Read lango Agege 24 Bible Online

Agege 24 - lango bible

Agege 24

¹I kare ame Iburaim doŋ oti oko, ame mwaka me dittere doŋ bup, dok Obaŋa daŋ doŋ otyeko miye winyo i jami luŋ.

²Iburaim okobbi amiro mere ame rik bedo baŋe kun loo jami mere luŋ, ni, “Rwak ciŋi i te amuruna,

³me ami ikwoŋ i nyiŋ Rwot Obaŋa me polo kede lobo, ni mannono mom ibino nyommi woda nyannoro ame tye i akina anyira me Kanaan, ame an abedo i akinagi-ni.

⁴Ento ibino wot i lobo me turwa, baŋ atekerewa, me iwot i nyommi woda Icaka dako mere i kuno.”

⁵Amiro mere te gamo ni, “Kara ka dako mom bino ye bino keda i lobo-ni kono? Myero an adwokwodi i lobo me turwu, ame rik ibino iye?”

⁶Iburaim te kobbe ni, “Nen aber ni mom iwoto i woda idwoko kuno.

⁷Rwot Obaŋa me polo ame rik okwanya i ot a pappa, i lobo ame onywala iye, ame okobo keda kun kwoŋo ni, ‘Abino miyo lobo man baŋ ikwai’, en bino cwayo amalaika mere i nyimi, bino miyo i nyommi woda dako i kuno.

⁸Cite ka dako en ame okwero bino kedi, kwoŋŋa-ni mom bino maki giri; cite woda en a mom myero i dok kede kuno.”

⁹Amiro-nono daŋ te rwako ciŋe i te amuru adwoŋŋere Iburaim, te kwoŋ baŋe i koppono.

¹⁰Amiro te kwanyo inaga adwoŋŋere ame romo apar nono, te cako wottere kun tero daŋ jami ocele abeco apapat me mot oya ibaŋ adwoŋŋere. En te wot i Mecapotamia i paco a Nakor.

¹¹Otyeno ame mon ciro twomo pii-ni, en omio inaga mere luŋ orumo coŋgi piny i dog akoŋ ame tye i boma.

¹²En te kwayo Obaŋa kit man ni, “Ama Rwot Obaŋa adwoŋŋa Iburaim, mi kop luŋ aluŋa tin cobere baŋa aber. Nyut marri a mom lokere i kom adwoŋŋa Iburaim.

¹³Nen, an abino cuŋ i dog akoŋ kan kun mon me boma-ni bino me twomo pii;

¹⁴mi nyan ame abino kwayo pii me amata ni, ‘Ama koŋ icib ba guluni piny imia pii amati,’ en bino dok iye ni, ‘Mati, me ami inagani daŋ mati,’ en abed nyan iyero pi amironi Icaka. Mannono bino miyo aŋeo ni yin doŋ inyuto marri a mom lokere baŋ adwoŋŋa.”

¹⁵Ame en mom ru otyeko koppere, nen Lebeka nyaka Betuel wot a Mirika, dako a Nakor ame obedo omin Iburaim te bino oko i dog akoŋ kun oketo gulu pii i wii gwoke.

¹⁶Nyannono onwoŋo mwonya atek, dok daŋ onwoŋo mom ru oŋeye i lo moro. En owoto okato i akoŋ, te twomo pii mere poŋ gulu, te yeye dwogo kede.

¹⁷Amiro Iburaim te riŋo ŋolle i kome, te kobbe ni “Tima ber imia ba koŋ pii i guluni-nono a mati?”

¹⁸Nyannono te gamo ni, “Mat adwoŋŋa”; en te ru tiŋo gulu pii mere oko i ciŋe, te miye mato.

¹⁹Kare ame en doŋ otyeko mato, nyannono te kobo gire kene ni, “Abino twomo pii amio inagani daŋ, naka ka gin omato oromogi.”

²⁰Oyotoyot en te ru onyo pii i weer, te riŋo dok me omo pii iyi akoŋ, en te bedo twomo pii, naka oromo inaga ducu.

²¹Amiro Iburaim onwoŋo oliŋ mot kun tye aneno nya-nu, me eniaŋ ka ce Rwot doŋ omio wottere ocobere oko aber, onyo pe.

