Read lango Agege 21 Bible Online

Agege 21 - lango bible

Agege 21

¹Rwot dok te limo Cara acalo rik en okobo, Rwot daŋ te timo Cara acalo rik ociko.

²Cara oyac te nywalli Iburaim atin ico kun onwoŋo en rik doŋ oti oko, kite a rik Obaŋa ocike kede-ni.

³Iburaim te cako nyiŋ wode ame onywalo ni Icaka.

⁴Kare ame Icaka doŋ oromo nino aboro me dittere, Iburaim olire oko kite a rik Obaŋa ocike kede.

⁵Mwaka Iburaim me dittere onwoŋo doŋ oromo mia acel i kare ame en nywalo wode Icaka.

⁶Cara te kobo ni, “Obaŋa omio anyero, anaka ŋat ame bino winyo daŋ bino nyera.

⁷Ŋa ame yam koŋ okobbi Iburaim ni Cara waŋŋoro doto atin? Nen ka doŋ onywalli Iburaim atin awobi ame doŋ en oti oko-ni.”

⁸Atin odoŋo eka ote ryemo oko i cak. Iburaim rik te tedo arama adwoŋ meicel i nino me ryemo Icaka i cak.

⁹Cara ka oneno wot a Agar, nya jo Miciri ame rik Iburaim onywal kede tye atuko atinnere Icaka,

¹⁰en okobbi Iburaim ni, “Ryem aŋeca-ni wot karacel i wode, pien wot aŋeca-ni mom bino leyo jamiwa karacel i woda Icaka.”

¹¹Kop man owaŋo cuny Iburaim atek, pi wode.

¹²Ento Obaŋa te kobbi Iburaim ni “Cunyi kur waŋ pi atinni kede aŋecani; ginnoro luŋ ame Cara okobo, yin lubi i kite ame en okobo kede, pien itino Icaka en ame obino cwano ni ikwaeni.

¹³Wot aŋeca daŋ abino miyo doko rok, pien en daŋ obedo atinni.”

¹⁴Iburaim te dilo odiko con, kwanyo kwon kede pii ame opiko iyi opoko, omio Agar, eka te lwoke, tere iyo; ocibo jami kede atin i wi gwok Agar, te doŋ cike. Agar te wot bedo loŋo tim me Beer-ceba.

¹⁵Kare ame doŋ pii a rik tye i opoko otum oko, Agar opyelo atinnere piny i te yat,

¹⁶te weko gire kannono, te wot bedo kannabor i nyim, ya i baŋ atin tuno kan ame en obedo iye borrere rom i kan ame dano twero bayo atero te gik iye; pien en onwoŋo okobo ni, “Mom myero anen kite ame atinna ato kede.” En gire te bedo i nyim kan ame ebedo iye pinnyaca, ento atin te ero delle oko i koko,

¹⁷Obaŋa te winyo koko atin, amalaika a Rwot te lwoŋo Agar i polo kun kobbe ni, “Agar we, kara ŋo awuni? Wek lworo bedi, pien Obaŋa doŋ otyeko winyo koko atin i kan ame ipyelo iye.

¹⁸Myero doŋ iya malo, i wot itin atiŋ, kwake aber i ciŋi, pien abino miyo en doko rok adwoŋ.”

¹⁹Obaŋa te yabo waŋ Agar, en te neno akoŋ, te wot twomo pii piko iyi opoko poŋ kwic, te miyo wode mato.

²⁰Obaŋa te bedo kede atinnono; en te doŋo, te bedo gire i tim, te doko twon adwarroro ame dwaro kede atero.

²¹Obedo i tim me Paran; tottere te nyomme nya jo Miciri.

²²I kare-nono Abimlereki kede Pikol adwoŋ me monnyere okobbi Iburaim ni, “Obaŋa tye kedi i ginnoro luŋ ame yin itio.

²³Pi mannono, aman myero ikwoŋ i nyim Obaŋa ni mano mom ibino dwala kadi acelloro, kadi atinna, onyo ikwaa. Kite acalo an atimo ber baŋi, yin daŋ tim ber baŋa karacel kede lobona ame ibedo iye-ni.”

²⁴Iburaim te gamo ni, “Abino kwoŋ.”

²⁵Iburaim te nyuto koko mere baŋ Abimereki pi akoŋŋoro ame onwoŋo omiro mere omao oko,

²⁶Abimereki te gamo ni, “An naka gira mom aŋeo ni ŋattoro otimo kittono, yin daŋ mom ititta. Tin tyen me agege an me winyo kop man.”

²⁷Iburaim te kwanyo rommi kede twoni miyo baŋ Abimereki, eka gin aryo luŋ ote keto cikere i akinagi.

²⁸Iburaim te yero akale rommi abiro keto pat.

²⁹Abimereki te penyo Iburaim ni, “Kara piŋo iketo akale rommi abiro ca pat?”

³⁰Iburaim ogamo ni, “Akale rommi abiro-ni ame ibino gamo i ciŋa, ibino terogi me bedo cadenna ame nyuto ni an en a rik akunyo akoŋ man.”

³¹Man en omio kabedo-nono olwoŋo ni Beer-ceba, pien gin aryo luŋ okwoŋo kwoŋgi iye.

³²Rik gin obin oketo cikeregi i Beer-ceba kittono. Abimereki gin kede Pitol adwoŋ me mony, te doŋ ya dok i lobo a jo me Piriciti.

³³Iburaim te pito anaŋa i Beer-ceba, te lwoŋo iye nyiŋ Rwot, ame en Obaŋa ame Perakino Atwal.

³⁴Iburaim te ri i lobo a jo Piriciti kare alac.