Read lambya UBUVUMBULI 10 Bible Online

UBUVUMBULI 10 - lambya bible

UBUVUMBULI 10

¹Pisinda pache inkamwennya uwantumi uyunji uwamaka akwika kumwanya. Akavwinkiwa mwibingu, sona kumutu wache kukaba umupingo-pingo uwa vula. Icheni chache chikaba ngati lyo lizuba, sona ivinama vyache vikaba ngati zyo mpanda izya moto.

²Akalema ibuku ilyakunnyengiwa ilinandi ilizungulule munyobe yache. Ichinama chache ichandilo akakanya panyanja, po ichamongo akakanya pisila.

³Uwantumi yula akakolomoka nkani ukuyana na mumo inkalamu zikubulumila. Bo akolomoka bulo, ukupaya seveni ukwa vula kukivwika.

⁴Bo ivula yipaya, inkaba papipi pakusimba. Loli inkivwa izyu kumwanya likuti, “Utakavumbulaye zizyo ukupaya ukwa vula kwanena, sona utakazisimbe!”

⁵Po uwantumi yuyo inkamwennya akanyite panyanja na pisila akakwezya inyobe yache indilo mumwanya.

⁶Po akalapa mwitabwa ilya Chala yuyo akubangako bwila na bwila, yuyo akapela kumwanya ni chisu ichapasi, ni nyanja, sona na vyosi vivyo vili mumo. Uwantumi yula akati, “Kutakwiza pakuba sona ukukaba-kaba!

⁷Loli bo uwantumi uwa seveni alizya ipati lyache, izya kubusyefu zizyo u Chala akayanizya zila zikwiza pakubombiwa, ukuyana na mumo akafumusikizya pakasi pa bambombo bache abalaghuzi!”

⁸Po izyu lilyo inkalyivwa kumwanya likanena sona kukwane likati, “Kasende ibuku innyenge, lilyo lili munyobe iya wantumi yuyo akanyite panyanja na pisila.”

⁹Inkabuka ku wantumi yula nukumulaba ukuti ampe ibuku ilyakunnyengiwa ilinandi lila. Akambuzya akati, “Lisende nukulilya. Likwiza pakubaba mulwanda lwako, loli mu mulomo wako likwiza pakunona ngati bo buchi.”

¹⁰Po inkasenda ibuku innyenge ilinandi lila munyobe iya wantumi nukulilya, po likanona ngati bo buchi mu mulomo wane. Loli bo namila, likanda pakubaba mulwanda lwane.

¹¹Po inkabuziwa ukuti, “Ubaghiye ufumuzye sona amazyu agha Chala ghagho ghakunena nizya bantu abinji, ninko izyakulekana-lekana, ni neno inyinji, sona na bamwene.”