Read lango Agege 23 Bible Online

Agege 23 - lango bible

Agege 23

¹Cara ori i lobo mwakki mia acel kede pyeraryo wie aboro. Man en mwaka ame Cara operakino kede i lobo.

²Cara oto i Kiriat-arba, ame en Kebron, ame tye i lobo Kanaan. Iburaim te kwero cola kun koko Cara kede pig waŋe.

³Iburaim te ya oko i nyim dako mere oto, te wot kobbi jo Kitti ni,

⁴“An arok ame abedo i akainwu acalo welo. Mia wunu ba dullobo moro baŋwu kan me bed mega me yiko jo; me ayik iye kom dakona ame oto oko ca, me kur doŋ abed neno kome.”

⁵Jo Kitti te gamo dog Iburaim ni,

⁶“Winy ba, adwoŋwa, yin aloc adwoŋ meicel i ikinawa kan. Yik giri kom dakoni i lyelloro aber ame yin iyero i akina lyellewa ecipan ame tye kan-ni. Mom tye ŋattoro i akinawa ame bino twoni lyellere, onyo ame bino kwero ni kur iyik kom dakoni iye.”

⁷Iburaim te ya malo, oryebere i nyim jo Kitti ame gin obedo wegi lobo-nono,

⁸kun kobo ni, “Ka imito wunu ni ayik kom atona, me kur dok abed neno kome, winy wunu koppa, ikwaya wunu Epron ame wot a Joar,

⁹me en ye miya gorogoro kidi mere ame tye i Makpela, ame obedo mere ame tye iyi agikki poto mere. Me en ŋolla wellere ame romo, me awil, en te miya i nyimwu, me bed mega me yik.”

¹⁰I kare-nono onwoŋo Epron tye obedo i akina jo Kitti; Epron ame en dano me Kitti te gamo dog Iburaim kun jo Kitti luŋ karacel i jo luŋ ame donyo i dog boma me Kitti daŋ tye awinyo.

¹¹Okobo ni, “Adwoŋ, mom amannono gire, yin winy koppa. An amii poto, dok amii daŋ gorogoro kidi ame tye iye-nono. Amii giri nono i nyim itino a jona luŋ. Yin yik iye kom dakoni.”

¹²Iburaim dok te ryebere i nyim wegi lobo-nono,

¹³te kobbi Epron ame wegi lobo-nono luŋ tye awinyo, ni, “Pe gire, ka twerre ye koppa. Myero yin iye an aculli limmoro pi lobo ame imia. Ye gamo lim i ciŋa me ayik kom atona kuno.”

¹⁴Epron te gamo ni,

¹⁵“Adwoŋ, winy doga, poto-nu romo cekel me ryal mia aŋwen keken, kara mannono ŋo i tuŋ baŋi kede baŋa? Yin yik giri kom atoni.”

¹⁶Iburaim te ye kop Epron, te pimo ryal ame okobo i nyim jo Kitti, ame romo cekel mia aŋwen, kun pimo i kidi mijan ame ocat wil tio kede.

¹⁷Mannono te miyo poto a Epron ame tye i Makpela, ame rik tye tutuŋ kide me Mamre, te doko me Iburaim. Poto karacel kede gorogoro kidi a rik tye i poto-nono, ote moko luŋ,

¹⁸i nyim jo Kitti kede jo luŋ ame donyo i dog boma me Kitti.

¹⁹A doŋ man otum, Iburaim te yiko kom cege Cara i gorogoro kidi ame tye i poto me Makpela, i yo tutuŋ kide me Mamre, ame en Kebron, ame tye i lobo a jo Kanaan.

²⁰Jo me Kiti te moko i poto-nono karacel kede gorogoro kidi a rik tye iye, myero bed me Iburaim me yik.