Read lambya UBUVUMBULI 20 Bible Online

UBUVUMBULI 20 - lambya bible

UBUVUMBULI 20

¹Pisinda pache inkennya uwantumi akwika kumwanya, bo alemite munyobe yache ichighulilo icha chibanka ichibizu nkani ni mpingu ing'wamu.

²Akayilema inyivwila yila, injoka inkali yuyo we Mubibi pamo we Satana nukumupinya amaka 1,000.

³Uwantumi yula akamusumbila u Satana mu chibanka ichibizu nkani nukumwighalila. Akamata umulyango umwakuti atakazizimbulepo nalumo-lumo inko izya bantu mupaka amaka 1,000 ghamale. Pisinda pache asatuliwanje ukwa kabalilo akapimpa bulo.

⁴Pisinda pache inkennya ivitengo ivya bumwene, sona babo bakikalapo bakapeghiwa amaka aghakulongela. Inkennya sona imizimu iya babo bakadumuliwa imitu pachifukwa icha kulumbilila ubwanaloli bubo u Yesu akavumbulagha, sona pachifukwa icha kulumbilila Amazyu agha Chala. Banaba batakachichindikagha ichinyamana pamo ichifwani chache, sona batakadindiwa ni chidindo pa vyeni pamo panyobe zyabo. Bakazyuka kubufwe pakuba bamwene poka nu Kilisitu amaka 1,000.

⁵Abantu bosi abanji abafwe batakazyuka kubufwe mupaka amaka 1,000 ghakamala. Kunuku ko kuzyuka kubufwe ukwa bumalilo.

⁶Basayiwa sona bazelu abantu babo bakwiza pakuzyuka poka nabo ukuzyuka kubufwe ukwakwanda kunuku. Ubufwe ubwabubili bute na maka papabo, loli bakwiza pakuba baputi aba Chala na ba Kilisitu, sona bakwiza pakulaghila poka nawe amaka 1,000.

⁷Bo ghamala amaka 1,000 ghala, u Satana akwiza pakusatuliwa mujele,

⁸sona akwiza pakuzizimbula inko izya bantu kunkuto zyosi folo izya chisu ichapasi, kokuti u Gogi nu Magogi. U Satana akwiza pakubabungannya bosi poka pakulwa inkondo. Ubwinji bwabo buli ngati gho musesenga uwa mulubazu ulwa nyanja.

⁹Po bakasata pachisu chosi ichapasi nukuvizyungulila ivisakasa ivya bantu aba Chala na kaya akakulu nkani kako akaghanite. Loli umoto ghukika kumwanya nukubanangannya.

¹⁰Po u Satana yuyo akabazimbulagha, akasumbiwa munyanja iya moto uwa sulufule, kuko ichinyamana nu mulaghuzi umumyasi yula bakasumbiwako kale. Bakwiza pakuyiviwa pamusanya na pabusiku bwila na bwila.

¹¹Po inkennya ichitengo icha bumwene ichikulu ichiswepu, sona na yuyo akikalapo. Ichisu ichapasi na kumwanya vikachimbila pantazi papache, sona vitakaboneka sona.

¹²Inkennya sona abantu abafwe, abasongo na banandi bulo pantazi pa Chitengo icha bumwene. Amabuku ghakighuliwa, po ibuku ilinji likighuliwa, ili lyo libuku ilya bumi. Abantu abafwe bakalongiwa ukuyana ni mbombo zyabo zizyo bakabombagha vivyo vikasimbiwa mumabuku ghala-ghala.

¹³Po inyanja yikafumya abantu abafwe, babo bakaba mula-mula. Ubufwe ni chisu icha bantu abafwe, vyope vikabafumya abantu abafwe babo bakaba mula-mula. Po umuntu wesi akalongiwa ukuyana ni mbombo zyache zizyo akabomba.

¹⁴Po ubufwe ni chisu icha bantu abafwe vikasumbiwa munyanja iya moto. Inyanja iya moto yiniyi bo bufwe ubwa bubili.

¹⁵Umuntu wesi yuyo itabwa lyache litakasimbiwamo mwibuku ilya bumi, akasumbiwanga munyanja iya moto.