Read lambya 2 PITALA 1 Bible Online

2 PITALA 1 - lambya bible

2 PITALA 1

¹Ane ne Simoni Pitala, umubombi, sona nu mutumiwa uwa Yesu Kilisitu. Inkubasimbila ukalata uyu abantu babo bapokelite ulwitiko lulo tukapokela ukwendela mu bugholosu ubwa Chala witu, sona nu Mupoki u Yesu Kilisitu.

²U Chala abapelele ichisa nukubapa umutende uwakufikapo pachifukwa icha kumumanya yuyo, sona nu Yesu u Mwene witu.

³U Chala na maka ghache akatupa ivintu vyosi ivyakutwavwilizya ukuti tubanje nu bumi ubwa nyiputo pakutumanyizya nizya yuyo. Akatwitizya ukuti tugabane nawe ubuchindamu nu bwiza bwache ubukulu.

⁴Ichi cho chifukwa akatupa ivintu ivikulu nkani ni vyapamwanya, vivyo akatulayizya aswe, umwakuti namwe bulo mupone ivinyonywa ivya muchisu ichapasi ichi, sona nukuti mupokele ubumi ubwa Chala.

⁵Polelo muyezye pakwiyula nkani ukonjelezya inkalo yinyu inyiza palwitiko lwinyu, pa bwiza bwinyu monjelezyepo amahala,

⁶pa mahala ghinyu monjelezyepo ukwilema, pa kwilema kwinyu monjelezyepo ubufisalyoyo, sona pa bufisalyoyo bwinyu monjelezyepo ukumwiputa u Chala.

⁷Pakumwiputa kwinyu u Chala monjelezyepo ichisa icha bukamu, sona pachisa icha bukamu monjelezyepo ulughano.

⁸Pakuti nanti muli navyo ivintu vyosi vinivi mubwinji bwache, vitakwiza pakubapela pakuba mwe bantu abakata, sona vikwiza pakubapa amahala aghakumumanyila u Mwene witu u Yesu Kilisitu.

⁹Loli nanti umuntu ate navyo ivintu vinivi, kokuti mufwamaso nukuti atangennya pa butali, sona aluvizye ukuti imbibi zyache inkali zikaswefiwa.

¹⁰Polelo bakamu bane muyezye nkani ukuchilapo pakusimikizya ukuti naloli u Chala akabitizya sona akabasala. Nanti mungabomba bunubu, kute kokuti mukawepo nalumo-lumo.

¹¹Polelo mukwiza pakupokeleliwa akiza bo mukwinjila mu Bumwene ubwa bwila na bwila ubwa Mwene witu, sona nu Mupoki witu u Yesu Kilisitu.

¹²Po inkwiza pakubakumbuzyanga bwila na bwila ivintu vinivi, napapo muvimenye kale, sona nukuti mwimite nkani pa bwanaloli bubo mukapokela nu moyo winyu ghosi.

¹³Inkwinong'ona ukuti chizapo pakubakumbuzya ivintu vinivi, bo inchili indi mu Chisakasa icha muchisu ichapasi ichi.

¹⁴Pakuti izimenye ukuti akabalilo kane akakwepelamo mu Chisakasa ichi kali papipi ukuyana na mumo u Mwene witu u Yesu Kilisitu andanjizizye pabuzelu.

¹⁵Po inkwiza pakuyezya nkani umwakuti bo nepamo, akabalilo kosi mukumbukaye ivintu vinivi.

¹⁶Pakuti aswe tutakakonkagha utupangwi, bo tukumanyizya nizya maka nu kwiza sona ukwa Mwene witu u Yesu Kilisitu, loli tukabwennya bukulu bwache na maso ghitu na ghitu.

¹⁷ Bo u Chala u Tata witu akumupa umuchizi nu buchindamu, izyu ilya buchindamu ubukulu likivwika kukwache ukuti, “Uyu Mwana wane umughaniwa, yuyo inhobokite nkani nawe!”

¹⁸Aswe twebene tukivwa izyu linili kumwanya, bo tuli poka nawe pighamba izelu.

¹⁹Polelo tuzimenye ukuti amazyu agha balaghuzi ghanaloli. Chingaba chizapo ukuti ilelo mughasende pakuba lukozyo, lulo lukulama muchisi mupaka kubuche, bo ulutondwa ulwa kubuche lwanda pakulama mumoyo ghinyu.

²⁰Loli pamwanya pavyosi mubaghiye mumanyaye ukuti nayumo umuntu yuyo angalingannya mwene ubulaghuzi ubwa Masimbo.

²¹Pakuti butalipo ubulaghuzi nabumo-bumo bubo bukiza nu bwighane ubwa muntu. Loli abantu bakalaghula ukwendela mwa Muzimu Umuzelu amazyu agha Chala.