Read lango Agege 26 Bible Online

Agege 26 - lango bible

Agege 26

¹Kare ame kec doŋ opoto i lobo, kec ame pat i maca a rik pot i kare Iburaim, Icaka owoto i Gerar baŋ Abimereki, rwot a jo Piriciti.

²Rwot te nen baŋe kun kobbe ni, “Kur iwot i Miciri, ento myero ibed i lobo ame an abino titti.

³Koŋ ibed i lobo-ni tutuno, an abino bedo kedi, dok daŋ abino miyi winyo, pien lobo man luŋ abino miyo baŋ i kede baŋ ikwai. Abino cobo kwoŋ ame rik akwoŋo baŋ pappi Iburaim.

⁴Abino miyo ikwai nya bedo apol bala acer apipim ame tye i polo, abino miyo ikwai lobo man luŋ; dok rok luŋ me wi lobo bino nwoŋo winyogi i komgi;

⁵pien Iburaim yam owinyo doga te cobo jami luŋ ame aciko me wora kun mako icwilla kede cikka.”

⁶Icaka te bedo i Gera.

⁷Ka jo kuno openye kop i kom dako mere, en ogamo ni, “En aminna.” En onwoŋo olworo kobo ni, “Dakona,” pien onwoŋo tamo ni, “Me wegi lobo-ni kur neka pi Lebeka,” pien en rik dako amwonya meicel.

⁸Kare ame en doŋ ori kuno kare alalac, Abimereki rwot a jo Piriciti oroo waŋe i dirica, te neno Icaka kun tye atuko kede dako mere Lebeka.

⁹Abimereki te lwoŋo Icaka kobbe ni, “Nen, man dakoni, piŋo yin rik ikobo ni en aminni?” Icaka te dokke iye ni, “Pien onwoŋo atamo ni, ‘Me kur neka oko pire’.”

¹⁰Abimereki ogamo ni, “Kara itimowa aman piŋo ba? Nen kono rik dano moro obuto i dakoni, kono ikelo bal i komwa nono.”

¹¹Abimereki te kwenyoro jo mere luŋ, kun kobo ni, “Ŋat ame bino gudo dano-ni onyo dako mere obino neko aneka.”

¹²Icaka rik te coyo koti i poto i lobo-nono, te cek atek meicel i mwakanono, nyige acel acel oya iye nyige ocele mia acel. Rwot omie winyo,

¹³Icaka te doko twon alonyo moro a mom kobere, jami mere te bedo nya, medde kare ducu, omio en te doko twon alonyo moro a mom kobere.

¹⁴Lim akwo rik te bedo abup meicel i ciŋe, en atino kede adoŋo mege, kun jo me ode daŋ welgi bup atek. Man omio nyeko omako jo me Piriciti i kome.

¹⁵I kare-ni onwoŋo doŋ jo Piriciti oculo waŋ akoŋ luŋ ame rik pappere Iburaim okunyo i kare mere, gin otoro oko i lobo,

¹⁶Abimereki te kobbi Icaka ni, “Ya oko i baŋwa iwoti, pien yin doŋ idoko atek meicel iloowa oko.”

¹⁷Icaka te ya oko, te wot guro kema mere i luŋ me Gerar, te bedo kuno.

¹⁸Icaka doŋ te cako wado waŋ pii akoŋ ame rik okunyo i kare a pappere Iburaim; ame onwoŋo rik jo Piriciti obin otoro oko i kare ame Iburaim oto. En dok te lwoŋo akoŋŋogo i nyiŋ a rik pappere ocakkigi.

¹⁹Ento i kare ame omiro Icaka tye akunyo akoŋ i luŋ me Gerar, gin onwoŋo akoŋŋoro ame pii mere mol kun mit atek.

²⁰Okwat a jo me Gerar te ero da iye kede okwat Icaka, kun gin kobo ni, “Pi i-ni gire megwa.” Daa-nono te miyo Icaka cako nyiŋ pii-nono Ecek, pien obedo da kede iye.

²¹Gin dok te kunyo akoŋ ocele, mannono daŋ dok ote ero da iye; omio Icaka dok te cako mannono ni Citna.

²²Icaka doŋ te weko macinaca oko, te dok kunyo en ocele. Mannono da moro mom doŋ te bedo tye iye; omio en te cako nyiŋ mannono ni Rekobot, kun kobo ni, “Pien tin doŋ Rwot oyabbiwa kabedo alac, wan doŋ obino nya i lobo-ni.”

²³Icaka te ya oko i Gerar, te dak i Beer-ceba.

²⁴Rwot dok te medo nen baŋe i dyeworrono kun kobbe ni, “An Obaŋa a pappi Iburaim; kur ilwor, pien an atye kedi, an abino miyi winyo, ikwai bino nya apol meicel pi amirona Iburaim.”

²⁵En te cano keno me miyo lam baŋ Rwot kuno, te lwoŋo iye nyiŋ Rwot. En oguro kema mere kuno, omiro mere dok te kunyo akoŋ kuno.

²⁶Abimereki rik te wot baŋ Icaka kun oya i Gerar, owoto karacel kede Akugat ami-tam, kede Pikol ame obedo adwoŋ me mony.

²⁷Icaka te kobbigi ni, “Ibino wunu baŋa kara pi kop aŋo ba, aco kun idaga wunu, dok daŋ iryema wunu oko i lobowu?”

²⁸Gin te gamo ni, “Wan otyeko niaŋ atira ni Obaŋa tye kedi, en omio wan obino ni myero kwoŋ bed tye i akina yin kede wan me oket cikere kedi,

²⁹me kur ibin itimwa rac, kite acalo wan daŋ rik giwa mom ogudo komi, mom daŋ otimo ginnoro arac i komi, ento otimo gin abeco keken, dok daŋ oryemi iya i akinawa kede kuc. Aman doŋ Rwot omii winyo.”

³⁰Icaka te teddigi arama, gin ote cam dok daŋ ote mate.

³¹Gin te ya idiko con, ote kwoŋo kwoŋ i akinagi. Icaka te lwokogi me dok turgi, gin te pokere i kuc.

³²I nino-nono i kome, omiro Icaka obino baŋ te titte pi pii ocele ame gin okunyo, kun okobbe ni, “Wan otyeko nwoŋo pii.”

³³Icaka te cako nyiŋ pii nono ni Ciba[7], mannono en omio olwoŋo nyiŋ boma-nono ni Beer-ceba atot onyoni.

³⁴Kare ame mwaka Ecau me dittere doŋ oromo pyeraŋwen, en onyomo Judit nyaka a Beeri, ame en dano me Kitti, kede Bacemat nyaka a Elon, ame daŋ dano me Kitti.

³⁵Gin te miyo Icaka kede Lebeka waŋcuny meicel.