Read lango Agege 13 Bible Online

Agege 13 - lango bible

Agege 13

¹Abram te ya i Miciri gin i cege kede jami luŋ a rik tye baŋe me wot i Negeb; Lot daŋ onwoŋo tye karacel kede.

²I kare-nono onwoŋo Abram doŋ olony atek i dok, kede ryal, kede jabu daŋ,

³En obedo medde iwottere kun ya i Negeb, dak i Betel, kan ame en rik koŋ ogeo guro iye kema mere, ame tye i akina Betel kede Ai,

⁴kan ame en rik koŋ ocano iye keno me lam con. Abram te kwayo Rwot kuno.

⁵Lot ame onwoŋo woto karacel Abram; rik onwoŋo daŋ tye i lim akwo adoŋo kede atino mege karacel kede kema daŋ apol ata.

⁶Lobo rik doŋ onwoŋo mom romogi kwat ka gin aryo luŋ obedo karacel pien gin luŋ rik limgi bup meicel a mom rommigi bedo karacel.

⁷Okwa-lim Abram kede okwa-lim a Lot onwoŋo doŋ da meicel. I kare-nono onwoŋo jo Kanaan kede jo Periji en ame obedo i lobo-nono.

⁸Mannono omio Abram okobbi Lot ni, “Mom amito ni daa moro bed tye i akinawa kede i akina okwatwa, pien wan luŋ obedo jo me ot acel.

⁹Lobo mom gire tye omoo ata ame myero iyer moro iye? Wan myero doŋ opokere oko; ka ce yin iyero ni idok tutuŋ cam an abino dok gira tutuŋ cem, aco ka yin iyero dok tutuŋ cem, an abino dok tutuŋ cam.”

¹⁰Lot te tiŋo waŋe malo niyo lobo luŋ ame ceggi i kulo Jordan, en te neno ni pii opoŋ iye luŋ aber meicel tuno anaka i Joar kun calo bala poto a Rwot, ame calli lobo me Miciri. Man otimere ame Rwot mom ru ojwero Codom kede Gomora.

¹¹Lot te doŋ yero gire kene lobo luŋ ame ceggi i kulo Jordan, en te wot oko tuŋ kide; gin te pokere oko kengi kengi.

¹²Abram odoŋ i lobo me Kanaan, ento Lot obedo i akina boma luŋ ame ceggi i kulo Jordan, eka dok te kobo kema mere tuno naka Codoma.

¹³Jo me Codoma rik onwoŋo jo areco, balgi rik dwoŋ okato kare i nyim Rwot.

¹⁴A doŋ Abram opokere oko kede Lot, Rwot okobbe ni, “Tiŋ waŋi malo iŋiŋio piny naka kan ame waŋi twero gik iye kun icuŋ i kakari-nono, nen tuŋ anyarodi kede tuŋ anyarolum, tuŋ kide kede tuŋ to;

¹⁵pien lobo ame inenonono luŋ abino miyo oko baŋi kede baŋ ikwai atwal.

¹⁶Abino miyo ikwai bedo apol bala apua me lobo; me wek kwano ikwai mom twerre baŋ ŋattoro bala kwano apua me lobo.

¹⁷Koŋ i ya iwot iloŋ lobo-ni, inen borrere kede laccere, pien abino miyo oko baŋi.”

¹⁸Pi mannono Abram te kobo kema mere, dak oko naka i ŋet kworo me Mamre ame ceggi kede Kebron. En dok te cano keno me miyo lam baŋ Rwot kuno.