Read lambya UBUVUMBULI 8 Bible Online

UBUVUMBULI 8 - lambya bible

UBUVUMBULI 8

¹Bo u Mwana uwa ng'ozi amamatula ichimatilo icha seveni, kumwanya kukaba myee ukwa maminiti 30.

²Po inkennya abantumi aba kumwanya seveni bimite pamaso pa Chala, sona bapeghiwe amapati seveni.

³Uwantumi uyunji yuyo akaba ni chakufukizizya utwakununkila icha golide, akiza nukwimilila pachighemo. Akapeghiwa utwakufukizya utwakununkila utwinji utwakonjelezya inyiputo izya bantu bosi aba Chala, sona utwakuti iyipe pachighemo icha golide chicho chikaba pantazi pa Chitengo icha bumwene.

⁴Ilyosi ilya utwakufukizya utwakununkila tuto tukaba munyobe izya wantumi yuyo akimilila pamaso pa Chala likakwela kumwanya poka ni nyiputo izya bantu aba Chala.

⁵Po uwantumi yula akasenda ichakufukizizya utwakununkila tula nukuchizuzya nu moto uwa pachighemo nukuchisumbila pachisu ichapasi. Pakabalilo kala-kala kukaba amabingu, ni vyongo, nu tumesya, sona na kasenyenta.

⁶Abantumi seveni bala babo bakaba na mapati munyobe zyabo, bakiyannya ukuti balizye amapati ghala.

⁷Uwantumi uwakwanda akalizya ipati lyache, po kukiza amabwe agha vula nu moto uwakonganikilana poka ni banda nukuvisumbila pachisu ichapasi. Ichigaba choka pa vigaba vitatu ivya chisu ichapasi chikapya, sona isote lyosi iteta likapya.

⁸Po uwantumi uwabubili wepe akalizya ipati lyache. Ichintu chimo chicho chikaboneka ngati lyo lighamba ikulu nkani lilyo lili pamoto chikasumbiwa panyanja. Ichigaba choka pa vigaba vitatu ivya nyanja chikanduka libanda,

⁹Ichigaba choka pa vigaba vyosi vitatu icha vipeliwa ivyabumi munyanja, chikafwa, sona ichigaba choka pa vigaba vitatu ivya mabwato amakulu nkani vikananganika.

¹⁰Po uwantumi uwabutatu akalizya ipati lyache. Ulutondwa ulukulu, lulo lukakagha ngati cho chikoka lukawila pachigaba choka icha vigaba vitatu ivya soko na pa mbwibwi izya mizi.

¹¹Itabwa ilya lutondwa lula-lula likaba we “Kubaba.” Ichigaba choka icha vigaba vitatu ivya mizi chikababagha, sona abantu abinji bakafwa, bo bang'wela amizi ghala-ghala ichifukwa ghakababagha nkani.

¹² Uwantumi uwafolo akalizya ipati lyache. Po ichigaba choka icha izuba, nu mwezi ni ntondwa pa vigaba vitatu vikananganika, umwakuti ukulama kwabo ichigaba choka pa vigaba vitatu chikaleka pakulama. Kutakabako ulukozyo muchigaba choka pa vigaba vitatu ivya musanya, sona ni chigaba choka pa vigaba vitatu ivya busiku.

¹³Bo inkwenelezya, inkalyennya izwanga likupululuka mumwanya nukukolomoka nizyu ilya pamwanya ukuti, “Ntamyo mwee! Ntamyo mwee! Intamyo inkulu nkani zikwiza pakubawila abantu babo bakwikala pachisu ichapasi, bo abantumi aba bumalilo batatu bakulizya amapati ghabo!”