Read lango Agege 27 Bible Online

Agege 27 - lango bible

Agege 27

¹Kare ame Icaka doŋ oti, waŋe doŋ ocoro oko, ame mom doŋ neno piny, olwoŋo atinnere me kao Ecau te kobbe ni, “Atinna.” Ecau te gamo ni, “An ene.”

²Okobbe ni, “Nen ba, an doŋ ati oko, mom aŋeo nino ame ato iye.

³Kwany jami me dwarri kede cao atero kede akud ateroni, wot i tim, me iwot idwarra lee,

⁴ibin icella riŋo akur kite ame amito kede, ikella acam, me alammi winyo a mom ru ato.”

⁵Kare ame Icaka onwoŋo tye akop i wode Ecau, Lebeka onwoŋo tye awinyo. Kare ame Ecau doŋ owoto oko i dwaro lee me kelli pappere,

⁶Lebeka te kobbi wode Yakobo ni, “An aya winyo pappi kun akobbi wode Ecau ni,

⁷‘Wot ikella riŋo, me ibin icella akur, ikella acami me alammi winyo i nyim Rwot ame mom ru ato.’

⁸Pi mannono atinna, tim ber iwiny koppa, iti gin aciki iye amanni.

⁹Wot ikella akale dyegi aryo amwonya i akina dyegi kuca, me ateddi pappi akur, a yomoro cunye,

¹⁰me yin ibin iterri pappi cam, me lammi winyo ame en mom ru oto.”

¹¹Ento Yakobo ogamo dog tottere Lebeka kun kobbe ni, “Nen ba, ominna Ecau kome obedo yeyer, aco an mega mom obedo yeyer.

¹²Kare ocele pappa twero boboŋo koma, man bino miyo nen calo an awoto nyware anywara, bino miyo en cena acena, mom te lamma winyo.”

¹³Tottere te gamo doge kun kobbe ni, “Cen ame obino ceni kede myero bed i wia, atinna; yin ti gin ame akobbi. Tim ber iwot ikellagi.”

¹⁴En owoto okelo akale dyegi aryo baŋ tottere, tottere te celo riŋo akur kite ame pappere maro ikome.

¹⁵Lebeka te kwanyo boŋo aber meicel, boŋo a wode Ecau me kao, ame rik onwoŋo tye i ot baŋ tottere, te miyo Yakobo wode atidi ruko.

¹⁶Eka te tweyo lao dyegi aryo-nu luŋ i bad Yakobo, kede i ŋute kan ame yer onwoŋo mom iye;

¹⁷te doŋ tiŋo riŋo ame en ocelo akur, kede kwon ame omyeno, te miyo wode Yakobo.

¹⁸Yakobo te wot kede i nyim pappere, te kobbe ni, “Apap”; en te ye ni, “An ene; yin iŋa, atinna?”

¹⁹Yakobo te gamo dog pappere ni, “An Ecau atin kaoni. Atyeko doŋ tiyo gin ame woki ititta ca, cukere doŋ iya malo me icam riŋo ame adwaro akelli, me ilamma winy.”

²⁰Ento Icaka te kobbi wode ni, “Atinna, inwoŋo riŋo oyotoyot aman-ni i yore aŋo ba?” Yakobo te gamo ni, “Rwot Obaŋani omio yora obedo aber.”

²¹Icaka dok te kobbi Yakobo ni, “Koŋ inoka aceggi kan, me aboŋ komi atinna, aniaŋ ka yin atinna Ecau ennono ateni onyo mom.”

²²Yakobo te noko pappere ceggi, pappere oboŋo kome te kobo ni, “Dwoni cal i mea Yakobo, ento badi mea Ecau.”

²³Mannono omio naka en gire mom oŋee, pien bade onwoŋo yeyer bala bad ominnere Ecau. Omio en te lamme gire winyo oko.

²⁴Openye ni, “Yin i woda Ecau ateni?” Yakobo ogamo ni, “An ennono ta,”

²⁵Pappere doŋ te kobo ni, “Aco doŋ kel riŋo-nono baŋa kan woda me acam ate lammi winyo.” En te keto cam i nyime. Kare ame en doŋ otyeko camo, te kelle daŋ koŋo olok, te mato,

²⁶Pappere Icaka doŋ te kobo ni, “Nyiggo baŋa kan, me inot lema, atinna.”