²²Ame inaga luŋ doŋ otyeko mato pii oko, amiro Iburaim te kwannyi nyannono atem me jabu, me um, ame pekkere romo nucu cekel, kede atem ocele aryo me jabu daŋ, mannono me ŋut ciŋ, ame pekgi romo cekel apar,

²³kun penye ni, “Yin i nyaka ŋa? Kabuto moro twero nwoŋere turwu pirwa?”

²⁴En te gamo ni, “An a nyaka Betuel ame obedo wot a Mirika ame onywalli Nakor.”

²⁵Dok te kobo ni, “Reŋ kal tye adwoŋ ata kede cam ocele ame romo daŋ inagani; kabuto daŋ twero nwoŋere pirwu.”

²⁶Amiro Iburaim te kulo wie piny woro Rwot,

²⁷kun kobo ni, “Rwot ame en Obaŋa adwoŋŋa Iburaim, myero pwoc, pien mom oweko mar mere a mom lokere kede gennere i kom adwoŋŋa. An daŋ Rwot doŋ otyeko tela naka i ot atekere adwoŋŋa ikome.”

²⁸Nyako te riŋo tito kop ame otimere luŋ baŋ jo ame tye i ot a tottere.

²⁹Lebeka rik tye kede ominnere ame nyiŋe Laban. Laban oriŋo baŋ danonono i dog akoŋ.

³⁰Ka oneno atem me um kede me ŋut ciŋ baŋ aminnere, eka dok te winyo kop aminnere Lebeka ni, “Lonnono okobba kit man,” en owoto baŋ lonnono, te nwoŋo ocuŋ ceggi kede inaga mege i dog akoŋ.

³¹Te kobbe ni, “Biye, yin ame Rwot otyeko miyi winyo, piŋo dok icuŋ i ŋe boma? Pien doŋ atyeko yiko ot kede kabuto daŋ.”

³²Dano-nono te bino donyo i ot; Laban te gonyo del oko i kom inaga luŋ, te miyogi reŋ kal kede cam ocele; te daŋ kelo pii me lwoko tyen amiro Iburaim karacel kede jo owoto kede.

³³A doŋ okelo cam ocibo i nyime ni en cam, en okobo ni, “An pwod pe acem ka mom ru atito kop ame oora pire.” Laban te gamo ni, “Koŋ doŋ ikob do.”

³⁴En te kobo kit man ni, “An abedo amiro Iburaim,

³⁵Rwot otyeko miyo winyo adwoŋ meicel baŋ adwoŋŋa, omio en onwoŋo lim akwo atino kede adoŋo mege, tye i ryal kede jabu, opii kede aŋeca apipim, inaga kede kana daŋ ecipan.

³⁶Dok Cara dako adwoŋŋa otyeko nywalle atin awobi; Iburaim te miyo jami mere luŋ baŋ wode-nono.

³⁷Adwoŋŋa te miya kwoŋ kit man ni, ‘Mom ibino yerri woda nyannoro i akina anyira me Kanaan ame an abedo i akinagi-ni.

³⁸Ento ibino wot i ot a pappa, i akina atekerewa, en ame ibino nyommi woda dako iye.’

³⁹An rik abin agamo dog adwoŋŋa ni, ‘Kara ka dako mom bino ye bino keda i lobo-ni kono?’

⁴⁰En te gamo ni, ‘Rwot ame tela i wotta bino cwalo amalaika mere nywako yo karacel kedi, bino miyo wotti cobere aber; bino miyo inyommi woda dako i ot a pappa ikome.

⁴¹Kwoŋŋa-ni mom bino bedo i wii ka ce yin giri iwoto i ot a pappa eka gin en ate kwero miyi nyako.’

⁴²I kare ame atuno i dog akoŋ tin, akwao Obaŋa ni, ‘Ama Rwot Obaŋa, ame yin Obaŋa adwoŋŋa Iburaim, ka ibino miyo wotta-ni cobere aber,

⁴³nen, an en doŋ acuŋ i dog akoŋ kan; nyan ame bino twomo pii, an abino kobbe ni, “Tim ber imia ba pii iyi guluni-nono, me amati,”

⁴⁴nyannono bino gamo ni, “Mati, me ami inagani daŋ mati,” mi nyannono bed dako ame Rwot oyero me bedo dako a wot adwoŋŋa Iburaim.’

