Read lango Agege 28 Bible Online

Agege 28 - lango bible

Agege 28

¹Icaka te lwoŋo Yakobo lamme winyo, eka te doŋ cike ni, “Yin doŋ myero kur dok inyom nyannoro i akina anyira me Kanaan.

²Wot i Paddan-aram i ot a kwarowu Betuel, ame en papa a totti, iwot inyom nyako omin totti.

³Obaŋa Won Twer Ducu myero mii winyo, mi ikwai nya bed apipim, me idok lwak jo apol,

⁴dok mi yin kede ikwai ibed wunu bala Iburaim, me ilo lobo ame ibedo iye acalo welo-ni, lobo ame rik Obaŋa omio baŋ Iburaim.”

⁵Icaka te cwayo Yakobo wot oko i Paddan-aram baŋ Laban wot a Betuel me Aram, ame obedo omin a Lebeka tota a Yakobo kede Ecau.

⁶Ecau oneno ni Icaka doŋ otyeko lammi Yakobo winyo, dok daŋ ocwao oko i Paddan-aram, me wot nyomo nyako me kuno, dok daŋ olamme winyo ocike ni myero mom nyom nyako moro me Kanaan,

⁷dok Yakobo daŋ owinyo kop a pappere kede tottere, te wot oko i Paddan-aram.

⁸Ecau ka onenno ni kite anyira me Kanaan mom yomoro cuny pappere Icaka,

⁹en daŋ te wot baŋ Icmael, te wot nyom iye, medo i kom monne acon ca. Onyomo Makalat, nyaki Icmael wot Iburaim, amin a Nebayot.

¹⁰Yakobo oya i Beer-ceba te dok tutuŋ Karan.

¹¹A doŋ piny oyuto, en otuno i kabedo moro te buto kuno dyeworrono. En okwanyo gweŋŋoro acel te keto me teno wie, te buta i kabedo-nono.

¹²Lek te bino i wie ame omie oneno acoge ame ocuŋ piny kun wie ogudo polo. Omalaika Obaŋa onwoŋo tye a lolle iye kun oyito malo, odwogo piny.

¹³En te neno Rwot kun tye ocuŋ tuŋ wie kun kobo ni, “An a Rwot Obaŋa a kwarowu Iburaim, kede Obaŋa Icaka; abino miyi loba ame ibuto iye-ni, abino miyo baŋi kede baŋ ikwai.

¹⁴Ikwai bino bedo apol bala apua me lobo, dok daŋ ibino nya imedde wunu tuŋ to kede tuŋ kide, tuŋ anyarodi kede tuŋ anyarolum. Dok rok luŋ me wi lobo bino nwoŋo winyo i komi kede i kom ikwai.

¹⁵Nen ba, an atye kedi, abino gwoki i kabedo luŋ ame yin ibino wot iye, dok abino dwoggo yin cen naka i lobo man. Mom abino boli kadi acelloro tuno wan ame acobo gin ame akobbi luŋ.”

¹⁶A doŋ Yakobo oco i waŋ nino, okobo ni, “Ateni, Rwot kara tye i kabedo man, an onwoŋo mom aŋeo.”

¹⁷Lworo te make atek kun en kobo ni, “Kabedo man kara iyiliyili kit man! Man gire ot Obaŋa ikome, man doggola me polo.”

¹⁸Yakobo oya odiko con, te tiŋo gweŋ ame eteno i wie, te cibo cuŋ atira, eka te onyo moo i wi gweŋŋono.

¹⁹En te cako nyiŋ kabedo-nono ni Betel[8], ento nyiŋ kabedo-nono yam koŋ obedo Luj.

²⁰Yakobo te kwoŋ ni, “Ka ce Obaŋa bino bedo keda, kun gwoka i wotta-ni, dok bino miya cam me acama, kede boŋo me aruka,

²¹dok bino miya adwogo i ot a pappa i kuc, Rwot doŋ bino bedo Obaŋana.

²²Gweŋ ame acibo ocuŋ atira kan-ni, bino doko ot Obaŋa, dok daŋ abino dwoko baŋi acel me apar me jami luŋ ame ibino miya.”