Read lango Agege 16 Bible Online

Agege 16 - lango bible

Agege 16

¹Carai dako Abram onwoŋo mom onywalle atinnoro. En rik onwoŋo tye kede aŋeca mere ame nyiŋe Agar, nyako me Miciri.

²Carai rik te kobbi Abram ni, “Nen, an Rwot mom omia anywalo atinnoro, yin myero iwot idony baŋ aŋecana, me atot ya nywalliwa atinnoro.” Abram daŋ te ye kop ame cege akobo,

³Carai dako Abram te tero aŋeca mere Agar, nyako me Miciri, te miyo baŋ cware Abram me bed dako mere. Man otimere i kare ame Abram doŋ onwoŋo obedo mwaka apar i Kanaan.

⁴Abram daŋ te cako bedo kede Agar, eka te yac oko. A doŋ en oneno ni etye kede yic, te ero acae oko i kom dako adwoŋ Carai kun ŋe ŋe i wan arac,

⁵Eka Carai te kobbi Abram ni, “Rac ame otimere i koma bed gire i wii. An rik amio aŋecana i kori, aman ka en doŋ oneno ni eyac, te ero caya kun ŋe na i waŋ arac. Rwot doŋ ŋol kop i akina an kede yin.”

⁶Abram te gamo dog Carai ni, “Nen ba, aŋecani tye i te locci, yin giri tim gin ame yii mito I kome.” Carai te bedo wuno aŋeca atek meicel, omio te riŋo oko.

⁷Amalaika a Rwot te nwoŋe i ŋet waŋ pii ame tye i tim, en waŋ pii ame tye i yo ame woto i Cur.

⁸Eka te penye ni, “Agar we, aŋeca a Carai, kara iya i kwene? Iwot kwene?” En te gamo ni, “An kom ariŋo Carai, dako ame onwoŋo loa, ame abedo baŋe.”

⁹Amalaika a Rwot te kobbe ni, “Yin dok baŋ dako ame loi-nono, miye ite loccere.

¹⁰Abino miyo ikwai nya, doko apol meicel, ame kwanogi bino loyo jo oko, pi polgi.

¹¹Nen ba, yin iyac, ibino nywalo atin awobi, ibino cako nyiŋe Icmael[2]; pien Rwot doŋ ociko yite i kom canni.

¹²En bino bedo acalli kana me tim. En bino bedo ager ame ryeo ciŋe i kom dano ducu, dok jo luŋ bino ryeyo ciŋgi i kome. En bino bedo kun dagere omego mere ducu.”

¹³Agar te cako nyiŋ Obaŋa ame okobo kede kuno ni, “Yin Obaŋa ame neno;” pien okobo ni, “An kara ateteni aneno Obaŋa ame ŋe na kare luŋ.”

¹⁴Mannono omio ocako nyiŋ waŋ pii-nono ni Beer-lakairoi, tye i akina Kadec kede Bered.

¹⁵Agar te nywalli Abram atin awobi. Abram te cako nyiŋ wode ame Agar onywalo ni Icmael.

¹⁶Abram onwoŋo doŋ mwaka me dittere oromo pyeraboro wie abicel i kare ame Agar onywalo iye atin baŋ Abram.