Read lango Agege 17 Bible Online

Agege 17 - lango bible

Agege 17

¹A doŋ Abram oromo mwaka pyeraboŋwen wie aboŋwen me dittere, Rwot dok te nen baŋ Abram, te kobbe ni, “An Obaŋa ame Won Twer Ducu. Wot i nyima aboŋo balloro,

²cite abino keto cikerena wan kedi, dok abino miyi inya meicel.”

³Abram oryebere piny eka Obaŋa te kobbe ni,

⁴“Nen ba, cikerena kedi bino bedo kit man, yin ibino doko kwaro a rok apol meicel.

⁵Cakere tin nyiŋi doŋ mom bino bedo Abram, ento bino bedo Iburaim[3], pien doŋ aketi me doko kwaro a rok apol.

⁶Abino miyo ikwai nya atek meicel, dok abino miyo idoko rok apol, rwode adoŋodoŋo daŋ bino ya i komi.

⁷Abino moko cikerena wan kedi, karacel kede ikwai ame bino lubi icennere, kede ikwaegi daŋ luŋ nakanaka, me bed cikere ame perakino atwal, me an abed Obaŋawu, yin kede ikwai ame bino lubi.

⁸Dok lobo ame ibedo iye acalo welo-ni, ame en lobo Kanaan luŋ, abino miyo baŋi kede baŋ ikwai ame bino lubi, me bed meggi atwal; dok an abino bedo Obaŋagi.”

⁹Obaŋa dok te kobbi Iburaim ni, “Aco yin ba, myero igwok cikerena, yin kede ikwai ame bino lubi luŋ aluŋa.

¹⁰Cikerena ame ibino gwoko, ame bino bedo i akina wan kedi, kede ikwai ame bino lubi, en ene: Itino awobe luŋ ame tye i akinawu obino lirogi oko.

¹¹Obino liro del komgi me co, me bed gin ame nyuto cikerena ame tye i akina an kede wun.

¹²Atin ame ico ka oromo nino aboro obino liro del kome me co; co ducu i akina ikwai obino lirogi. Cakere i kom itino ame onywalo i odi, tuno kede i kom itino ame iwilo awila kede lim i baŋ rok ocele, ame mom onywalogi i akina ikwai.

¹³Gin luŋ obino lirogi, co ame onywalo i odi, anaka en ame iwilo awila kede lim; me cikerena bed i del komwu me co nakanaka.

¹⁴Ico moro ame mom oliro del kome me co waŋe bino rwenyo oko i akina jo me turgi, pien onwoŋo en oturo cikerena.”

¹⁵Obaŋa dok te kobbi Iburaim ni, “Aco dakoni Carai nyiŋe mom dok bino bedo Carai, ento nyiŋe doŋ bino bedo Cara[4].

¹⁶An abino miye winyo, dok abino miyo nywalli atin awobi. Abino miye winyo, en bino doko tota a rok apol meicel, rwode adoŋodoŋo me rok apol daŋ bino ya i kome.”

¹⁷Cite Iburaim oryebere piny i nyime te nyero kun kobo i cunye ni, “Dano ame mwaka me dittere doŋ romo mia acel twal, dok pwod bino nywalo atin awobi? Cara daŋ mwaka me dittere doŋ oromo pyeraboŋwen twal, dok pwod twero nywalo atin?”

¹⁸Mannono omio Iburaim okobo baŋ Obaŋa ni, “Icmael gire en a doa myero bed kwo i nyimi!”

¹⁹Obaŋa te dokke iye ni, “Pe gire amannono, ento dakoni Cara en ame bino nywalo atin ico, dok ibino cako nyiŋe Icaka[5], dok abino moko cikerena kede me bed cikere ame bino ri nakanaka baŋ ikwae luŋ ame bino lube.

²⁰Aco kwacci pi Icmael, atyeko winyo, nen ba, abino miye winyo, abino miyo en nywal, nya apol meicel. Abino miyo en nywalo oloc apar wie aryo, dok daŋ abino miyo en bedo rok adwoŋ.

²¹Ento abino moko cikerena kede Icaka, atin ame Cara en abino nywalli i kodi kare acalo man mwaka a bino.”

²²Kare ame doŋ otyeko kop kede, Obaŋa te ya gire oko i baŋ Iburaim, te dok malo.

²³Iburaim te tero Icmael karacel kede lwak opii luŋ ame onywalo i ode, kede ame owilo awila i lim; itino a co luŋ ame tye i akina itino ame tye i ot Iburaim, te liro del komgi me co oko i nino-nono ikome, kite acalo Obaŋa ocike kede.

²⁴Iburaim oliro del kome me co i kare ame mwaka me dittere doŋ oromo pyeraboŋwen wie aboŋwen.

²⁵Aco wode Icmael onwoŋo doŋ mwaka me dittere tye apar wie adek i kare ame oliro del kome me co.

²⁶Iburaim kede wode Icmael oliro del komgi i nino-nono ikome,

²⁷karacel kede jo luŋ a rik tye i ode. Itino ame onywalo i ode kede jo ame owilo awila kede lim i baŋ rok ocele, gin daŋ olirogi karacel kede.