Read lambya UBUVUMBULI 9 Bible Online

UBUVUMBULI 9 - lambya bible

UBUVUMBULI 9

¹Pala-pala uwantumi uwafayivi akalizya ipati lyache. Po inkennya lutondwa ulwa kumwanya lulo lukawila pachisu ichapasi. Lukapeghiwa inyighulilo iyakwighulila mu chibanka ichibizu nkani.

²Ulutondwa lula lukighula ichibanka, po ilyosi likasuka mu chibanka ngati po likufuma mung'anjo iya moto. Izuba na mumwanya vikafita ni lyosi ilyakufuma muchibanka ichibizu nkani chila.

³Ukanta akafuma mu lyosi lila-lila nukwiza muchisu ichapasi, po akapeghiwa ulubolela lulo lukayana nu lwa nkonya.

⁴Akabuziwa ukuti atakanangannye isote pamo amakwi, pamo kosi akamelwa. Loli akitikiziwa ukuti anangannye abantu bene babo bate ni chidindo icha Chala pa vyeni vyabo.

⁵Ukanta yula atakitikiziwa ukuti abaghoghe abantu banaba, loli kwene pakubayivya amezi fayivi. Ububavu bwache bukayana bulo nu bubavu ubwa nkonya.

⁶Mumasiku ghala-ghala abantu bakwiza pakunena ukuti chizapo pakufwa, loli batakwiza pakufwa. Bakwiza pakulonda nkani ukuti bafwe, loli ubufwe bukwiza pakubachimbila.

⁷Ukanta uyu akabonekagha ngati zyo falasi zizyo baziyanizye pakubuka ku nkondo. Pa mitu yabo pakaba ichintu chimo chicho chikabonekagha ngati yo mpumpu iya golide, sona ivyeni vyabo vikaba ngati vyeni ivya bantu.

⁸Isisi lyabo likaba ngati lyo lisisi ilya bakolo, amino ghabo ghakaba ngati gho mino agha nkalamu.

⁹Pa vifuba vyabo bakavwala ichela, sona ichongo icha vipapande vyabo chikaba ngati cho chongo icha falasi ni ngolo izya nkondo inyinji nkani izyakuchimbilila kunkondo.

¹⁰Ukanta yula akaba ni misinda nu tubolela ngati twa bankonya, sona imisinda yabo yo yiyo yikaba na maka aghakuvulazizya abantu amezi fayivi.

¹¹U mwene wabo akaba wantumi yuyo akaba mulaghili uwa chibanka ichibizu chila. Itabwa lyache mu Chihebeli akaba we Abadoni; mu Chigiliki akaba we Apoliyoni chicho chikung'anamula ukuti, “Uwakunangannya.”

¹²Intamyo iyakwanda yamala, loli pisinda pa yiniyi pachili pali izinji zibili zizyo zibaghiye pakwiza.

¹³Po uwantumi uwa sikisi akalizya ipati lyache. Po inkivwa izyu kunkuto folo izya chighemo icha golide, chicho chikaba pamaso pa Chala.

¹⁴Izyu lila-lila likamubuzya uwantumi uwasikisi yula likati, “Basatule abantumi folo bala babo bapinyiwe pa lusoko ulukulu ulwa Yufuleti!”

¹⁵Abantumi folo bala bakabayanizya zila akabalilo kala-kala, ni siku lila-lila, nu mwezi ghula-ghula sona nu mwaka ghula-ghula. Ilelo bakasatuliwa ukuti baghoghe ichigaba choka pa vigaba vitatu ivya bantu bosi.

¹⁶Inkabuziwa ukuti ubwinji ubwa basikali abakukwela ifalasi bukaba amamiliyoni 200.

¹⁷Mu chisetuka chane inkennya ifalasi na bakukwelapo bache. Pa vifuba vyabo bakavwala ivyela ivichesamu ngati gho moto, ni vyabulu ngati lyo lyosi, sona ni vyakayinja ngati we sulufule. Imitu iya falasi zila yikaba ngati ya nkalamu, sona mumalomo ghabo mukafumagha umoto ni lyosi nu sulufule.

¹⁸Ichigaba choka pa vigaba vitatu ivya bantu chikaghoghiwa ni viwaya vitatu: Umoto ni lyosi, sona nu sulufule vivyo vikafumagha mumalomo agha falasi zila.

¹⁹Pakuti amaka agha falasi ghali mumalomo ghabo, sona na ku misinda yabo. Imisinda yabo yili ngati zyo njoka zizyo zili ni mitu yiyo zikubombezya pakuvulazya abantu.

²⁰Abantu bosi abanji babo batakaghoghiwa ni viwaya vila-vila, pope bulo batakapinduka nukuvileka vivyo bakabombagha ni nyobe zyabo. Batakaleka pakwiputa imizimu imibibi ni vifwani ivya golide, nivya siliva, nivya mabwe, nivya ikwi, vivyo vitangennya, pamo ukwivwa pamo ukwenda, awe.

²¹Abantu bala batakaleka pakughogha kwabo pamo amayele ghabo, pamo ubwamalaya bwabo, pamo ubwiba bwabo.