Read lango Agege 1 Bible Online

Agege 1 - lango bible

Agege 1

¹Agege Obaŋa oketo polo kede lobo.

²Lobo onwoŋo orubere atata kun ginnoro mom iye, colpiny onwoŋo owumo pii atut oko; Cuny Obaŋa olyero i wi pii.

³Obaŋa te kobo ni, “Lero myero bed tye”; lero daŋ te bedo tye.

⁴Obaŋa te neno ni ber; te poko akina lero kede colpiny.

⁵Obaŋa te cako nyiŋ lero ni Iceŋ, te cako nyiŋ colpiny ni lwor Otyeno piny te yuto dok piny te ru, mannono te bedo nino me agege.

⁶Obaŋa te kobo ni, “Gin opette myero bed tye malo ame poko pii kede pii.”

⁷Obaŋa te tiyo gin opette, te poko pii ame tye piny i te gin opette kede en ame tye malo i wi gin opette, eka te timere amannono.

⁸Obaŋa te cako nyiŋ gin opette ni Polo. Otyeno piny te yuto dok piny te ru, mannono te bedo nino ame aryo.

⁹Obaŋa te kobo ni, “Pii ame tye piny i te polo myero cokere poŋ karacel i kabedo acel, me piny otwo nen”; eka te timere amannono.

¹⁰Obaŋa te cako nyiŋ piny otwo ni Lobo, te cako nyiŋ pii ocokere opoŋ karacel ni Nam; Obaŋa te neno ni ber.

¹¹Obaŋa te kobo ni, “Lum kede ginapita ame kotigi tye, kede yen adoŋo a nyako nyiggi ame kotigi tye i yigi, acalo eponegi tye i wi lobo, myero tu i lobo”; eka te timere amannono.

¹²Lum kede ginapita ame kotigi tye i yigi, kede yen adoŋo a nyako nyiggi, ame kotigi tye i yigi, acalo eponegi tye, te tu i lobo; Obaŋa te neno ni ber.

¹³Otyeno piny te yuto dok piny te ru, mannono te bedo nino me adek.

¹⁴Obaŋa te kobo ni, “Gigi mogo aryeny myero bed tye i gin opette i polo me poko Iceŋ kede lwor; me gin bed gin me anena ame cimo kare kede nino kede mwaka,

¹⁵dok me gin bed gin aryeny i gin opette i polo menyo piny”; eka te timere amanono.

¹⁶Obaŋa te tiyo gin aryeny aryo adoŋo, en adwoŋŋere me loyo dyeceŋ, en atidi mere me loyo dyewor; te tiyo daŋ acer.

¹⁷Obaŋa te cibogi i kom gin opette i polo me menyo piny,

¹⁸kede me loyo dyeceŋ kede dyewor, kede me poko lero kede colpiny; Obaŋa te neno ni ber.

¹⁹Otyeno piny te yuto dok piny te ru, mannono te bedo nino me aŋwen.

²⁰Obaŋa te kobo ni, “Gin ame tye kede kwo myero corre, nya i pii; kede winy ame twarre malo i wi lobo i nyim gin opette i polo.”

²¹Obaŋa te keto nyaŋ adoŋo me nam, kede ginnoro ducu ame tye i kwo, ame mol corre, nya i pii acalo eponegi tye, kede kit winy luŋ ame tye kede bwomgi acalo eponegi tye; Obaŋa te neno ni ber.

²²Obaŋa te miyogi winyo kun kobo ni, “Nywal, imedde, ipoŋ wunu pii me nam, wun winy daŋ medde wunu i wi lobo.”

²³Otyeno piny te yuto dok piny te ru, mano te bedo nino me kany.

²⁴Obaŋa te kobo ni, “Lobo myero nywal gin akwo acalo eponegi tye: leyi me paci, kede gin ame lak alaka, kede leyi me tim acalo eponegi tye”; eka te timere amannono.

²⁵Obaŋa te tiyo leyi me tim acalo eponegi tye, kede leyi me paco acalo eponegi tye, kede gin ame lak alaka piny acalo eponegi tye; Obaŋa te neno ni ber.

²⁶Obaŋa te kobo ni, “Oti wunu dano ame cal kedwa, me gin lo rec me nam, kede winy a twarre malo, kede leyi me paco, kede wi lobo luŋ, kede gin ducu ame lak alaka piny i lobo.”

²⁷Eka Obaŋa te keto dano i callere, oketogi co kede mon.

²⁸Obaŋa te miyogi winyo kun kobo ni, “Nywal, imdede, ipoŋ wunu lobo, ilo wunu daŋ; dok ilo wunu daŋ rec me nam, kede winy ame twarre malo, kede gin ducu akwo ame tye i wi lobo,”

²⁹Obaŋa te kobbegi ni, “Nen, atyeko miyowu ginapita ducu me wi lobo luŋ ame kotigi tye, kede yen adoŋo ducu ame nyako nyiggi ame kotigi tye i yigi; gin luŋ bino bedo camwu.

³⁰Dok leyi ducu me tim kede winy ducu ame twarre malo, kede gin ducu ame lak alaka i wi lobo, ame tye kede kwo, atyeko miyogi pot jami ducu me bedo camgi”; eka te daŋ timere amannono

³¹Obaŋa te neno jami ducu ame en otio, nen, onwoŋo ber meicel. Otyeno piny te yuto dok piny te ru, mannono te bedo nino me kanyape.