

⁵Nanti yumo mumwinyu akusobelwa amahala aghakubombela ichintu chimo, amulabe u Chala, po akwiza pakughapokela, pakuti u Chala akumupa umuntu wesi umwakusita ukumamilizya, sona umwakusita ukwilumbuzya.

⁶Loli bo akulaba, asubilaye mwa Chala, sona atakilamwe. Pakuti umuntu yuyo akwilamwa ayanite bulo na mayigha agha panyanja ghagho ghakuwesiwa ni mpepo uku na uku.

⁷Umuntu uwakwilamwa atakinong'onaye ukuti akwiza pakupokela akantu kamo kwa Mwene, awe.

⁸Pakuti umwene ali na moyo mabili, yuyo ali mumwanya-mwanya bulo pavintu vyosi vivyo akubomba.

⁹Umukilisitu yuyo mupina asekelaye, bo u Chala akumukwezya,

¹⁰sona umukilisitu yuyo mukabi wepe asekelaye, bo u Chala akumwisya. Pakuti abantu abakabi bakwiza pakumala ngati lyo liluba ilya muzi.

¹¹Izuba likufuma nukocha kwache, nukumizya isote. Iluba likulaghala, po ubwiza bwache bukumala. Umwakuyana bulo, umuntu umukabi yula akwiza pakuzimila, bo ikolezanizye ni mbombo zyache.

¹²Musayiwa umuntu yuyo akujimba nkani munjelo, pakuti nanti ajimba, akwiza pakupokela impumpu iyabumi yiyo u Chala akabalayizya abantu bache babo bamughanite.

¹³Nanti umuntu akuyeliwa ukuti abombe chimo ichibibi, atakanene ukuti, “U Chala akunjela.” Pakuti u Chala atangayeliwa nu bubibi, sona atakumuyelapo nayumo umuntu.

¹⁴Loli umuntu wesi akuyeliwa nanti ivinyonywa vyache ivibibi vikumuwesa nukumutegha.

¹⁵Po vyope ivinyonywa nanti vyakula mu muntu yula vikupapa imbibi, sona nanti imbibi yila-yila yakula yikupapa ubufwe.

¹⁶Mwee bakamu bane abaghaniwa mutakazimbuliwanje.

¹⁷Ichabupi chosi ichiza sona ni chakufikapo chikufuma kumwanya kwa Tata, Umupeli uwa nkozyo izya kumwanya, yuyo atakwanduka-kwanduka ngati gho muzyezye.

¹⁸Mubwighane bwache, akatupa ubumi ukwendela mu mazyu ghache aghanaloli, umwakuti tubanje nu buyo ubwakwanda pakasi pa vipeliwa vyache vyosi.

¹⁹Mwee bakamu bane abaghaniwa, muchimanye ichi: Umuntu wesi ateghelezyanje tasi, loli atakachimbililaye pakunena, sona atakakalalaye mwalwe.

²⁰Pakuti ubukali ubwa muntu butakumwavwa pakubomba chicho chigholosu pamaso pa Chala.

²¹Polelo leka ichizubizya chosi ichibibi, sona ni nkalo yosi imbibi mumwinyu. Mubanje bakwiyisya pakupokela amazyu ghagho u Chala akabyala mumoyo ghinyu. Amazyu ghanagha ghali na maka pakubapoka.

²²Mutakizimbulaye mwebene pakwivwa bulo amazyu. Loli mubombaye zizyo amazyu ghakunena.

²³Pakuti nanti umuntu akwivwa bulo amazyu, loli atakubomba zizyo amazyu ghakunena, umuntu yunuyu ayanite bulo nu muntu yuyo akwiyennya pigalasi mumo icheni chache chibeleye, loli atakubombapo nachimo-chimo.

²⁴Po bo iyennya, akwepapo lubilo-lubilo nukuluvya mumo icheni chache chibeleye.

²⁵Loli nanti umuntu akuzyenelezya indaghilo izyakufikapo izya Chala, zizyo zikumusatula umuntu nukubomba zizyo amazyu ghakunena, sona atakuluvya zizyo akwivwa, naloli u Chala akwiza pakumusaya muvyosi vivyo akubomba.

²⁶Nanti umuntu akwipima ukuti akumwiputa u Chala, loli atakululema ululimi lwache, akwizimbula bulo, sona ukwiputa kwache kwabulo.

²⁷Ichiputo ichanaloli, chicho chite ni chilema pamaso pa Chala u Tata cho ichi: Ukubasungilila abana abalanda na bakolo abafwilwe muntamyo zyabo, sona nukwisungilila wemwene ukuti utakinyazyanje ni vintu ivya muchisu ichapasi.