²⁷En te nyiko a ceggi baŋe, te noto leme; Icaka te ŋweyo ŋwec ruk a Yakobo, te lamme winyo kun kobo ni, “Nen, ŋwec kom woda kur, calo ŋwec poto ame Rwot omio winyo!

²⁸Obaŋa myero mii toyo ame luk kun ya i polo, kede lobo ame ceko cam abup; mi kaili kede olokki cek abup,

²⁹Lwak jo apipim myero bed omironi rok apol daŋ ryebere piny i nyimi. Yin en ibed rwot ame loo omegoni luŋ. Itino a totti luŋ daŋ myero ryebere i nyimi. Cen myero bed i wi jo luŋ ame ceni, jo luŋ a lammi winyo, winyo myero bed i komgi.”

³⁰A doŋ Icaka otyeko lammi Yakobo winyo, kun en pwod ojer anok anoka iya i baŋ pappere, ominnere Ecau daŋ te dwogo oko i ka dwarrere.

³¹En te celo riŋo akur, te tero baŋ pappere. En te kobbi pappere ni, “Apap, cukere me iya malo icam riŋo ame atinni okelo, me ilamma winyo.”

³²Pappere Icaka te penyo ni, “Yin iŋa-nono dok i?” En te gamo ni, “An Ecau wodi me kao ennono.”

³³Kom Icaka te cako myel oko atek ateka kun kobo ni, “Ŋa a woki koŋ odwaro lee, te kela nie? Ame mom ru ŋin idwogo an acamo cammere, ate daŋ lamme-gu winyo oko. Amie doŋ gum luŋ oko.”

³⁴Ecau tekki winyo kop a pappere, omwoco koko malo amala kun kabo ni, “Apap, lamma an daŋ winyo ba!”

³⁵Ento pappere okobbe ni, “Ominni Yakobo obino kan obwola, en gire doŋ otero gum a kono amii oko.”

³⁶Ecau te kobo ni, “Ocako ni Yakobo kakare, pien en doŋ aman omao gumma odoko iryo twal. Yam koŋ ogeo i me bedo atin kao, tin dok omedo tero gumma oko. Apap doŋ mom ikanna moro aduno?”

³⁷Icaka ogamo kop a wode Ecau ni, “Nen ba atinna, an doŋ atyeko kete oko me bedo rwotti, omego mere luŋ daŋ atyeko miyogi oko me bedo omiro mere, kal kede koŋo luŋ amio oko me pite. Kara gin aŋo a myero dok amii?”

³⁸Ecau dok te kobbi pappere ni, “Apap wee, doŋ winyo moro acel keken daŋ mom odoŋŋa? Lamma an daŋ winyo, apap!” Ecau te mwoco koko oko.

³⁹Pappere Icaka te doŋ kobbe, ni “Nen ba, paconi bino bedo abor i lobo a ceko cam, dok daŋ abedo abor i toyo ame luk ya i polo,

⁴⁰Ibino kwo i pala romoni, ibino bedo i te loc ominni. Ento ka ce ibino jem i kome i kare moro, ibino turo loccere oko i ŋuti.”

⁴¹Ecau te cako dago ominnere Yakobo oko pi winyo ame pappere olammi ominere. Omio en te kobo i cunye ni, “Kare me to a pappa doŋ ceggi, kare-nono en ame abino neko iye ominna Yakobo daŋ oko.”

⁴²Ento rik ote titti Lebeka oko, kop ame wode me kao Ecau okobo; omio en te cwayo dano wot lwoŋo Yakobo wode atidi, te kobbe ni, “Nen ba, ominni Ecau oyikere me neki oko.

⁴³Pi mannono, yin myero iti gin akobbi; yin myero ilwi, iriŋ oko i Karan, baŋ ominna Laban.

⁴⁴Koŋ iwot ibed baŋe kuno naka waŋ ame akemo ominni okwe,

⁴⁵Ka akemo mere doŋ okwe, ame wie doŋ owil oko i gin ame yin itimo i kome, an abino cwayo dano omi i kuno. Mom ber wun aryo luŋ irwenyo wunu i waŋa ni no acel.”

⁴⁶Lebeka te kobbi Icaka ni, “An gira kite anyira a jo Kitti doŋ oola oko. Ka Yakobo daŋ dok bino nyomo nya jo Kitti, ame rom aroma i mon ocele me lobo man, kwona doŋ konnyere bino bedo mom.”