Read lango Agege 12 Bible Online

Agege 12 - lango bible

Agege 12

¹Rwot okobbi Abram ni, “Ya oko i lobo turwu, i akina jowu, kede i ot a pappi, iwot i lobo ame an abino nyutti.

²An abino miyi idoko rok adwoŋ meicel, dok daŋ abino miyi winyo kun amio nyiŋi rwo meicel; mano bino miyo ibedo akel winyo.

³Abino miyo winyo i kom jo a lammi winyo, aco jo ame ceni acena, an daŋ abino cenogi; dok atekere me wi podo luŋ bino nwoŋo winyo piri.”

⁴Abram te cako wot amannono, kit ame Rwot okobbe kede, kun Lot daŋ woto karacel kede. Abram onwoŋo doŋ mwaka me dittere oromo pyerabiro wie abic i kare ame en ya i lobo Karan.

⁵Abram owoto karacel i dako mere Carai, kede Lot atin ominnere, kede limgi luŋ, kede jogi luŋ ame gin onwoŋo i Karan. Gin te ero wotgi me wot i lobo Kanaan; ote tuno daŋ anaka i Kanaan.

⁶Abram oŋolle i dye lobo, obino naka i kabedo ame tye i Cekem, tuno anaka ite kworo me More. I kare-nono onwoŋo jo Kanaan pwod bedo i lobo-nono.

⁷Rwot te nen baŋ Abram kun kobbe ni, “Abino miyo lobo man baŋ ikwai.” En te cano keno me miyo lam baŋ Rwot ame onen baŋe kuno.

⁸En dok te dak oko i kuno, jer i lobo obedo kidi kidi ame tye tuŋ kide me Betel. En te guro kema mere kuno oweko Betel tye tuŋ to, eka Ai te bedo tuŋ kide. En te cano keno lam kuno, te kwayo Rwot.

⁹Abram dok te medde i wottere i nyim tutuŋ Negeb.

¹⁰Kec rik onwoŋo opoto i lobo; keccono rik onwoŋo gwa atek, ormo Abram owoto piny i Miciri eka te bedo koŋ kuno pi kare moro.

¹¹Kare ame en doŋ ceggi donyo i Miciri, en te kobbi dako mere Cerai ni, “Nen, ba, an aŋeo ni yin ibedo dako amwonya meicel;

¹²jo Miciri ka bino neni, gin bino kobo ni, ‘Man dako mere’; gin obino neka ote weki yin bedo kwo.

¹³Doŋ yin myero ikob ni ibedo aminna, mano bino miyo gin bedo keda aber, dok mom obino neka piri.”

¹⁴Ka Abram odonyo i Miciri, jo Miciri oneno dako mere mwonya atek meicel.

¹⁵Kare ame otic a Parao adoŋo mege onene, opwoc meicel baŋ adwoŋgi Parao, te miyo tero Carai i ot a Parao.

¹⁶Mannono omio Parao te bedo kede Abram aber pire; Abram te nwoŋo twoni, romi, kede twoni kana, opii kede aŋeca ecipan, kede megi kana, kede inaga apipim.

¹⁷Ento Rwot te wuno Parao kede jo me ode etak i twoni too mogo a mom kobere pi Carai dako Abram.

¹⁸Omio Parao te lwoŋo Abram baŋe, te penye ni, “Itima aman piŋo? Piŋo rik mom ititta atira ni en dakoni?

¹⁹Piŋo dok ikobo ni, ‘En aminna’ ame omio an atere obedo dakona? Aman doŋ cegi en ba! Game iwot giri doŋ oko.”

²⁰Parao te ciko jo mere pire, ni myero gin lwoke ewoti karacel i cege kede jami mere a rik tye baŋe luŋ.