Read lango Agege 20 Bible Online

Agege 20 - lango bible

Agege 20

¹Iburaim oya i kuno te wot tutuŋ Negeb, te bedo i akina Kadec kede Cur, te bedo koŋ pi mwakki mogo i Gerar.

²Iburaim te cako kop i kom Cara ame onwoŋo cege ni, “En aminna”; pi mannono Abimereki ame onwoŋo rwot me Gerar omio okelo Cara baŋe.

³Ento i dyeworrono Obaŋa te bino baŋ Abimereki i waŋ lek, te kobbe ni, “Nen ba, yin doŋ i dano ame ito oko pi dako ame ikelo-ni, pien cware tye.”

⁴Kare-nono onwoŋo Abimereki mom ru oribere kede, omio en te kobo ni, “Rwot, ibino neko jo a mom i balloro?

⁵Nen, en ikome okobo ni ‘En aminna’. Dako daŋ okobo ni, ‘En ominna.’ Man an gira atimo kun yia cil, ciŋa daŋ balloro mom iye.”

⁶Obaŋa te dokke iye i lek ni, “An aŋeo ni itimo man kun yi gire cil, an daŋ ageni oko me kur itim balloro baŋa: man en gin omio mom aye igude kadi acel.

⁷Aman doŋ dwok dako-nono oko baŋ cware. Dano-nono obedo adwarpiny, en bino kwaya piri me wek ibwot i to. Ento ka ce yin mom idwoko dakonono, yin karacel kede joni luŋ ibino to wunu oko.”

⁸Mannono omio Abimereki odilo odiko con te lwoŋo omiro mere luŋ, eka te tittigi kop ducu. Gin luŋ ote bedo i lworo atek meicel.

⁹Abimereki olwoŋo Iburaim te penye ni, “Omio itimowa aman kono? Aballi ŋo kara, omio yin ite kelo bal adwoŋ rom man i koma kede i kom locca? Gin ame yin itimo i koma mom romo atima kadi acelloro.”

¹⁰Abimereki te medo kobo ni, “Rik kara onwoŋo itamo ŋo omio ite timo man?”

¹¹Iburaim te gamo ni, “Gin omio atimo amannono, pien onwoŋo an atamo ni jo me kabedo man mom lworo Obaŋa, gin bino neka oko pi dakona.

¹²Kono ateni mere, en obedo aminna, wan kede papo acel, ento totowa mom acel, ento en odoko cega.

¹³Kare ame Obaŋa doŋ omio aya oko i ot a pappa ate cako loŋo piny, an akobbe ni, ‘Man en yo ame itwero nyuto kede mari i koma, i kabedo luŋ ame wan obino wot iye, yin myero ikob ni an abedo ominni.’ ”

¹⁴Abimereki te miyo Iburaim rommi, dok, opii ame co kede ame mon, me mot; te daŋ dwoko dako mere Cara.

¹⁵Abimereki te kobo ni, “Lobona obedo gire megi ame itwero yero kannoro keken iye, ite bedo kan ame yii mito.”

¹⁶Te kobbi Cara ni, “Nen, amio doŋ ominni cekel me ryal ame romo tutumia, me culo kit cannoro luŋ ame otimere i komi; cite yin giri naka mom itimo balloro.”

¹⁷Iburaim te kwayo Obaŋa, Obaŋa te cano Abimereki kede dako mere, karacel kede aŋeca mege luŋ, te miyogi nywalo itino.

¹⁸Rwot onwoŋo omio dako acel acel ame tye i ot Abimereki omwato oko pi Cara dako Iburaim.