Read lambya UBUVUMBULI 12 Bible Online

UBUVUMBULI 12 - lambya bible

UBUVUMBULI 12

¹Pisinda pache ichimanyilo ichikulu ichakuswighizya nkani chikaboneka kumwanya. Kukaba umukolo yuyo akavwala izuba ni nyayo zyache zikanyite pamwezi. Kumutu wache akavwala impumpu iya bumwene yiyo yikaba ni ntondwa 12.

²Umukolo yula akamela ulwanda, bo ali pakusayiwa, akakolomoka nkani pachifukwa icha bubavu pakupapa.

³Po ichimanyilo ichinji ichakuswighizya nkani chikaboneka kumwanya: Kukaba inyivwila inchesamu inkulu yiyo yikaba ni mitu seveni ni mpembe teni. Pa mutu ghosi yikavwala impumpu iya bumwene.

⁴Nu musinda wache, inyivwila yila yikawesa ichigaba choka pa vigaba vitatu ivya ntondwa nukuzisumbila pachisu ichapasi. Inyivwila yila yikima pamaso pa mukolo yuyo akaba papipi pakusayiwa, umwakuti yilye umwana uwa mukolo yula, bo apapiwa bulo.

⁵Po akapapa umwana umulumendo, yuyo akwiza pakulaghila abantu abaluko losi ni ndisa iya chela. Loli umwana yula akazompoliwa nukubuka nawe kwa Chala, sona na ku chitengo chache icha bumwene.

⁶Umukolo yula akachimbilila munkolongo, kubuyo bubo u Chala akamuyanizizya, ukuti angasungiwako amasiku 1,260.

⁷Po inkondo yikanda kumwanya, u Mikayeli na bantumi bache pakulwana ni nyivwila yila. Yope inyivwila yila na bantumi bache pakulwana nu Mikayeli,

⁸loli bakayipota inyivwila yila. Po iyene na bantumi bache yitakitikiziwapo nalumo-lumo ukwikala kumwanya.

⁹Inyivwila inkulu yikasumbiwa pachisu ichapasi—injoka inkali yila, yiyo yikitiziwanga ukuti we Mubibi pamo Satana, yuyo akachizimbula ichisu chosi ichapasi. Akasumbiwa pasi poka na bantumi bache.

¹⁰Po inkivwa izyu ilya pamwanya kumwanya likuti, “Losi ulu u Chala alanjizya ubupoki, amaka nu bumwene bwache nu bulaghili ubwa Musaliwa wache yula. Pakuti yuyo akimilila pamaso pa Chala witu nukubasusya abakamu bitu umusanya nu busiku bamusumbila pasi.

¹¹Abakamu bitu bakamupota ni banda ilya Mwana uwa ng'ozi sona nu lusimikizyo lwache lulo bakalumbililagha. Abene bakiyipa ubumi bwabo mupaka kubufwe.

¹²Polelo hobokagha, awe chisu icha kumwanya sona namwe mwe bantu mwebosi mwe mukwikalamo! Loli ntamyo kuchisu ichapasi ni nyanja, ichifukwa u Satana ikila papinyu. Izuye nu bukali nkani ichifukwa azimenye ukuti asyala na kabalilo akanandi bulo.”

¹³Bo inyivwila yila yazyaghannya ukuti yisumbiwe pachisu ichapasi, yikanda pakumuchimbizya umukolo yuyo akapapa umwana umulumendo.

¹⁴Loli umukolo yula akapeghiwa ivipapande vibili ivya lizwanga, umwakuti apululukile munkolongo, kubuyo bubo akwiza pakusungiwako akiza amaka matatu nu hafu ukuti inyivwila yila yitakamuleme.

¹⁵Po inyivwila yikamufwinila umukolo yula amizi ghagho ubwinji bwache bukaba ngati lusoko bulo, umwakuti ghamubukizye.

¹⁶Loli ichisu ichapasi chikamwavwa umukolo yula. Ichisu ichapasi chikasama ku mulomo wache nukulumila ulusoko lulo inyivwila yila yikalufwinagha.

¹⁷Inyivwila yikamukalalila umukolo yula, po yikabuka pakulwana na baluko lwache abanji bosi babo bakasyalako, babo bakukonka amalamulo agha Chala, sona basubiliwa aba bwanaloli bubo bukavumbuliwa nu Yesu.

¹⁸Po inyivwila yila yikimilila pisila ilya nyanja.