Read lango Agege 11 Bible Online

Agege 11 - lango bible

Agege 11

¹Jo wi lobo luŋ rik onwoŋo kobo ka leb acel keken ame kop a gin kobo onwoŋo mom ru pol wok.

²Kare ame gin obedo dak kun odok tutuŋ kide, gin rik te nwoŋo lobo obedo babar i lobo Cinar, gin doŋ te bedo kuno.

³Gin te kop gigi kengi kengi ni, “Biye wunu, me ogo wunu matafali ote waŋo wunu aber.” Gin te tic i matafali me gedo akaka gweŋ, kede odok lam acalo gin ame ribo akina matafali.

⁴Dok ote kobo ni, “Biye wunu, me ogeru boma karacel kede gedo abor ame wie gudo polo, me omi wunu nyiŋwa rwo, me kur oket wunu oko i wi lobo ducu.”

⁵Kare ame Rwot oyito piny me neno boma karacel kede gedo abor ame dano ogero.

⁶Rwot okobo ni, “Nen, gin obedo rok acel kun okobo leb daŋ acel; man pwod en ageyi me gin a gin bino timo; cakere amanni wot kede anyim, mom tye ginnoro ame timo bino loyogi.

⁷Biye wunu me oyit wunu piny, me owot orurubo wunu lebgi oko, me dano acel kur niaŋ kop a ŋat ocele.”

⁸Mannono te miyo Rwot ketogi oko i kuno, ote lal romo wi lobo luŋ; ote doŋ weko gero boma-nono oko.

⁹Mannono omio nyiŋ boma-nono ocako ni Babel, pien kannono en ame Rwot orurubo iye leb me wi lobo luŋ, dok daŋ kannono en ame Rwot okeketogi iye, ote lal romo wi lobo luŋ.

¹⁰Magi gin ikwae a Cem. Kare ame Cem doŋ oromo mwaka mia acel me dittere, onywalo Arpakcad a doŋ mwaka aryo okato ame twon pii abwal ame ocorre i wi lobo ogik.

¹¹A doŋ en onywalo Arpakcad oko, ori mwaka mia abic, dok rik daŋ omedo nywalo awobe kede anyira.

¹²Ka Arpakcad doŋ otyeko ri mwaka pyeradek wie abic me dittere, onywalo Cela,

¹³Arpakcad ori mwaka mia aŋwen kede adek a doŋ otyeko nywalo Cela, dok rik daŋ omedo nywalo awobe kede anyira.

¹⁴Ka Cela doŋ otyeko ri mwaka pyeradek me dittere, onywalo Eber.

¹⁵Cela ori mwaka mia aŋwen kede adek a doŋ otyeko nywalo Eber, dok rik daŋ te medde nywalo awobe kede anyira.

¹⁶Ka Eber doŋ otyeko ri mwaka pyeradek wie aŋwen me dittere, onywalo Peleg.

¹⁷Eber ori mwaka mia aŋwen kede pyeradek a doŋ otyeko nywalo Peleg, dok rik daŋ te medde nywalo awobe kede anyira.

¹⁸Ka Peleg doŋ otyeko ri mwaka pyeradek me dittere, onywalo Reu.

¹⁹Peleg ori mwaka mia aryo kede aboŋwen a doŋ otyeko nywalo Reu, dok rik daŋ te medde nywalo awobe kede anyira.

²⁰Ka Reu doŋ otyeko mwaka pyeradek wie aryo me dittere, onywalo Cerug.

²¹Reu ori mwaka mia aryo kede abiro a doŋ otyeko nywalo Cerug, dok rik daŋ te medde nywalo awobe kede anyira.

²²Ka Cerug doŋ otyeko ri mwaka pyeradek me dittere, onywalo Nakor.

²³Cerug ori mwaka mia aryo a doŋ otyeko nywalo Nakor, dok rik daŋ te medde nywalo awobe kede anyira.

²⁴Ka Nakor doŋ otyeko mwaka pyeraryo wie aboŋwen me dittere, onywalo Tera.

²⁵Nakor ori mwaka mia acel kede apar wie aboŋwen a doŋ otyeko nywalo Tera, dok rik daŋ te medde nywalo awobe kede anyira.

²⁶Ka Tera doŋ otyeko ri mwaka pyerabiro me dittere, onywalo Abram, Nakor kede Aran.

²⁷Magi gin ikwae a Tera. Tera onywalo Abram, Nakor kede Aran; Aran oywalo Lot.

²⁸Aran en ate geyo toyi pappere Tera i lobo ame rik onywale iye, i paco me Ur ame paco ajo Kaldaya.

²⁹Abram kede Nakor te nyomo mongi; dako Abram nyiŋe Carai aco dako a Nakor nyiŋe Mirika, ame en nyaka Aran pappa Mirika kede Icika.

³⁰Carai rik oraŋa, atiŋŋere moro onwoŋo gire pe.

³¹Tera te tero wode Abram, kede akware Lot wot a Aran, kede ci-wode Carai, dako a Abram; gin luŋ rik ote wot karacel kun oya i Ur ame paco a jo Kaldaya me wot i lobo me Kanaan; ento ka gin otuno i Karan, koŋ ote bedo gigi kannono.

³²Mwaka a Tera luŋ ame ori kede i lobo oromo mia aryo kede abic; Tera te to i Karan.