Read lambya UBUVUMBULI 2 Bible Online

UBUVUMBULI 2 - lambya bible

UBUVUMBULI 2

¹“Uwantumi uwa muchipanga icha mu Efeso umusimbile uti, “Amazyu ghagho ghaneniwa na yuyo alemite intondwa seveni munyobe yache indilo, sona yuyo akwenda pakasi pa vyakubikapo inyale izya golide seveni gho agha:

²Invimenye vyosi vivyo ukubomba. Inkumenye ukwiyula kwako nu bufisalyoyo bwako, sona imenye ukuti utakubennya bulo abantu abambibi. Abantu babo bakwinena bene ukuti batumiwa, loli bate batumiwa, wabayela nukubagha ukuti bamyasi.

³Awe we mufisalyoyo, sona wayimba nkani pachifukwa icha nene nukuti utakulita.

⁴Loli ichintu chicho inkukususya nacho cho ichi: Utakungana ukuyana na mumo ukanganilagha pakwanda.

⁵Kumbuka namumo ukabela bo utaghuye. Pinduka nukuzileka imbibi zyako, ubombaye imbombo zizyo ukabombagha pakwanda. Nanti utakupinduka, inkwiza pakwiza kukwako nukwefyapo ichakubikapo inyale yako pabuyo bwache.

⁶Loli ubwiza bubo uli nabo bwakuti uzibengite imbombo izya Nikolayi, zizyo nane bulo inzibengite.”

⁷“Umuntu wesi yuyo ali na makutu, ivwe zizyo u Muzimu Umuzelu akuvibuzya ivipanga.” “Umuntu wesi yuyo akupota, inkwiza pakumwitikizya ukuti alyanje iseke izya mwikwi ilya bumi, lilyo lili mumughunda uwa Chala.”

⁸“Uwantumi uwa muchipanga icha mu Similina umusimbile uti, “Amazyu ghagho ghaneniwa na yuyo we bwandilo, sona we bumalilo, sona yuyo akafwa, loli ilelo mumi gho agha:

⁹Intamyo zyako inzimenye, nu bupina bwako bope imbumenye, loli we mukabi. Ingumenye umusamu uwa bantu babo bakwinena bene ukuti ba Yuda, po bate ba Yuda, loli ba chipanga icha Satana.

¹⁰Utakanyilaye amayimba ghagho uli papipi pakukomana nagho. Naloli inkubabuzya ukuti u Satana akwiza pakubayela pakubasumbila bamo mumwinyu mujele, sona mukwiza pakuvwimiwa amasiku teni. Mwendelele pakuba basubiliwa mupaka kubufwe, po inkwiza pakubapa impumpu iyabumi.

¹¹“Umuntu yuyo ali na makutu, ivwe zizyo u Muzimu Umuzelu akuvibuzya ivipanga. “Umuntu wesi yuyo akupota, atakwiza pakupalamasiwa nu bufwe ubwabubili.”

¹²“Uwantumi uwa muchipanga icha mu Peligamu umusimbile uti: Amazyu ghagho ghaneniwa na yuyo alemite upanga yuyo akwete kosi na kosi, gho agha:

¹³Inzimenye ukuti kuko ukwikala, ko kuko kuli ichitengo icha bumwene ubwa Satana. Awe we musubiliwa kukwane, sona utakalutaghe ulwitiko lwako mumwane, na pakabalilo bulo aka Antipasi, ukaboni wane umusubiliwa yula, yuyo akaghoghiwa, kuko u Satana akwikalako.

¹⁴Loli utuntu utunandi bulo tuto inkubasusya nato twakuti, mukasi mumwinyu muli abantu babo bakukonka ichimanyisyo icha Balamu, yuyo akamumanyizya u Balaki namumo angabadebela aba Izilayeli ukuti balye ichakulya chicho chibikiwe ku vifwani ukuti chibanje chakwiyipa, sona nukubomba ubwamalaya.

¹⁵Umwakuyana bulo, mukasi mumwinyu muli abantu babo bakukonka ichimanyisyo icha Nikolayi.

¹⁶Pinduka nukuzileka imbibi zyinyu! Nanti mutakupinduka inkwiza kukwinyu lunulu nukulwa namwe inkondo nu panga yuyo akwete kosi na kosi, sona yuyo akufuma mu mulomo wane.

¹⁷ “Umuntu yuyo ali na makutu, ivwe zizyo u Muzimu Umuzelu akuvibuzya ivipanga. “Umuntu yuyo akupota, inkwiza pakumupa ichakulya ichakubusyefu icha mana. Inkwiza pakumupa ibwe iswepu lilyo lisimbiwepo ni tabwa ilipya, lilyo nayumo umuntu yuyo alimenye, loli mwene yuyo akulipokela.”

¹⁸“Uwantumi uwa muchipanga icha mu Tiyatila umusimbile uti: Amazyu ghagho ghaneniwa nu Mwana uwa Chala, yuyo amaso ghache ghakumekuka ngati gho moto, sona yuyo inyayo zyache zikulama ngati cho chela, gho agha:

¹⁹Invimenye vyosi vivyo ukubomba! Indumenye ulughano lwako nu busubiliwa bwako nu bubombeli bwako, sona nu bufisalyoyo bwako. Inzimenye ukuti ilelo ukubomba imbombo inyiza ukuchila namumo ukabombelagha pakwanda.

²⁰Loli ichintu chicho inkukususya nacho chakuti, ukumwennya bulo umukolo u Yezebelo yula, yuyo akwinena mwene ukuti mulaghuzi. Akubasovya ababombi bane ni chimanyisyo chache nukubamanyizya ukuti babombaye ubwamalaya nukulya ichakulya chicho chibikiwe ku vifwani ukuti chibanje chakwiyipa.

²¹Inkamupa umukolo uyu akabalilo akakuti apindukile, loli atakalondagha pakuleka ubwamalaya bwache.

²²Polelo inkwiza pakumusumbila pachitala nu bubine poka na bantu babo bakalowa nawe. Inkwiza pakubapelela amayimba aminji nkani, nanti batakupinduka nukuleka imbibi zizyo bakabombagha nawe.

²³Inkwiza pakubaghogha abantu babo bakendagha nawe, po ivipanga vyosi vikwiza pakumanya ukuti ane nene inkughamanya amoyo ghabo, sona ni nyinong'ono zyabo. Inkwiza pakumulipila umuntu wesi ukuyana ni mbombo zyache.

²⁴“Loli amwe mwe bantu abanji aba muchipanga icha mu Tiyatila mutakonkite ichimanyisyo ichibibi ichi. Mutamanyiyeko zizyo abene bakuti izyakubusyefu izya Satana. Inkubabuzya ukuti intakwiza pakonjelezya ukatundu uyunji papinyu.

²⁵Loli amwe mulemezye nkani chicho muli nacho mupaka nize.

²⁶Umuntu wesi yuyo akupota nukubomba chicho inkulonda pakufika mupaka kubumalilo, inkwiza pakumupa ubulaghili pa bantu abaluko losi.

²⁷Akwiza pakubalaghila ni ndisa iya chela, nukubafwantannya ngati yo sonta.

²⁸Inkwiza pakubapa ulutondwa ulwa kubuche.

²⁹“Umuntu wesi yuyo ali na makutu, ivwe zizyo u Muzimu Umuzelu akuvibuzya ivipanga.”