Read lango Agege 25 Bible Online

Agege 25 - lango bible

Agege 25

¹Iburaim dok te nyomo dako ocele a nyiŋe Ketula,

²te nywalo Jimram, Jokocan, Medan, Midian, Icibak kede Cuak,

³Jokocan te nywalo Ceba kede jo Dedan. Dedan te nywalo jo Acurim, jo Letuc, kede jo Leummin.

⁴Aco awobe a Midian rik te bedo: Epa, Eper, Kanok, Abida kede Eldaa. Gin luŋ rik obedo itino a Ketula.

⁵Iburaim te miyo jami mere luŋ baŋ Icaka.

⁶Ento Iburaim daŋ te poko mot baŋ itino ame aŋeca onywalo kun en pwod kwo, te cwayogi oko teŋe i laŋet wode Icaka; gin te wot tuŋ kide.

⁷Mwaka Iburaim me dittere ame obedo kede i lobo, rik oromo mia acel i pyerabiro wie abic.

⁸Iburaim oto ame mwaka mere doŋ bup, a doŋ oteggo atek; en te wot nywako kabedo kede kwari mere,

⁹Awobe mere, Icaka kede Icmael te yike i gorogoro kidi ame tye i Makpela, i poto Epron wot a Cokar, dano me Kitti, ame tye tuŋ kide me Mamre,

¹⁰ame en poto ame rik Iburaim owilo i baŋ jo Kitti. Oyiko Iburaim kuno karacel kede dako mere Cara,

¹¹A doŋ Iburaim oto, Obaŋa te miyo wode Icaka winyo. Icaka te bedo i Beer-lakai-roi.

¹²Man en nyiŋ ikwae Icmael ame wot Iburaim, ame Agar nya jo Miciri, a rik obedo aŋeca a Cara, onywalli Iburaim:

¹³Nebayot, en obedo atin kao, jo olube te bedo Kedar, Adbeel, Miboam,

¹⁴Micima, Duma, Macca,

¹⁵Kadad, Tema, Jetur, Napic, kede Kedema.

¹⁶Man nyiŋ oloc apar wie aryo mea jo Icmael kun lubere atekeregi kede kabedogi.

¹⁷Mwaka Icmael me dittere ame ori kede i lobo rik oromo mia acel kede pyeradek wie abiro, en te to oko, te wot nywako kabedo i kwari mere.

¹⁸Lobo a jo Icmael rik ocakere i Kavila te tuno naka i Acuria ame tye tutuŋ waŋ apokki me Miciri. En rik obedo nyim omego mere luŋ.

¹⁹Man en ikwae Icaka wot Iburaim: Iburaim onywalo Icaka.

²⁰Icaka te nyomo dako mere Lebeka kun onwoŋo mwaka me dittere tye pyeraŋwen; Lebeka rik obedo nyaka a Betuel, ame en dano me Aram, ame tye i lobo me Padan-aram, am in a Laban me Aram.

²¹Icaka rik te kwayo Obaŋa pi dako mere ame onwoŋo oraŋa: RWOT te winyo kwaccere, te miyo Lebeka yac.

²²Itino te bedo twotwoma kengi kengi i yie, omio en te kobo ni, “Piŋo kara man tye atimere i koma?” En te wot penyo pire baŋ Rwot.

²³Rwot te kobbe ni, “Rok aryo tye iyii, jo aryo-nono bino cako pokere oko iyii; acel bino bedo atek kato awottere oko; atin atidi bino loyo atin kao.”

²⁴Ka kare me nywallere oromo, en onywalo rude.

²⁵Atinnere ame ogeo donyo, onywalo ame kome rema, dok kome luŋ obedo yeyer bala boŋo yer; omio ocako nyiŋe ni Ecau.

²⁶Icennere ominnere dok te donyo kun omako opuny tyen Ecau, omio ote cako nyiŋe ni Yakobo[6]. Kare ame onywalo itinonono onwoŋo mwaka kaka me dittere doŋ oromo pyerabicel nono.

²⁷I kare ame awobe-nono odoŋo, Ecau obedo twon okennoro atek i dwar i tim; Yakobo obedo amwol kun bedo mot i kema.

²⁸Icaka rik maro Ecau pi camo riŋo ame en odwaro, ento Lebeka rik maro Yakobo.

²⁹I kare ame Yakobo rik onwoŋo tye atedo ŋor, Ecau odwogo i tim ame kec oneko atek meciel.

³⁰Ecau te kwayo Yakobo ni, “Mia ba dekki arema wokkono acam, kec aneka meicel!” Koppono omio olwoŋo Ecau ni Edom.

³¹Ento Yakobo te kobbe ni, “Koŋ ige catta ditti me kao.”

³²Ecau te gamo ni, “Nen an aceggi to oko, dit me bedo kao kara konnyere ŋo?”

³³Yakobo ogamo ni, “Koŋ ige kwoŋ baŋa.” Ecau daŋ te kwoŋ baŋe, te cato dittere me kao oko baŋ Yakobo.

³⁴Yakobo te miye kwoŋ kede dek ŋor; en ocamo te mato pii i wie, te ya malo wot gire oko. Mannono en kite ame Ecau ocao kede dittere me bedo atin kao.