Read lango Agege 18 Bible Online

Agege 18 - lango bible

Agege 18

¹Rwot dok te nen baŋ Iburaim i te kworo ame tye i Mamre kun onwoŋo en obedo i dog kema mere i kare ame piny lyet.

²Iburaim otiŋo waŋe malo te neno jo adek tye ocuŋ i nyime. Ka onenogi oriŋo kun ya i dog kema mere, te wot rwatte kedgi, te ryebere piny,

³kun kobo ni, “Adwoŋŋa, ka ce doŋ berra onen i nyimi, myero kur doŋ ikat an amironi akata.

⁴Koŋ iwek kelliwu pii moro atitidi me ilwok wunu i tyenwu, eka ite koŋ we wunu i te yat man.

⁵Awot koŋ kelliwu ogati moro me idwok wunu i lao ite kato giwu; kite a doŋ ibino wunu baŋ amirowu-ni.” Gin te gamo doge ni, “Wot itim kite ame ikobo-nono.”

⁶Iburaim te ru wot oko baŋ Cara i kema, te kobbe ni, “Juk moko apwottere ame romo dita adek, ijeb, me ited kede capattoro atitino.”

⁷Eka Iburaim te riŋo iyi awi, te kwanyo atin twon etobayit ame riŋo mere pwod yom dok mit, te miyo baŋ awo be mere, awobe mere te ru yiko oko oyotoyot.

⁸Iburaim te tero cak awac kede en alepa, kede riŋo ame doŋ otedo oko, eka te ke to i nyimgi; en te cuŋ i laŋetgi ite kworo kuno pi konyogi, kun gin tye acem.

⁹Gin te penye ni, “Dakoni Cara kara tye kwene?” En ogamo ni, “En tye i kema.”

¹⁰En te kobo ni, “Abino dwogo baŋi i kare me cwir, dakoni Cara te nywalo wode.” Cara onwoŋo tye i ŋec i dog kema kun awinyo kopgi.

¹¹I karenono onwoŋo doŋ mwaka Iburaim kede Cara me ditogi dwoŋ; dok Cara daŋ onwoŋo mom doŋ two two me dwe bala mon wadgi.

¹²Man omio Cara onyere kene kene kun kobo ni, “En ame doŋ ati rom man-ni, kara pwod dok abino nwoŋo yomcuny?”

¹³Rwot te kobbi Iburaim ni, “Cara kara onyero piŋo kun kobo ni, ‘An kara dok abino nywalo atin aman doŋ ati oko-ni?’

¹⁴Tye ginnoro ame loo Rwot? Ka kare oromo, an abino dwogo dok kan i cwir. Cara te nywalo wode.”

¹⁵Cite Cara te kwero oko pi lworo kun kobo ni, “An gira mom anyero.” Ogamo doge ni, “Pe, me nyero inyero gire.”

¹⁶Kare ame jo-nono ocako ya oko i kuno, gin otiko yo a dok tutuŋ Codoma, eka Iburaim te lwokogi iyo,

¹⁷Rwot te tamo ni, “An myero amuŋŋi Iburaim gin ame awot tiyo oko?

¹⁸Aco kun en Iburaim bino doko rok adwoŋ atek, ame rok luŋ me wi lobo bino nwoŋo winyo pire.

¹⁹Pe gire, an doŋ atyeko yere oko, pi mannono, myero en doŋ pwony itino mere kede jo me ode ame bino lube, me bedo jo a wapo yo a Rwot kun otio gin atye atira dok daŋ oŋolo kop atira; me wek icennere Rwot cob gin a rik ociko baŋ Iburaim.”

²⁰Rwot doŋ te kobbi Iburaim ni, “Koko i kom Codoma kede Gomora doŋ akato kare oko, dok balgi doŋ dwon atek;

²¹abino wot kuno me awot anen ka ce kit koko ame awinyo i komgi-ni tye ka timere ateni; amito ŋeyo.”

²²Jo-naca doŋ te cako wotgi i Codoma, ento Iburaim omedde cun i nyim Rwot.

²³Icennere Iburaim te noko ceggi, te kobo ni, “Yin ateni ibino tyeko jo a kitegi atira karacel i jo areco?

²⁴Ka kono jo a kitegi atira bino nwoŋere i boma-nono pyerabic, ibino tyekoboma-nono oko, mom ibino wekoboma-nono pi jo pyerabic ame kitegi atira a tye iye-nono?

²⁵Pe amannono gire! Yin pe myero itim kittono, neko jo a kitegi atira karacel obalo kun imio jo a kitegi atira bedo rom aroma i jo obalo. Pe amannono! Aŋolkop me lobo luŋ mom doŋ bino ŋolo kop atira bo?”

²⁶Rwot te gamo ni, “Ka ce abino nwoŋo jo a kitegi atira pyerabic i Codoma, ame bedo i bomanono, abino weko kabedo-nono luŋ pirgi.”

²⁷Iburaim dok te gamo ni, “Nen, an kom a pua kede buru keken-ni, ento amiye gira doŋ oko me kop kedi yin Rwot.

²⁸Ka kono bino rem jo abic kono me romo pyerabic? Ibino tyekoboma-nono oko pi abic ame orem-mi?” Ogamo ni, “An mom abino tyeko ka kono anwoŋo jo pyeraŋwen wie abic tye kuno.”

²⁹Dok omedo penyo ni, “Ka kono inwoŋo jo pyeraŋwen keken kono?” Ogamo ni, “Pi jo pyeraŋwen-ni, mom abino timo ginnoro iye.”

³⁰Dok omedo kobo ni, “Akemo kur maki ba, Rwot, an pwod amedo kop kedi. Ka kono i bino nwoŋo jo pyeradek kono?” En ogamo ni, “Ka abino nwoŋo jo pyeradek kuno; mom abino timo ginnoro.”

³¹Iburaim dok okobo ni, “Nen an amiye gira doŋ me kop kedi, yin Rwot. Ka kono ibino nwoŋo jo pyeraryo kuno kono?” Ogamo ni, “Pi jo pyeraryo-nu, mom abino tyekobomanono.”

³²Iburaim dok okobo ni, “Akemo kur maki ba, Rwot, an doŋ akop kedi tyen acel keken. Ka kono ibino nwoŋo jo apar keken kono kuno?” Rwot ogamo ni, “Pi jo aparrono mom abino tyekoboma-nono.”

³³A doŋ Rwot otyeko kop oko gin Iburaim, te wot oko; Iburaim daŋ te dok i kabedo mere.