⁴⁵“I kare ame mom ru akobo kop i cunya otum, Lebeka obino oko kun oketo gulu pii mere i wi gwoke, te wot twomo pi i iyi akoŋ. An ate kwaye ni, ‘Mia ba pii amati!’

⁴⁶En te ru tiŋo gulu pii mere oko i wi gwoke, te kobo ni, ‘Mati, me ami inagani daŋ mati.’

⁴⁷Dok ate penye ni, ‘Yin kara i nyaka a ŋa?’ En te gamo ni, ‘An a nyaka a Betuel ame wot a Nakor, totta Mirika!’ An doŋ ate keto atem me jabu oko i ume kede i ŋut ciŋe ryoryo,

⁴⁸ate kulo wia piny woro Rwot Obaŋa, ame en Obaŋa adwoŋŋa Iburaim, ame otela aber i yo, te miya nwoŋo nyako omin adwoŋŋa me atera baŋ wode.

⁴⁹Doŋ aman titta wunu ka ce ibino nyuto wunu mar kede ateni baŋ adwoŋŋa; ka pe, daŋ ititta wunu me adok tuŋ ocele.”

⁵⁰Laban kede Betuel te gamo ni, “Kop man oya i baŋ Rwot, wan giwa mom otye i kopporo iye.

⁵¹Nen, en Lebeka en tye i nyimi-nono, yin tere iwot wunu kede, me en wot bed ci-wot adwoŋŋi kite ame Rwot otyeko kobo.”

⁵²Kare ame amiro Iburaim doŋ owinyo kopginono, oryebere piny i lobo i nyim Rwot.

⁵³Okwanyo atem me ryal kede jabu ecipan, kede boŋŋi, te miyo baŋ Lebeka; te dok miyo daŋ mottogo me wel baŋ ominnere kede tottere.

⁵⁴En karacel kede jo ame tye baŋe te doŋ cako cem kede mat; gin te buto nino acel kuno. Odiko gin te ya kwayogi ni, “Lwoka wunu doŋ adok baŋ adwoŋŋa.”

⁵⁵Omin a Lebeka kede tottere te gamo ni, “Koŋ iwek ba nyako bed kedwa pi nino aparroro keken, te wot gire.”

⁵⁶En ogamo okobo ni, “Kur dok imia wunu agal ba, kite acalo Rwot doŋ omio wotta ocobere oko-ni; weka wunu doŋ awoti, adok baŋ adwoŋŋa.”

⁵⁷Gin te gamo ni, “Koŋ iwek olwoŋe en nyako openye.”

⁵⁸Kare ame olwoŋo Lebeka, openye kun okobo ni, “Iye wot wun i dano-ni?” En te gamo ni, “Awot.”

⁵⁹Gin doŋ te cako lwoŋo nyargi Lebeka karacel kede apidi mere, kede amiro Iburaim, kede jo mere daŋ.

⁶⁰Gin te lammi Lebeka winyo kun okobbe ni, “Aminwa bed totta jo tutumia tyen tutumia apar, dok ikwae myero lo okworgi.”

⁶¹Ka man otum, Lebeka kede aŋeca mere, te ya cako wotgi; gin oyito, ote bedo i wi inaga kun olubo yo amiro Iburaim. Man en kit ame amiro Iburaim otero kede Lebeka.

⁶²Icaka onwoŋo rik bedo i Negeb, ame i kare-naca onwoŋo ceggi kede Beer-lakai-roi.

⁶³Otyeno moro acel Icaka onwoŋo owoto lat i dye bar, oyotoyot en te tiŋo waŋe malo, te neno inaga mogo tye abino.

⁶⁴Ka Lebeka daŋ otiŋo waŋe malo, oneno Icaka, te yito oko piny i wi inaga.

⁶⁵Openyo amiro Iburaim ni, “Maca kara lonnene ame abino i loka tuŋ ca, me bino rwatte kedwa cae?” Amiro te gamo ni, “Adwoŋŋa-ni ennono.” Lebeka te kwanyo boŋo wumo oko i wie.

⁶⁶Amiro te titti Icaka kop ducu ame otimere.

⁶⁷Icaka te kelo Lebeka i kema, me bedo dako mere kun daŋ mare. Omio cuny kaka te kwe oko pi to a tot tere.