Read lango Agege 14 Bible Online

Agege 14 - lango bible

Agege 14

¹Kare Amrapel rwot me Cinar, kede Ariok rwot me Ellacar, kede Kedor-loamer rwot me Elam, kede Tidal rwot me Goim,

²rwode magi luŋ rik ote notte me lweny i kom Bera, rwot me Codom, kede Birca rwot me Gomora, kede Cinad rwot me Adma, kede Comeber rwot me Jeboim, kede rwot me Bela (ame en Joar).

³Jo-ni luŋ rik ote notte me lweny i luŋ me Ciddim (ame en Nam me kado).

⁴Gin-ni luŋ rik obedo i te loc a Kedor-laomer mwakki apar wie aryo, ento ote jem oko i mwaka me apar wie adekkere.

⁵I mwaka me apar wie aŋwennere, Kedor-loamer karacel kede rwode ame onwoŋo rik onotte kede, te dok bino ero lweny, ote loyo jo Repa i Acitero-Karnaim kede jo me Julin i Kam, kede jo Emin i Ceve-Kariataim,

⁶kede jo me Kori i kidigi me Cer, tuno naka i El-paran i waŋ apokki ame ceggi i tim.

⁷Kare ame man otum, gin te lokere dwogo cen, ote wot naka i En-minipat (ame en Kadec), gin te loyo lobo ducu me a jo Amalek, kede jo me Amor daŋ, ame bedo i Kajajon-tamar.

⁸Icennere doki rwot me Codoma, kede rwot me Gomora, kede rwot me Adma, kede rwot me Jeboim, kede rwot me Bela (ame en Joar), ote wot ero lweny i luŋ me Ciddin,

⁹Oero i kom Kedor-laomer rwot me Alam, kede Tidal rwot me Goim, kede Amrapel rwot me Cinar, kede Ariok rwot me Ellacar; rwode magi aŋwen onotte karacel me lweny i kom rwode abic.

¹⁰Luŋ me Ciddim onwoŋo rik tye iye burrogo me odok acol. Kare ame rwode me Codoma kede Gomora oriŋo oko, jogi ocele mege te rette i bure-nono, jo odoŋŋege te riŋo laro wi kidi.

¹¹Okwor te yako jo Codoma kede Gomora ducu karacel kede camgi, ote ciro wot gigi kede.

¹²Rik ote mako daŋ Lot ame obedo atin omin Abram ame rik bedo i Codoma kun oyako daŋ jami mere luŋ owoto kede.

¹³Cite dano moro acel ame obwot, te riŋo kelo kop man baŋ Abram ame en dano me Eburania a rik bedo i ŋet kworo me Mamre; lo a rik obedo dano me Amor, ominna Ecikol kede Aner, jonnono luŋ rik owoto ocikere me notte kede Abram.

¹⁴Ka Abram owinyo ni atin ominnere mony omako otero oko, en obelo monnyere, te telo wi jo ame onywalo i paco mere ame opwonyo i lweny, jo ame romo mia adek kede apar wie aboro ote lubo yorgi naka i Dan.

¹⁵Abram kede monnyere te cobogi dyewor kun ogurogi tuŋŋi kede tuŋŋi, ote twarogi, ryemogi tuno naka i Koba ame tye tuŋ cam me Damaciko.

¹⁶Gin te yako limgi luŋ dwogo kede, ote mayo daŋ Lot atin omin Abram oko kede jami mere luŋ, kede mon, kede jo ocele daŋ.

¹⁷A doŋ Abram odwogo i kan ame en oloo iye Kador-laomer kede rwode luŋ ame rik onotte kede, rwot me Codoma rik te wot me rwatte kede i luŋ me waŋa yo i luŋ me Cave (ame en luŋ abaka)

¹⁸kan ame Melkijedek rwot me Calem okelo iye ogati kede koŋo olok; en rik onwoŋo alamdog Obaŋa Amalo Meicel.

¹⁹Rik en te lammi Abram winyo kun kobo ni, “Obaŋa Amalo Meicel ame oketo polo kede lobo myero mi Abram winyo!

²⁰Myero pwo Obaŋa Amalo Meicel, ame omio okwor i ciŋi!” Abram te miye acel me apar me jami eyako luŋ i baŋ okwor.

²¹Rwot me Codoma te dok kobo ni, “An luny miya ka jo ame imao, yin giriter jami luŋ bed megi.”

²²Ento Abram te dok iye ni, “An doŋ atyeko kwoŋ oko baŋ Rwot Obaŋa Amalo Meicel, ame oketo polo kede lobo,

²³ni mom dok abino gamo ginnoro dwogo baŋa, kadi atin uci del amukkoro, me kur ibed kobo ni, ‘Amio Abram olony.’

²⁴Mom dok abino medo gamo ginnoro pira kono ka gin ame jona ocamo, kede dul lim ame apokki jo ame owoto keda-ni; wek Aner, kede Ecikol kede Mamre ter meggi.”