Read lango Agege 22 Bible Online

Agege 22 - lango bible

Agege 22

¹A doŋ kop man otum, Obaŋa oomo cuny Iburaim. En olwoŋe ni. “Iburaim!” Iburaim te gamo ni. “An ene.”

²Okobbeni, “Ter wodi Icaka, ame en wodi acel keken ame imaro, wot kede i lobo me Moria, me iwot iŋole oko kuno, iwaŋ me yala kede, i wi kidi moro ame abino nyutti.”

³Iburaim te dilo odiko con, tweyo gi-bedo mere i ŋe kana, te kwanyo awobe mere aryo wot kedgi karacel kede wode Icaka; otoŋo yen me waŋo gin oŋolo me yalo Obaŋa, te cako wottere i kabedo kan ame Obaŋa otitte.

⁴I nino me adekkere, Iburaim te tiŋo waŋe neno kabedonaca i kannabor.

⁵Iburaim te kobbi awobe mere aryo ni, “Wun bed wunu koŋ kan karacel kede kana, an karacel kede atin-ni owot loka ca, owot owor Obaŋa, ote dwogo baŋwu.”

⁶Iburaim te tiŋo yen cibo i wi wode kaka, en te mako mac kede pala i ciŋe; gin te cako wotgi karacel.

⁷Icaka te lwoŋo pappere Iburaim ni, “Apap!” Iburaim te gamo ni, “An en woda.” Icaka te penye ni, “Nen, yen kede mac tye, kara romo ame owot waŋo me yalo Obaŋa tye kwene?”

⁸Iburaim ogamo ni, “Obaŋa en ame bino miyowa romo me awaŋa, atinna.” Gin gigi ote medde i wotgi anyim.

⁹I kare ame gin otuno i kabedo ame Obaŋa onwoŋo ociko, Iburaim ocano keno lam, te daŋ cano yen i wie, te tweyo wode Icaka pyelo, buto i wi yen.

¹⁰Iburaim te cwayo ciŋe kwanyo pala me neko wode oko.

¹¹Amalaika a Rwot te lwoŋe i po lo ni, “Iburaim! Iburaim!” En te gamo ni, “An ene.”

¹²Okobbe ni, “Kur igud atinnono, kur itim ginnoro i kome kadi acel; tin doŋ atyeko niaŋ ateni ni yin kara ilworo Obaŋa, pien pe itwonna wodi, ento imia, aco kono en acel keken.”

¹³Iburaim te tiŋo waŋe malo, te neno nyok romo tye i laŋete kun tuŋe omoko iyi agaba; Iburaim te wot kelo nyok romo-nono ŋolo me yalo Obaŋa akaka wode.

¹⁴Iburaim te cako nyiŋ kabedonono ni, Rwot en abino miyo; kite a jo kobo kede naka atot onyoni, ni, “Obino nwoŋo i wi kidi a Rwot.”

¹⁵Amalaika a Rwot dok te lwoŋo Iburaim tyen me aryo mere,

¹⁶kun kobo ni, “Rwot okobo ni, Doŋ atyeko kwoŋ oko i nyiŋa kena kena ni, pi tim man ame itimo, me mom twonna wodi, aco kono en wodi acel keken,

¹⁷abino miyi winyo ateteni. Abino miyo ikwai nya, medde apol a cal i lwak acer apipim ame tye i polo, dok a rom i kwoyo me dog nam. Ikwai en ame bino loyo okworgi.

¹⁸Rok luŋ ame tye i wi lobo bino nwoŋo winyo i kom ikwai pien yin iwinyo doga.”

¹⁹Iburaim doŋ te dok cen baŋ awobe mere; te ya i kuno karacel kedgi anaka i Beer-ceba, te bedo kuno.

²⁰Kare ame kop man doŋ otum, otero kop baŋ Iburaim ni, “Nen Mirika doŋ otyeko nywali ominwu Nakor itino;

²¹Atin kao obedo Uj, omego mere Buji, Kemuel papa Aram,

²²Keced, Kaja, Pildac, Yidlap kede Betuel.”

²³Betuel te nywalo Lebeka, Mirika onywali Nakor omin Iburaim itino magi aboro.

²⁴Dako a Nakor ame aŋeca daŋ, ame nyiŋe Reuma, onywalo Tebak, Gakam, Takac kede Maaka.